తిరుమల లడ్డూపై దుమారం

వైసీపీ ప్రభుత్వ హయాంలోనే లడ్డూ తయారీకి జంతువుల కొవ్వును ఉపయోగించారంటూ సీఎం చంద్రబాబు చేసిన ఆరోపణలను ఏపీ మాజీ సీఎం, వైసీపీ అధినేత వైఎస్‌ జగన్‌ మోహన్‌రెడ్డి తప్పుబట్టారు.

• 100 రోజుల వైఫల్యం నుంచి దృష్టి మళ్లించేందుకే బాబు కట్టుకథ : జగన్‌
• కల్తీ నెయ్యిపై దేశవ్యాప్త చర్చ
• 100రోజుల పాలన, ఆరు గ్యారెంటీల అమలుపై దృష్టి మళ్లించేందుకే చంద్రబాబు కట్టుకథ : మాజీ సీఎం జగన్‌
• నాణ్యత లోపం నిజమే: టీటీడీ ఈవో శ్యామలరావు వెల్లడి
• భక్తుల విశ్వాసాన్ని తగ్గించే కుట్ర: కేంద్ర మంత్రి బండి సంజయ్‌

తిరుమల శ్రీవారి లడ్డూ ప్రసాదంపై వివాదం దేశ వ్యాప్తంగా దుమారం రేపుతున్నది. లడ్డూ తయారీకి ఉపయోగించే నెయ్యిలో జంతువుల కొవ్వు ఆనవాళ్లు ఉన్నాయంటూ ఏపీ సీఎం చంద్రబాబు నాయుడు చేసిన వ్యాఖ్యలతో వివాదం మరింత ముదిరింది. దీంతో రాజకీయ పార్టీల మధ్య వార్‌ కొనసాగుతున్నది. తాజాగా శుక్రవారం పలువురు రాజకీయ ప్రముఖులు, నేతలు స్పందించారు.

హైదరాబాద్‌, సెప్టెంబర్‌ 20 (నమస్తే తెలంగాణ): వైసీపీ ప్రభుత్వ హయాంలోనే లడ్డూ తయారీకి జంతువుల కొవ్వును ఉపయోగించారంటూ సీఎం చంద్రబాబు చేసిన ఆరోపణలను ఏపీ మాజీ సీఎం, వైసీపీ అధినేత వైఎస్‌ జగన్‌ మోహన్‌రెడ్డి తప్పుబట్టారు. దేవుడ్ని కూడా రాజకీయాలకు వాడుకునే దుర్మార్గమైన మనస్తత్వం చంద్రబాబుది అంటూ జగన్‌ ఆరోపించారు. చంద్రబాబు చెబుతున్నదంతా ఓ కట్టుకథగా అభివర్ణించారు. నెయ్యి శాంపిళ్లపై రెండు నెలల కిందటే నివేదిక వస్తే ఇన్ని రోజులు ఏం చేశారని చంద్రబాబును ప్రశ్నించారు. వందరోజుల పాలన, సూపర్‌ సిక్స్‌ హామీల అమలుపై టీడీపీ కూటమిని ప్రజలు ప్రశ్నిస్తారనే చంద్రబాబు డైవర్షన్‌ రాజకీయాలు చేస్తున్నారని ఆరోపించారు.

• తిరుమల లడ్డూ నాణ్యతపై కొంతకాలంగా భక్తుల నుంచి ఫిర్యాదులు వస్తున్నాయని ఈవో జె.శ్యామలరావు శుక్రవారం తెలిపారు. తాను బాధ్యతలు స్వీకరించిన తర్వాత జూలై 6, 12తేదీల్లో నెయ్యిని ల్యాబ్‌కి పంపినట్లు తెలిపారు. ఏఆర్‌ డెయిరీ సరఫరా చేసిన నెయ్యిలో నాణ్యత లేదని టెస్టుల్లో తేలిందని వెల్లడించారు.
• లడ్డూ వివాదం హిందువుల మనోభావాలను కలిచి వేస్తున్నదని కేంద్ర హోంశాఖ సహాయ మంత్రి బండి సంజయ్‌కుమార్‌ అన్నారు. టీటీడీపై భక్తుల విశ్వాసాన్ని సడలించేందుకు కుట్ర చేశారని మండిపడ్డారు. సీబీఐతో విచారణ జరిపించాలని సీఎం చంద్రబాబుకు లేఖ రాశారు.
• భారత ప్రధాన న్యాయమూర్తికి జర్నలిస్టు సురేశ్‌ హానే న్యాయవాది ద్వారా లేఖ రాశారు. ఈ వ్యవహారంలో తక్షణమే సుప్రీంకోర్టు జోక్యం చేసుకొని తగిన ఆదేశాలు జారీచేయాలని విజ్ఞప్తిచేశారు.
• ప్రసాదాల నాణ్యతపై గతంలో టీటీడీ చైర్మన్‌, ఈవో దృష్టికి తీసుకెళ్లానని టీటీడీ మాజీ ప్రధాన అర్చకుడు రమణ దీక్షితులు అన్నారు. ఆవు నెయ్యిని కల్తీ చేయడం దారుణమైన విషయమన్నారు.
• టెస్టుల్లో ఎలాంటి లోపాలు లేవని తేలినట్టు ఏఆర్‌ డెయిరీ యాజమాన్యం ప్రకటించింది. కానీ, తమ సంస్థపై విష ప్రచారం చేస్తున్నారని పేర్కొంది.
• లడ్డూ ప్రసాదంపై ఎలాంటి విచారణకైనా తాను సిద్ధమేనని టీటీడీ మాజీ చైర్మన్‌ వైవీ సుబ్బారెడ్డి స్పష్టంచేశారు. ఆరోపణలపై తాను కుటుంబంతో సహా ప్రమాణం చేస్తానని, చంద్రబాబు కూడా ప్రమాణం చేయాలని డిమాండ్‌ చేశారు.
• దోషులను గుర్తించి కఠిన చర్యలు తీసుకోవాలని సినీనటుడు ప్రకాశ్‌రాజ్‌.. డిప్యూటీ సీఎం పవన్‌కల్యాణ్‌ను ఎక్స్‌ వేదికగా కోరారు.
• తిరుమల లడ్డూ వివాదంపై సుప్రీంకోర్టు సుమోటోగా విచారణ చేపట్టాలని సీపీఐ సీనియర్‌ నేత నారాయణ కోరారు.

నెయ్యి టెండర్లు జరిగింది ఇలా..

నెయ్యి కొనుగోలుకు టీటీడీ 2024 మార్చి 12న టెండర్‌ వేసినట్లు పేరొంది. మే 8న టెండర్‌ ఖరారైంది. ఆ తర్వాత తమిళనాడుకు చెందిన ఏఆర్‌ డెయిరీకి ఈ ఆర్డర్‌ వచ్చింది. కంపెనీ స్వచ్ఛమైన ఆవు నెయ్యి కిలో ధర రూ.319గా పేరొన్నది. జూలై 6 – జూలై 12 మధ్య నాలుగు, జూలై 15 నుంచి ఆగస్ట్‌ 6వ తేదీ వరకు 6ట్యాంకర్లను పంపింది. జూలై 6, 12 తేదీల్లో పంపిన ట్యాంకర్ల నమూనాల్లో అవకతవకలు జరిగినట్లు గుర్తించింది. గుజరాత్‌లోని నేషనల్‌ డెయిరీ ల్యాబ్‌కు శాంపిళ్లు పంపి మిగతా ట్యాంకర్లను నిషేధించారు.

తిరుమల లడ్డూకు 300 ఏండ్ల చరిత్ర

తిరుమల శ్రీవారి ప్రసాదంగా లడ్డూ పంపిణీ సుమారు 300 ఏండ్ల కిందటే ప్రారంభమైంది.1715 ఆగస్టు 2న తొలిసారిగా లడ్డూను తిరుమల ప్రసాదంగా భక్తులకు అందించినట్టు చరిత్ర చెబుతోంది. 2010 వరకూ రోజుకు లక్ష వరకూ లడ్డూలను తయారు చేసేవారు. ఆ తర్వాత భక్తుల రద్దీకి అనుగుణంగా రోజుకు 3.20 లక్షల లడ్డూలను తయారుచేస్తున్నారు. లడ్డూకు 2014లో జీఐ గుర్తింపుతోపాటు పేటెంట్‌, ట్రేడ్‌మార్‌ రిజిస్టర్‌ కావడం విశేషం.