Devaragattu : దేవరగట్టు కర్రల యుద్ధంలో ఉద్దేశపూర్వక దాడులు : 14 మంది అరెస్ట్‌

Devaragattu : దేవరగట్టులో ప్రతి ఏటా సంప్రదాయకంగా నిర్వహిస్తున్న కర్రల సమరం ఉద్దేశపూర్వక దాడిగా మారుతున్నది. దసారా రోజున దేవరగట్టులో కర్రలతో కొట్టుకోవడం ..

October 21, 2021 / 03:25 PM IST

Devaragattu : దేవరగట్టు కర్రల యుద్ధంలో ఉద్దేశపూర్వక దాడులు : 14 మంది అరెస్ట్‌

(Devaragattu) కర్నూలు: దేవరగట్టులో ప్రతి ఏటా సంప్రదాయకంగా నిర్వహిస్తున్న కర్రల సమరం ఉద్దేశపూర్వక దాడిగా మారుతున్నది. దసారా రోజున దేవరగట్టులో కర్రలతో కొట్టుకోవడం ఎప్పటినుంచే కొనసాగుతున్నది. అయితే, గతంలో సంప్రదాయకంగా కొనసాగిన కర్రల సమరం.. ఇప్పుడు ఉద్దేశపూర్వక దాడిగా మారడం పట్ల పలువురు విచారం వ్యక్తం చేస్తున్నారు. ఈ వ్యవహారంలో కొత్త కోణాలు బయటపడుతుండటంతో విస్మయానికి గురవుతున్నారు. దసరా రోజున జరిగిన ఈ కార్యక్రమంలో ఉద్దేశపూర్వకంగా కర్రలతో దాడి చేసినట్లు అక్కడ ఏర్పాటు చేసిన సీసీ కెమెరాల్లో రికార్డయింది. ఈ వీడియోల ఆధారంగా కర్రల సమరం కాకుండా ఉద్దేశపూర్వక దాడి అని పోలీసులు నిర్ధారణకు వచ్చారు. కర్రల సమరంలో పాల్గొన్న ఎల్లార్తి గ్రామానికి చెందిన 14 మంది వ్యక్తులను అదుపులోకి తీసుకుని విచారిస్తున్నారు.

దసరా పండగ రోజున కర్రలతో కొట్టుకోవడం దేవరగట్టులో కొన్ని దశాబ్దాలుగా కొనసాగుతున్నది. అయితే, సంప్రదాయం కాస్తా పనిగట్టుకుని చేసే దాడిలా మారినట్లు పోలీసులు గుర్తించారు. సీసీ కెమెరాల ఆధారంగా వారిని గుర్తించి అదుపులోకి తీసుకుంటున్నారు. పాత పగలతో దాడి చేసినట్లు పోలీసులు అనుమానిస్తున్నారు. ఉద్దేశపూర్వకంగా దాడికి పాల్పడినవారిని పట్టుకునేందుకు ప్రత్యేక బృందాలను రంగంలోకి దించారు. ఇలాంటి ఘటనలు ఇంతవరకు జరగలేదని స్థానికులు చెప్తున్నారు. ఇలాంటి దురుద్దేశపూర్వక దాడులకు కారణమైనవారిని కఠినంగా శిక్షించాలని వారు కోరుతున్నారు.

కాపు కాసి.. దాడి చేసి..

దేవరగట్టు మాల మల్లేశ్వరస్వామిని దక్కించుకునేందుకు లక్షలాది మంది కర్రలతో పోటీపడటం ఇక్కడ ఆనవాయితీ. ఇలాంటివి మానుకోవాలని పోలీసులు చాలా కాలంగా హెచ్చరిస్తున్నారు. ఈసారైనా అడ్డుకోవాలని వచ్చిన వేల మంది పోలీసులు.. మళ్లీ ప్రేక్షకుల్లానే మారిపోయారనే అపవాదు ఉన్నది. రెండు వేల మంది పోలీసులు, నిఘా కెమెరాలు, డ్రోన్లు, బారికేడ్లు, చెక్‌పోస్టులు దేవరగట్టు సమరాన్ని నిలువరించలేకపోవడం విశేషం. దాదాపు 12 గ్రామాల నుంచి వచ్చిన ప్రజలు కర్రలతో కొట్టుకున్నారు. ఇదే అదనుగా ప్రతీకారం తీర్చుకునేందుకు కాపుకాసిన ఓ బృందం.. తమ శత్రువల తలల నుంచి రక్తం కారేలా కొట్టింది. కావాలని కొడుతున్న తీరును గుర్తించిన కొందరు బాధితులు అనుమానంతో పోలీసులకు ఫిర్యాదు చేశారు. ఆ మేరకు పోలీసులు విచారణ జరపడంతో అసలు విషయాలు బయటపడ్డాయి.