చిత్రం సజీవం..

కాలంతో పాటే జ్ఞాపకం చెదిరిపోతుంది.. కానీ ఛాయాచిత్రంలో నిలిచిపోతుంది.. మనసు బాగాలేనప్పుడు ఫొటో ఆల్బమ్‌ను తిరిగేయండి చాలు. ఒక్కసారి మీ మూడ్‌ మారిపోతుంది. మధుర జ్ఞాపకాలు మీ ముందు కదలాడుతాయి.

• నేడు ప్రపంచ ఫొటోగ్రఫీ దినోత్సవం

కెరమెరి/ఆదిలాబాద్‌ ఫొటోగ్రాఫర్‌, ఆగస్టు 18 : కాలంతో పాటే జ్ఞాపకం చెదిరిపోతుంది.. కానీ ఛాయాచిత్రంలో నిలిచిపోతుంది.. మనసు బాగాలేనప్పుడు ఫొటో ఆల్బమ్‌ను తిరిగేయండి చాలు. ఒక్కసారి మీ మూడ్‌ మారిపోతుంది. మధుర జ్ఞాపకాలు మీ ముందు కదలాడుతాయి. ఒక్కో ఫొటో ఒక్కో అనుభూతినిస్తుంది. నవ్వులు పూయిస్తుంది. మన అనుకున్న వాళ్లను గుర్తుకు తెచ్చి ఆనందంతో పాటు కన్నీళ్లూ తెప్పిస్తుంది. ఇక ప్రకృతి రమణీయ దృశ్యం కూడా ఆహ్లాదం పంచుతుంది. నేడు ప్రపంచ ఫొటోగ్రఫీ సందర్భంగా జీవన, ప్రకృతి రమణీయ ఛాయాచిత్రాలు మీ కోసం..

ఒక్క సిరా చుక్క లక్ష మెదళ్లకు కదలిక. ఒక్క ఛాయాచిత్రం కోటి భావాలకు ప్రతీక. కోట్లాది పదాల్లో, లక్షలాది పంక్తుల్లో, వేలాది పేజీల్లో వర్ణించినా కలగని అనుభూతి ఒక్క ఫొటోతో కలుగుతుంది. అక్షరం, శబ్ధం కన్నా దృశ్యం అత్యంత శక్తివంతమైంది. కరుణ, భక్తి, హాస్య, రౌద్ర, శాంత, బీభత్స, భయానక, శృంగార, వీర రసాలకు అద్దం పట్టేదే చిత్రం. ఆధునిక యుగంలో అవనిపై విరిసిన ఇంద్రధనస్సే ఫొటో! కాలానికి కళ్లెం వేసి, దృశ్యాన్ని సజీవం చేసే ఫొటోగ్రఫీకి వందల ఏళ్ల చరిత్ర ఉంది.

• ఫొటో అంటే కాంతి, గ్రఫీ అంటే రాత. ఫొటోగ్రఫీ అంటే కాంతితో రాయడం.
• 1820లో ఫ్రెంచి శాస్త్రవేత్త నీస్‌ఫోర్‌, ఫొటో తీసే పరికరాన్ని కనిపెట్టి, తొలి ఫొటో తీసినా ఒడిసిపట్టలేకపోయాడు.
• ఫొటోగ్రఫీకి ఆద్యుడిగా భావించే, ఫ్రాన్స్‌ దేశానికి చెందిన ఎల్‌.జే. డాగురే 1826 నుంచి దృశ్యాన్ని బంధించేందుకు ఎడతెరిపి లేకుండా శ్రమించాడు. చివరకు 1839 ఆగస్టు 18న సిల్వర్‌ ఆయోడైడ్‌ విధానం ద్వారా దృశ్యాన్ని బంధించాడు. ఈ విషయాన్ని ఆగస్టు 19న ప్రకటించడంతో ఆ రోజును ప్రపంచ ఫొటోగ్రఫీ దినోత్సవంగా జరుపుకుంటున్నారు.
• ఫ్రాన్స్‌లో పురుడుపోసుకున్న ఫొటోగ్రఫీ అదే ఏడాది ఇంగ్లాండుకు చేరుకుంది. అప్పట్లో ఇంగ్లాండుకు వలస రాజ్యాంగా ఉన్న భారతదేశానికి సైతం ఫొటోగ్రఫీని పరిచయం చేశారు పాశ్చాత్యులు.
• 1842-80 మధ్య కాలంలో భారతదేశంలో ఫొటోగ్రఫీ వికాసం చెందింది. ఈస్ట్‌ ఇండియా కంపెనీ నేతృత్వంలో ముంబైకి చెందిన ఎల్‌పీ స్టోన్‌ ఇన్‌స్టిట్యూట్‌ పేరుతో ఫొటోగ్రఫీ శిక్షణ సంస్థ ఏర్పడింది.
• భారతదేశంలో తొలి కమర్షియల్‌ ఫొటోగ్రాఫర్‌ ఎఫ్‌.శార్రన్‌ కోపర్‌. ఆయన 1849లో కలకత్తా నగరం కేవైడి వీధిలో కెలోటైప్‌ స్టూడియో ప్రారంభించాడు. l 1860ల్లో మొదలైన ఫొటోగ్రఫీ ప్రస్థానం, 80 ఏళ్ల కాలంలో ఎన్నో కొత్తపుంతలు తొక్కింది.
• 1889లో జార్జి ఈస్ట్‌మన్‌ కొడాక్‌ బాక్స్‌ కెమెరాను కనిపెట్టారు.
• 1935లో కలర్‌ ఫొటోగ్రఫీ ప్రారంభమైంది.
•  1972లో స్టేట్‌ ఫొటోగ్రఫీ అకాడమీగా రూపుదాల్చింది.
• 1940లో కరీంనగర్‌లో మొదటి ఫొటోస్టూడియో నెలకొల్పారు.
• 1980 నుంచి ఫొటోగ్రఫీలో కంప్యూటర్‌ యుగం మొదలైంది.
• సాధారణ ఛాయాచిత్రాలతో పాటు సృజనాత్మక, సామాజిక రుగ్మతలు, సంస్కృతీసంప్రదాయాలు, యుద్ధాలు, నవరసాలకు అద్దం పట్టే చిత్రాలను బంధించే ప్రక్రియ షురువైంది. ఇది క్రమేణా పిక్టోరియలిజమ్‌ ప్రకియకు దారి తీసింది.