Gold Rate | రికార్డు స్థాయికి బంగారం.. ఒకే రోజు రూ.1300 పెరుగుదల

బంగారం, వెండి ధరలు ఆల్‌టైమ్‌ హై రికార్డులతో హోరెత్తించాయి. సోమవారం దేశీయ మార్కెట్‌లో అటు గోల్డ్‌, ఇటు సిల్వర్‌ రెండింటి రేట్లూ పరుగులు పెట్టాయి. ఏకంగా రూ.1,300 చొప్పున ఎగబాకి మునుపెన్నడూలేని స్థాయిల్లో స్థిరపడ్డాయి.

• దేశీయ మార్కెట్‌లో ఆల్‌టైమ్‌ హైకి బంగారం, వెండి ధరలు
• తొలిసారి తులం పుత్తడి రూ.90,750గా నమోదు
• రూ.1,02,500 పలికిన కిలో వెండి
• ఒక్కరోజే రూ.1,300 చొప్పున పెరిగిన రేట్లు

న్యూఢిల్లీ, మార్చి 17: బంగారం, వెండి ధరలు ఆల్‌టైమ్‌ హై రికార్డులతో హోరెత్తించాయి. సోమవారం దేశీయ మార్కెట్‌లో అటు గోల్డ్‌, ఇటు సిల్వర్‌ రెండింటి రేట్లూ పరుగులు పెట్టాయి. ఏకంగా రూ.1,300 చొప్పున ఎగబాకి మునుపెన్నడూలేని స్థాయిల్లో స్థిరపడ్డాయి. అఖిల భారత సరఫా అసోసియేషన్‌ వివరాల ప్రకారం ఢిల్లీ స్పాట్‌ మార్కెట్‌లో 24 క్యారెట్‌ (99.9 స్వచ్ఛత) 10 గ్రాముల పుత్తడి విలువ రూ.1,300 పుంజుకొని మొదటిసారి రూ.90వేల మార్కును దాటుతూ రూ.90,750గా నమోదైంది. దీంతో మునుపటి రూ.89,450 రికార్డు చెరిగిపోయినైట్టెంది. మరోవైపు వెండి ధరలూ దౌడు తీశాయి. కిలో ధర ఈ ఒక్కరోజే రూ.1,300 ఎగిసి రూ.1,02,500గా నమోదైంది. ఈ స్థాయికి వెండి ధర రావడం ఇదే తొలిసారి.

హైదరాబాద్‌లో..
దేశ రాజధానిలో బంగారం మెరిసినా.. రాష్ట్ర రాజధాని హైదరాబాద్‌లో ఆ వెలుగులు కనిపించలేదు. తులం పసిడి రూ.90వేల దిగువనే ఉన్నది. 24 క్యారెట్‌ గోల్డ్‌ రేటు రూ.89,560గా రికాైర్డెంది. అలాగే 22 క్యారెట్‌ (99.5 స్వచ్ఛత లేదా ఆభరణాల బంగారం) పుత్తడి విలువ 10 గ్రాములు రూ.82,100గా నమోదైంది. మునుపటితో చూస్తే రూ.100 మేర ధరలు తగ్గుముఖం పట్టాయి.

ఇదీ సంగతి..
గోల్డ్‌, సిల్వర్‌ రేట్లు ఇంతలా జూమ్‌ కావడానికి దేశ, విదేశీ పరిస్థితులే కారణంగా నిలుస్తున్నాయి. ప్రధానంగా అమెరికా అధ్యక్షుడు డొనాల్డ్‌ ట్రంప్‌ వేస్తున్న సుంకాలు.. అంతర్జాతీయ మార్కెట్లను కుదిపేస్తున్నాయి. దీంతో గ్లోబల్‌ ఇన్వెస్టర్లను ట్రేడ్‌ వార్‌ భయాలు చుట్టుముట్టాయి. ఈ క్రమంలోనే తమ పెట్టుబడుల రక్షణార్థం.. సురక్షిత పెట్టుబడి సాధనమైన బంగారం, వెండి వైపునకు మదుపరులు అడుగులేస్తున్నారు. పెద్ద ఎత్తున పెట్టుబడులు పెడుతుండటంతో డిమాండ్‌ ఒక్కసారిగా పెరిగిపోయింది. అలాగే భారత్‌సహా ఆయా దేశాల సెంట్రల్‌ బ్యాంకులు పసిడి నిల్వలను పెంచుకుంటుండటం కూడా గోల్డ్‌ మార్కెట్‌ను ప్రభావితం చేస్తున్నదని నిపుణులు తాజా సరళిని విశ్లేషిస్తున్నారు. అంతర్జాతీయ అనిశ్చిత పరిస్థితులు, ఎర్ర సముద్రంలో పెరుగుతున్న ఉద్రిక్తతలు, ద్రవ్యోల్బణం తగ్గడంతో రాబోయే ద్రవ్యసమీక్షల్లో ఫెడ్‌ రిజర్వ్‌ వడ్డీరేట్లను మరింత తగ్గిస్తుందన్న అంచనాలు కూడా ధరలను ఎగదోస్తున్నాయన్న అభిప్రాయాలు వినిపిస్తున్నాయి.

• ఈ ఏడాది మొదలు ఇప్పటిదాకా దేశీయంగా రూ.11,360 లేదా 14.31 శాతం ఎగిసిన తులం బంగారం ధర. జనవరి 1న 24 క్యారెట్‌ 10 గ్రాములు రూ.79,390గానే ఉన్నది.
• మల్టీ కమోడిటీ ఎక్సేంజ్‌లో ఏప్రిల్‌ నెలకుగాను గోల్డ్‌ ఫ్యూచర్స్‌ 10 గ్రాములు రూ.88,004 పలికింది.
• అంతర్జాతీయ మార్కెట్లలో ఔన్స్‌ గోల్డ్‌ 14.48 డాలర్లు పెరిగి 2,998.90 డాలర్లుగా ఉన్నది. శుక్రవారం 3వేల డాలర్లను తాకిన విషయం తెలిసిందే.
• కోమెక్స్‌ గోల్డ్‌ ఫ్యూచర్స్‌లో 3,007 డాలర్లు పలికిన ఔన్స్‌ బంగారం. శుక్రవారం 3,017.10 డాలర్లుగా ఉన్నది.

ధరల పెరుగుదలకు ప్రధాన కారణాలు

• అమెరికా టారిఫ్‌లు
• వాణిజ్య యుద్ధం భయాలు
• అంతర్జాతీయ ఆర్థిక అనిశ్చిత పరిస్థితులు
• స్టాక్‌ మార్కెట్లలో తీవ్ర ఒడుదొడుకులు
• బంగారంపై పెట్టుబడులపట్ల మదుపరుల ఆసక్తి
• ఫెడ్‌ రిజర్వ్‌ వడ్డీరేట్ల కోతల అంచనాలు