Nokia | ఎయిర్‌టెల్‌తో జట్టుకట్టిన నోకియా

ఫిన్‌లాండ్‌కు చెందిన టెలికం గేర్ల సరఫరా సంస్థ నోకియా.. ప్రముఖ టెలికం దిగ్గజం భారతీ ఎయిర్‌టెల్‌ నుంచి భారీ ఆర్డర్‌ పొందింది. దేశంలోని వివిధ రాష్ర్టాలు, నగరాల్లో 4జీ, 5జీ ఉపకరణాలు అమర్చేందుకుగాను కోట్లాది రూపాయల ఒప్పందాన్ని కుదుర్చుకున్నది.

Nokia | న్యూఢిల్లీ, నవంబర్‌ 20: ఫిన్‌లాండ్‌కు చెందిన టెలికం గేర్ల సరఫరా సంస్థ నోకియా.. ప్రముఖ టెలికం దిగ్గజం భారతీ ఎయిర్‌టెల్‌ నుంచి భారీ ఆర్డర్‌ పొందింది. దేశంలోని వివిధ రాష్ర్టాలు, నగరాల్లో 4జీ, 5జీ ఉపకరణాలు అమర్చేందుకుగాను కోట్లాది రూపాయల ఒప్పందాన్ని కుదుర్చుకున్నది. ఈ ఒప్పందం ప్రకారం 5జీ నెట్‌వర్క్‌కు సంబంధించి బేస్‌ స్టేషన్ల ఏర్పాటు, బేస్‌బ్యాండ్‌ యూనిట్లు తదితర ఉపకరణాలు అమర్చనున్నది.

ప్రస్తుతం 4జీ నెట్‌వర్క్‌కు సంబంధించి మల్టీ బ్రాండ్‌ రేడియోలు, బేస్‌బ్యాండ్‌ ఎక్విప్‌మెంట్‌ అమర్చేందుకు ఈ కాంట్రాక్టు కుదిరినట్లు తెలిపింది. కస్టమర్లకు మెరుగైన సేవలు అందించడానికి ఈ ఒప్పందం దోహదం చేయనున్నదని భారతీ ఎయిర్‌టెల్‌ వైస్‌ చైర్మన్‌, ఎండీ గోపాల్‌ విఠల్‌ తెలిపారు. గడిచిన రెండు దశాబ్దాలుగా నోకియాతో కలిసి పనిచేస్తున్నట్లు, 2జీ, 3జీ, 4జీ, 5జీ నెట్‌వర్క్‌ను విస్తరించడానికి సంస్థ అన్ని రకాలుగా సహాయ సహకారాలు అందించినట్లు చెప్పారు. ఈ ఒప్పందంతో గ్రీన్‌ 5జీ నెట్‌వర్క్‌ను విస్తరించడానికి దోహదం చేయనున్నదని, అలాగే ఎయిర్‌టెల్‌ నెట్‌వర్క్‌లో విద్యుత్‌ ఆదా కావడంతోపాటు కాలుష్యం తగ్గనున్నదన్నారు.