మూడు రోజుల పతనానికి బ్రేక్‌

స్టాక్‌ మార్కెట్ల వరుస పతనాలకు బ్రేక్‌పడింది. బ్లూచిప్‌ సంస్థల షేర్లకు మదుపరుల నుంచి లభించిన మద్దతుకు తోడు అంతర్జాతీయ మార్కెట్ల నుంచి వచ్చిన సానుకూల అంశాలు సూచీలను లాభాలవైపు నడిపించాయి.

• భారీగా లాభపడిన స్టాక్‌ మార్కెట్లు
• 4 లక్షల కోట్లు పెరిగిన సంపద

గత మూడు సెషన్లుగా నష్టాలతో కాలంవెళ్లదీసిన మదుపరులు తిరిగి లాభపడ్డారు. స్టాక్‌ మార్కెట్లు భారీగా లాభపడటంతో వీరి సంపద రూ.4 లక్షల కోట్ల మేర పెరిగింది. దీంతో బీఎస్‌ఈలో లిైస్టెన కంపెనీల మార్కెట్‌ క్యాపిటలైజేషన్‌ విలువ రూ.4 లక్షల కోట్లు పెరిగి రూ.373.57 లక్షల కోట్లకు చేరుకున్నది. అంతర్జాతీయ మార్కెట్లు పుంజుకోవడం, ముఖ్యంగా అమెరికా సూచీలు లాభాల్లో ముగియడం మదుపరులకు జోష్‌నిచ్చిందని దలాల్‌స్ట్రీట్‌ వర్గాలు వెల్లడించాయి.

ముంబై, జనవరి 19: స్టాక్‌ మార్కెట్ల వరుస పతనాలకు బ్రేక్‌పడింది. బ్లూచిప్‌ సంస్థల షేర్లకు మదుపరుల నుంచి లభించిన మద్దతుకు తోడు అంతర్జాతీయ మార్కెట్ల నుంచి వచ్చిన సానుకూల అంశాలు సూచీలను లాభాలవైపు నడిపించాయి. వరుసగా మూడు రోజులుగా నష్టాలే పరమావదిగా కొనసాగిన సూచీలు ఎట్టకేలకు లాభాల్లోకి మళ్లాయి. ప్రారంభం నుంచే లాభాల బాట పట్టిన సూచీలు వారాంతం ట్రేడింగ్‌ ముగిసే సరికి భారీగా లాభపడింది. ఒక దశలో 700 పాయింట్లకు పైగా లాభపడిన 30 షేర్ల ఇండెక్స్‌ సూచీ సెన్సెక్స్‌ చివరకు 496 పాయింట్లు అందుకొని 71,683.23 వద్ద ముగిసింది. మరో సూచీ నిఫ్టీ 21,600 పాయింట్ల కీలక స్థాయిని అధిగమించింది.

హెచ్‌డీఎఫ్‌సీ బ్యాంక్‌ తీరు అంతే..
వరుసగా నాలుగో రోజు శుక్రవారం కూడా హెచ్‌డీఎఫ్‌సీ బ్యాంక్‌ షేరు పడిపోయింది. బ్యాంక్‌ షేరు 1.08 శాతం పతనం చెందింది. దీంతో గత మూడు సెషన్లలో బ్యాంక్‌ షేరు 12 శాతం పతనం చెందినట్లు అయింది. బ్యాంక్‌ నాలుగో త్రైమాసికపు ఆర్థిక ఫలితాలు విడుదలైన నాటినుంచి షేరు దిగువముఖం పట్టింది.

• భారతీ ఎయిర్‌టెల్‌ 3.52 శాతం పెరిగి టాప్‌ గెయినర్‌గా నిలిచింది.
• ఎన్‌టీపీసీ, టెక్‌ మహీంద్రా, టాటా స్టీల్‌, మహీంద్రా, అల్ట్రాటెక్‌ సిమెంట్‌లు రెండు శాతానికి పైగా బలపడ్డాయి.
• టైటాన్‌, యాక్సిస్‌ బ్యాంక్‌, జేఎస్‌డబ్ల్యూ స్టీల్‌, ఎల్‌అండ్‌టీ, ఐటీసీ, ఐసీఐసీఐ బ్యాంక్‌, బజాజ్‌ ఫిన్‌సర్వ్‌, మారుతి, ఇన్ఫోసిస్‌, టీసీఎస్‌లు ఒక్క శాతానికి పైగా లాభపడ్డాయి.
• వీటితోపాటు పవర్‌గ్రిడ్‌, బజాజ్‌ ఫైనాన్స్‌, హెచ్‌యూఎల్‌, విప్రో, టాటా మోటర్స్‌, నెస్లె, ఏషియన్‌ పెయింట్స్‌, హెచ్‌సీఎల్‌ టెక్‌, రిలయన్స్‌ షేర్లు పెరిగాయి.
• కానీ, ఇండస్‌ఇండ్‌ బ్యాంక్‌, హెచ్‌డీఎఫ్‌సీ బ్యాంక్‌, కొటక్‌ బ్యాంక్‌, ఎస్బీఐ, సన్‌ఫార్మా షేర్లు నష్టపోయాయి.
• ఈ వారంలో బీఎస్‌ఈ సెన్సెక్స్‌ 885.22 పాయింట్లు లేదా 1.21 శాతం, నిఫ్టీ 272.15 పాయింట్లు లేదా 1.24 శాతం నష్టపోయాయి.
• బీఎస్‌ఈ మిడ్‌క్యాప్‌ 1.69 శాతం, స్మాల్‌క్యాప్‌ ఇండెక్స్‌లు 1.06 శాతం లాభపడ్డాయి.
• రంగాలవారీగా చూస్తే ఆయిల్‌ అండ్‌ గ్యాస్‌ 2.17 శాతం, మెటల్‌ 1.69 శాతం, ఇండస్ట్రీయల్స్‌ 1.62 శాతం, ఎనర్జీ 1.58 శాతం, కమోడిటీస్‌ 1.44 శాతం, టెక్‌ 1.29 శాతం, ఐటీ 1.06 శాతం చొప్పున పెరిగాయి.
• గత మూడు సెషన్లలో బీఎస్‌ఈ సెన్సెక్స్‌ 2.91 శాతం, నిఫ్టీ 2.87 శాతం పతనమైన విషయం తెలిసిందే.

నేడు మార్కెట్లలో ట్రేడింగ్‌
ఈ నెల 20 శనివారం స్టాక్‌ మార్కెట్లలో ట్రేడింగ్‌ జరుగుతుందని ఎన్‌ఎస్‌ఈ ప్రతినిధి ఒకరు తెలిపారు. సోమవారం అయోధ్యలో శ్రీరామ మందిరం ప్రారంభోత్సవం సందర్భంగా మహారాష్ట్ర ప్రభుత్వం సెలవు ప్రకటించడంతో ఈ రోజున స్టాక్‌ మార్కెట్లు పనిచేయవు. దీంతో శనివారం సూచీలు పూర్తిస్థాయిలో పనిచేయనున్నాయని ప్రతినిధి తెలిపారు. సోమవారం స్టాక్‌ మార్కెట్లతోపాటు కరెన్సీ డెరివేటివ్‌ మార్కెట్లు కూడా పనిచేయవు. మరోవైపు, రిజర్వుబ్యాంక్‌ కార్యాలయాలకు సెలవుకావడంతో ఈ సోమవారం రూ.2 వేల నోట్ల ఎక్సేంజ్‌, డిపాజిట్‌ చేసుకునే అవకాశం లేదు.