విప్రో లాభాల్లో క్షీణత

దేశీయ ఐటీ దిగ్గజాల నిరాశాజనక ఫలితాలు కొనసాగుతున్నాయి. తాజాగా విప్రో నికర లాభం భారీగా పడిపోయింది. ప్రస్తుత ఆర్థిక సంవత్సరం మూడో త్రైమాసికానికిగాను సంస్థ రూ.2,694.2 కోట్ల కన్సాలిడేటెడ్‌ నికర లాభాన్ని గడించింది.

న్యూఢిల్లీ, జనవరి 12: దేశీయ ఐటీ దిగ్గజాల నిరాశాజనక ఫలితాలు కొనసాగుతున్నాయి. తాజాగా విప్రో నికర లాభం భారీగా పడిపోయింది. ప్రస్తుత ఆర్థిక సంవత్సరం మూడో త్రైమాసికానికిగాను సంస్థ రూ.2,694.2 కోట్ల కన్సాలిడేటెడ్‌ నికర లాభాన్ని గడించింది. క్రితం ఏడాది ఇదే త్రైమాసికంలో నమోదైన రూ.3,052.9 కోట్ల లాభంతో పోలిస్తే 11.74 శాతం తగ్గింది. రెండో త్రైమాసికంలో నమోదైన లాభంతో పోలిస్తే మాత్రం ఒక్క శాతం మేర పెరగడం విశేషం. సమీక్షకాలంలో కంపెనీ కన్సాలిడేటెడ్‌ ఆదాయం రూ.23,229 కోట్ల రూ.22,205.1 కోట్లకు తగ్గింది. నికరంగా చూస్తే నాలుగు శాతం తగ్గినైట్లెంది.

• ఐటీ సేవల నుంచి సంస్థకు రావాల్సిన ఆదాయం ఏడాది ప్రాతిపదికన 4.5 శాతం తగ్గి రూ.23,196 కోట్ల నుంచి రూ.22,150.8 కోట్లకు పడిపోయింది.
• గత త్రైమాసికంలో సంస్థ 3.8 బిలియన్‌ డాలర్ల విలువైన ఒప్పందాలు కుదుర్చుకున్నది. వీటిలో 0.9 బిలియన్‌ డాలర్ల విలువైన ఆర్డర్‌ ఒక్కటే కావడం విశేషం.
• మార్చి త్రైమాసికంలో ఐటీ సేవల నుంచి 2,615 మిలియన్‌ డాలర్లు(రూ.21,845 కోట్లు) నుంచి 2,669 మిలియన్‌ డాలర్లు(రూ.22,296 కోట్లు) రావచ్చునని అంచనావేస్తున్నది.
• రంగాలవారీగా చూస్తే బ్యాంకింగ్‌, ఫైనాన్షియల్‌, బీమారంగాల్లో వృద్ధి మైనస్‌ 12.1 శాతం నమోదుకాగా, కన్జ్యూమర్‌ మైనస్‌ 6.9 శాతం, ఎనర్జీ, నేచురల్‌ రిసోర్స్‌, యుటిలిటీ మైనస్‌ 2.2, తయారీ మైనస్‌ 9.1 శాతం పడిపోయాయి.
• కానీ కమ్యూనికేషన్స్‌ విభాగంలో 18.8 శాతం వృద్ధి నమోదైంది.
• గత త్రైమాసికంలో 100 మిలియన్‌ డాలర్ల కంటే అధికంగా ఉన్న క్లయింట్లు సంఖ్య 22కి చేరుకున్నారు. గత త్రైమాసికంలో ఇది 19గా ఉన్నది.
• 75 మిలియన్‌ డాలర్ల కంటే విలువైన క్లయింట్ల సంఖ్య 29 నుంచి 31కి చేరారు.
• ప్రస్తుతం సంస్థ యాక్టివ్‌ క్లయింట్లు 1,349 ఉండగా, వీటిలో టాప్‌-10 సంస్థల వాటా 20 శాతానికి పైగా ఉన్నది.
• మూడో త్రైమాసికంలో కంపెనీలో వలసలు పది త్రైమాసికాల కనిష్ఠ స్థాయి 12.3 శాతానికి పడిపోయాయి.