దూసుకుపోతున్న స్టాక్‌ మార్కెట్లు

దేశీయ స్టాక్‌ మార్కెట్లు దూసుకుపోతున్నాయి. వరుసగా మూడోరోజూ బుధవా రం కూడా సూచీ లు భారీగా లాభపడ్డాయి. ఐటీ, కన్జ్యూమర్‌ డ్యూరబుల్‌ రంగ షేర్లకు లభించిన మద్దతుకు తోడు అంతర్జాతీయ మార్కెట్ల నుంచి వచ్చిన సానుకూల వార్తలతో లాభాలతో కళకళలాడాయి.

ముంబై, నవంబర్‌ 12 : దేశీయ స్టాక్‌ మార్కెట్లు దూసుకుపోతున్నాయి. వరుసగా మూడోరోజూ బుధవా రం కూడా సూచీలు భారీగా లాభపడ్డాయి. ఐటీ, కన్జ్యూమర్‌ డ్యూరబుల్‌ రంగ షేర్లకు లభించిన మద్దతుకు తోడు అంతర్జాతీయ మార్కెట్ల నుంచి వచ్చిన సానుకూల వార్తలతో లాభాలతో కళకళలాడాయి. అమెరికా షట్‌డౌన్‌పై త్వరలో శుభవార్త వెలువడే అవకాశాలుండటం, ఫెడరల్‌ రిజర్వు మరోసారి వడ్డీరేట్లను తగ్గించే అవకాశాలుండటం కూడా సూచీలకు దన్నుగా నిలిచాయి.

ఇంట్రాడేలో 800 పాయింట్ల వరకు లాభపడిన 30 షేర్ల ఇండెక్స్‌ సూచీ సెన్సెక్స్‌ తిరిగి 84 వేల పాయింట్ల పైకి చేరుకున్నది. మార్కెట్‌ ముగిసే సమయానికి 595.19 పాయింట్లు అందుకొని 84,466.51 పాయింట్ల వద్ద నిలిచింది. మరోసూచీ ఎస్‌ఎన్‌ఈ నిఫ్టీ 180.85 పాయింట్లు ఎగబాకి 25,875.80 వద్ద నిలిచింది.

• ఏషియన్‌ పెయింట్స్‌ 4.46 శాతం పెరిగి టాప్‌ గెయినర్‌గా నిలిచింది.
• దీంతోపాటు టెక్‌ మహీంద్రా, టీసీఎస్‌, బజాజ్‌ఫిన్‌సర్వ్‌, అదానీపోర్ట్స్‌, హెచ్‌సీఎల్‌, భారతీ ఎయిర్‌టెల్‌, ఇన్ఫోసిస్‌, ట్రెంట్‌, రిలయన్స్‌, ఎటర్నల్‌, టైటాన్‌ షేర్లు ఒక్క శాతానికి పైగా లాభపడ్డాయి.
• అలాగే సన్‌ఫార్మా, అల్ట్రాటెక్‌ సిమెంట్‌, బజాజ్‌ ఫైనాన్స్‌, ఎస్బీఐ, మారుతి, యాక్సిస్‌, ఎన్‌టీపీసీ, మహీంద్రా, ఐటీసీ, ఐసీఐసీఐ షేర్లు లాభాల్లో ముగిశాయి.
• కానీ, హచ్‌యూఎల్‌, హెచ్‌డీఎఫ్‌సీ బ్యాంక్‌, పవర్‌గ్రిడ్‌, కొటక్‌ బ్యాంక్‌, బీఈఎల్‌, టాటాస్టీల్‌ షేర్లు నష్టపోయాయి.