మూలధన లాభాల పన్నులో మార్పులు!

మూలధన లాభాల పన్నుల వ్యవస్థలో మార్పులు చేసేందుకు కేంద్ర ఆర్థిక శాఖ కసరత్తు చేస్తున్నది. సంక్లిష్టమైన క్యాపిటల్‌ గెయిన్స్‌ టాక్స్‌ వ్యవస్థను సరళీకరించి, హేతుబద్దీకరించేందుకు చర్చలు జరుపుతున్నామని ప్రభుత్వ అధికారి ఒకరు తెలిపారు. పలు రకాల ఆస్తుల్ని కొనుగోలు చేసినప్పటి నుంచి విక్రయించేంతవరకూ అట్టిపెట్టుకునే కాలపరిమితికి అనుగుణంగా మూలధన లాభాలపై పన్ను

• వివిధ ఆస్తుల కాలపరిమితులపై కసరత్తు
• వచ్చే కేంద్ర బడ్జెట్లో ప్రతిపాదించే అవకాశం

న్యూఢిల్లీ, నవంబర్‌ 10: మూలధన లాభాల పన్నుల వ్యవస్థలో మార్పులు చేసేందుకు కేంద్ర ఆర్థిక శాఖ కసరత్తు చేస్తున్నది. సంక్లిష్టమైన క్యాపిటల్‌ గెయిన్స్‌ టాక్స్‌ వ్యవస్థను సరళీకరించి, హేతుబద్దీకరించేందుకు చర్చలు జరుపుతున్నామని ప్రభుత్వ అధికారి ఒకరు తెలిపారు. పలు రకాల ఆస్తుల్ని కొనుగోలు చేసినప్పటి నుంచి విక్రయించేంతవరకూ అట్టిపెట్టుకునే కాలపరిమితికి అనుగుణంగా మూలధన లాభాలపై పన్ను విధింపు ఉంటుంది. ఈ కాలపరిమితుల్లో మార్పులు చేసే అంశాన్ని ప్రస్తుతం సమీక్షిస్తున్నట్లు ఆ అధికారి వివరించారు. 2019లో డైరెక్ట్‌ ట్యాక్స్‌ టాస్క్‌ ఫోర్స్‌ నివేదిక ఇచ్చినప్పటి నుంచి ఈ ప్రతిపాదనలపై కసరత్తు జరుగుతున్నదని, వచ్చే బడ్జెట్‌ సమర్పణకు ముందు అత్యున్నతస్థాయిలో తుది నిర్ణయం తీసుకుంటారన్నారు.

 

చర్చల్లో ఉన్న ప్రతిపాదనలివి…

• బాండ్లు, డెట్‌ ఫండ్స్‌, గోల్డ్‌ ఈటీఎఫ్‌లను ప్రస్తుతం 36 నెలలకంటే మించి హోల్డ్‌ చేస్తే దీర్ఘకాలిక ఆస్తిగా పరిగణిస్తున్నారు. దీనిని 24 నెలలకు తగ్గించవచ్చని ట్యాక్స్‌ నిపుణుడు విశ్వాస్‌ పంజియార్‌ చెప్పారు.
• స్పెక్యులేటివ్‌ లావాదేవీల్ని నిరుత్సాహపర్చేందుకు భూమి, ఇండ్లు, రియల్టీ ప్రాపర్టీ తదితర స్థిరాస్తుల్ని దీర్ఘకాలిక ఆస్తిగా పరిగణించే కాలాన్ని 36 నెలలకు లేదా 48 నెలలకు పెంచే యోచన ఉంది. ప్రస్తుతం ఈ ఆస్తిని 24 నెలల లోపు విక్రయిస్తే స్వల్పకాలిక లాభాల పన్నును చెల్లించాలి. ఆ పైబడిన తర్వాత అమ్మితే దీర్ఘకాలిక లాభాల పన్ను రేటు ఉంటుంది.
• స్టాక్‌ ఎక్సేంజీల్లో లిస్టయిన షేర్లు, ఈక్విటీ ఆధారిత మ్యూచువల్‌ ఫండ్లు, జీరో కూపన్‌ బాండ్లు, యూనిట్‌ ట్రస్ట్‌ ఆఫ్‌ ఇండియా యూనిట్లను 12 నెలలకు పైబడి హోల్డ్‌ చేస్తే దీర్ఘకాలిక ఆస్తిగా పరిగణిస్తారు.
• డెట్‌ మ్యూచువల్‌ ఫండ్స్‌, ఆభరాణాల్ని 36 నెలలకు పైబడి అట్టిపెట్టుకుంటే లాంగ్‌ టర్మ్‌ అసెట్‌గా పరిగణిస్తారు.
• సీబీడీటీ సభ్యుడు అఖిలేశ్‌ రంజన్‌ నేతృత్వంలో ఏర్పాటైన టాస్క్‌ ఫోర్స్‌ ఆస్తుల్ని మూడు రకాలుగా విభజించాలని సూచించింది. అవి..ఈక్విటీ, నాన్‌-ఈక్విటీ ఫైనాన్షియల్‌ ఆస్తులు, ప్రాపర్టీతో సహా ఇతర ఆస్తులు.
• 12 నెలలు దాటిన తర్వాత ఈక్విటీ షేర్లను విక్రయించగా వచ్చే లాభాలపై 10 శాతం లాంగ్‌ టర్మ్‌ క్యాపిటల్‌ గెయిన్స్‌ టాక్స్‌ను (ఎల్‌టీసీజీ), ఆ లోపుగా విక్రయిస్తే వచ్చే లాభాలపై 15 శాతం షార్ట్‌ టర్మ్‌ క్యాపిటల్‌ గెయిన్స్‌ టాక్స్‌ను ప్రతిపాదించింది.
• నాన్‌-ఈక్విటీ ఫైనాన్షియల్‌ ఆస్తులకైతే 24 నెలలు దాటితే 20 శాతం ఎల్‌టీసీజీని సూచించింది. -ఇతర ఆస్తులకు 36 నెలలు మించితే ఇండెక్సేషన్‌ ప్రయోజనంతో 20 శాతం ఎల్‌టీసీజీని సిఫార్సు చేసింది.
• ప్రస్తుతం సాధారణ ఎల్‌టీసీజీ రేటు 20 శాతంగా ఉంది.
• ఈక్విటీలకైతే ఒక ఆర్థిక సంవత్సరంలో వచ్చిన లాభం రూ.1 లక్ష దాటితే 10 శాతం ఎల్‌టీసీజీని చెల్లించాలి.
• ఈక్విటీలు, సంబంధిత పత్రాలకు స్వల్పకాలిక మూలధన లాభాల పన్ను 15 శాతం ఉంది.
• మిగిలిన అన్ని ఆస్తులకూ వచ్చే స్వల్పకాలిక మూలధన లాభాలను టాక్స్‌పేయర్‌ ఆదాయాన్ని కలిపి, ఆయా శ్లాబుకు వర్తించే పన్ను రేటును అమలు చేస్తున్నారు.