బీవోబీ లాభం 2,168 కోట్లు

• క్యూ1లో 79 శాతం పెరిగిన ప్రాఫిట్‌

న్యూఢిల్లీ, జూలై 30: ప్రభుత్వరంగ సంస్థ బ్యాంక్‌ ఆఫ్‌ బరోడా(బీవోబీ) అంచనాలకుమించి ఆర్థిక ఫలితాలు ప్రకటించింది. జూన్‌తో ముగిసిన మూడు నెలల కాలానికిగాను బ్యాంక్‌ రూ.2,168 కోట్ల నికర లాభాన్ని గడించింది. ఏడాది క్రితం ఇదే త్రైమాసికంలో వచ్చిన రూ.1,208 కోట్ల లాభంతో పోలిస్తే ఇది 79 శాతం అధికమని పేర్కొంది. మొండి బకాయిలు తగ్గుముఖం పట్టడం వల్లనే లాభాల్లో భారీ వృద్ధి నమోదైందని బ్యాంక్‌ వర్గాలు వెల్లడించాయి. సమీక్షకాలంలో బ్యాంక్‌ ఆదాయం రూ.19,915.83 కోట్ల నుంచి రూ.20,119.52 కోట్లకు చేరుకున్నట్లు బీఎస్‌ఈకి సమాచారం అందించింది. వడ్డీల మీద వచ్చే ఆదాయం రూ.17,052.64 కోట్ల నుంచి రూ.18,937.49 కోట్లకు చేరుకున్నట్లు తెలిపింది. వడ్డీయేతర ఆదాయం కూడా ఏడాది ప్రాతిపదికన 12 శాతం ఎగబాకి రూ.8,838 కోట్లకు చేరుకున్నది.

• బ్యాంక్‌ ఆపరేటింగ్‌ ప్రాఫిట్‌ 19 శాతం తగ్గి రూ.5,707 కోట్ల నుంచి రూ.4,528 కోట్లకు పడిపోయింది.
• బ్యాంక్‌ స్థూల నిరర్థక ఆస్తుల విలువ 8.86 శాతం నుంచి 6.26 శాతానికి దిగొచ్చాయి. విలువ పరంగా చూస్తే రూ.63,028 కోట్ల నుంచి రూ. 52,590.83 కోట్లకు తగ్గాయి.
• నికర ఎన్‌పీఏ 3.03 శాతం నుంచి 1.58 శాతానికి చేరుకున్నాయి.
• ఏడాది క్రితం రూ.4 వేల కోట్లుగా ఉన్న బ్యాంక్‌ మొండి బకాయిలు గత త్రైమాసికానికిగాను రూ.1,684.80 కోట్లకు తగ్గినట్లు పేర్కొంది.
  ప్రొవిజనింగ్‌ కవరేజ్‌ రేషియో 89.36 శాతంగా ఉండగా, నికర వడ్డీ మార్జిన్‌ 3.02 శాతంగా ఉన్నది.
• దేశీయ బ్యాంక్‌ అడ్వాన్స్‌లు 15.7 శాతం పెరిగి రూ.6,95,493 కోట్లకు చేరుకున్నాయి.
• గత త్రైమాసికంలో రిటైల్‌ రుణాల్లో 23.2 శాతం వృద్ధి నమోదవగా, వ్యక్తిగత రుణాలు 147.1 శాతం, వాహన రుణాలు 25.6 శాతం, విద్యా రుణాలు 20.05 శాతం, గృహ రుణాలు 15.3 శాతం చొప్పున పెరిగాయి.