Backyard gardening | పెరటి తోటల పెంపకం.. మెళకువలు

Backyard gardening | ప్రతీ ఒక్కరూ ఉదయం కూరగాయల కోసం మార్కెట్‌కు వెళ్తుంటారు. ఏ రోజుకారోజు తాజా కూరగాయల కోసం చాలా మంది పరితపిస్తుంటారు. కొన్ని మెళకువలను పాటించడం ద్వారా పెరటి తోటలను...

Backyard gardening | ప్రతీ ఒక్కరూ ఉదయం కూరగాయల కోసం మార్కెట్‌కు వెళ్తుంటారు. ఏ రోజుకారోజు తాజా కూరగాయల కోసం చాలా మంది పరితపిస్తుంటారు. ఎక్కడ తాజాగా దొరుకుతాయో ఎంత కష్టమైనా అక్కడికే వెళ్లి తెచ్చుకుంటుంటారు. అయితే, మన ఇంటి పెరట్లోనే కూరగాయలు, ఆకుకూరలను పండించుకుంటూ మనకు కావాల్సినవి మనం తాజాగా ఎంజాయ్‌ చేసుకోవచ్చు. కొన్ని మెళకువలను పాటించడం ద్వారా పెరటి తోటలను ఎక్కువ దిగుబడి వచ్చేలా చేసుకోవచ్చు.

ప్రస్తుతం పండ్లు, కూరగాయలు ధరలు ఆకాశాన్నంటుతున్నాయి. అలాంటప్పుడు తక్కువ ధరలో ఇంటి చుట్టు పక్కల పెరడులో గానీ, టెర్రస్‌పై గానీ పెంచుకోవచ్చు. రసాయనాలు లేనటువంటి తాజా రుచికరమైన కూరగాయలు, పండ్లను తక్కువ ఖర్చుతో పొందవచ్చు. పెరటి తోటల పెంపకంతో మనం ఆరోగ్యంగా ఉండటమే కాకుండా.. ఇంటి వారందరికి తీరిక వేళల్లో మొక్కల మధ్య పనిచేస్తూ ఆహ్లాదం పొందేందుకు వీలుంటుంది. చిన్న పిల్లలకు చక్కటి క్రమ శిక్షణ లభిస్తుంది.

పాటించాల్సిన నియమాలు

• ఇంటి పెరడును చెత్తా చెదారం లేకుండా శుభ్రం చేసుకోవాలి.
• ఎర్రమట్టి గానీ నల్లమట్టి గానీ 15-30 సెం.మీ. మందంగా వేయించాలి.
• నేలను మడులుగా తయారుచేసి మడుల మధ్య పారతో మెత్తగా తవ్వాలి.
• చ.మీ.కి 25:500:125 గ్రా. అమ్మోనియం సల్ఫేట్, సూపర్ ఫాస్పేట్, పొటాష్ ఎరువులను వేయాలి.
• యూరియా 2 లేదా 3 దఫాలుగా మొక్క ఎదుగుదల దశలో 50 గ్రా. చొప్పున వేయాలి.

గమనించాల్సిన అంశాలు

• కుటుంబ సభ్యులు ఇష్టపడి తినే వాటిని ముందుగా ఎంచుకోవాలి.
• నేల వాతావరణానికి అనుకూలమైనవి ఎంచుకోవాలి.
• తక్కువ స్థలంలో పెరిగే మొక్కలకు ప్రాధాన్యం ఇవ్వాలి.
• నీడనిచ్చే చెట్లను తోటకు అవతల పక్కన నాటుకోవాలి.
• ఎక్కువ పోషక విలువలు, రుచిని అందించే వాటిని నాటాలి.

నాటే సమయం

• ఒకే కాలంలో వేయాల్సిన, ఏక వార్షికాలైన మొక్కలను సమూహంగా ఒకే స్థలంలో వేరు వేరు మళ్ళల్లో వేయాలి.
• బహువార్షికాలైన మామిడి, మునగ వంటి వాటిని తోటలో మరోవైపు స్థలంలో నాటుకోవాలి.
• ఇతర మొక్కలపై నీడ పడకుండా చూసుకోవాలి.

మొక్కల మధ్య దూరం

• వరుసల మధ్య సరైన ఖాళీలు, మొక్కల పెరుగుదలకు, సాగునీటి సౌలభ్యం, స్థలం-సమర్థ
• వినియోగానికి వీలు కల్పించడం చాలా ముఖ్యం. సిఫార్సు చేయబడిన దూరంతో మొక్కలు నాటుకోవాలి.
• ఒకవేళ ఇంటి పెరడు స్థలం ఎక్కువగా ఉంటే ట్రాక్టర్ వంటివి నడిచేందుకు వీలుగా మడుల మధ్య దూరం ఉంచుకోవచ్చు.

అనువైన పంటలు

• పెరటి తోటల పెంపకానికి అనువైన ఏక వార్షిక కూరగాయల మొక్కలు టమాట, వంగ, బెండ
• తీగజాతి కూరగాయలైన బీర, కాకర, సొర, పొట్ల, దోసకాయ
• దుంపజాతి కూరగాయలైన క్యారెట్, ముల్లంగి, బీట్రూట్
• బహు వార్షికాలైన క్యాబేజి, కాలిఫ్లవర్
• శీతాకాలపు పంటలైన బరాణి, చిక్కుడు
• మొక్కల వరుసల మధ్య పాలకూర, తోటకూర, గోంగూరు, కొత్తిమీర, మెంతి వేసుకోవచ్చు.
• అరటి, నిమ్మ, బొప్పాయి, జామ, మామిడి మొక్కలను పెరడు సరిహద్దుల్లో పెంచుకోవాలి.
• టమాట, వంగ, క్యాబేజి, కాలిఫ్లవర్ వంటి కూరగాయలను మడుల్లో నారు పెంచి మొక్కలుగా నాటుకోవాలి.
• క్యారెట్, ముల్లంగి, చామగడ్డ, బీట్రూట్ వంటి వాటిని మళ్ళను గట్టుగా చేసి గట్లపై నాటుకోవాలి.
• రసం పీల్చే పురుగు ఆశించకుండా వేప కషాయాన్ని పిచికారీ చేయాలి.
• కలుపు మొక్కలను ఎప్పటికప్పుడు తీసి వేస్తుండాలి.
• ఎండాకాలంలో 2,3 రోజులకోకసారి, వానాకాలం, చలికాలంలో 5.6 రోజులకు ఒకసారి నీరు పారించాలి.
• వంట గదిలోని ఆహార వ్యర్థాలను కంపోస్టుగా చేసి ఎరువుగా వాడుకోవాలి.
• కంపోస్టు గుంతలను పెరటి తోటలో ఒక మూలకి ఏర్పాటు చేసుకోవాలి.
• ఈ గుంతలో ఆహార వ్యర్థాలు, తోటలోని ఆకుల చెత్త వేసి కప్పి ఉంచాలి.