పైన మెరుగు.. లోన మురుగు.. కంపుకొడుతున్న నిర్మల్‌ కలెక్టరేట్‌ కార్యాలయం

నిర్మల్‌ జిల్లా సమీకృత కార్యాలయ భవన సముదాయం కంపు కొడుతున్నది. బీఆర్‌ఎస్‌ హయాంలో కోట్లాది రూపాయలు వెచ్చించి జీ ప్లస్‌ టూ విధానంలో అన్ని హంగులతో సర్వాంగ సుందరంగా నిర్మించిన భవనాలు నిర్వహణ లేక దుర్గంధం వెదజల్లుతున్నది.

• నిర్వహణ లేక దుర్గంద భరితంగా మరుగుదొడ్లు
• కోతులు, పాములతో ఉద్యోగుల సహవాసం
• అస్తవ్యస్తంగా పార్కింగ్‌
• కార్యాలయ కారిడార్లలో అపరిశుభ్రత
• సాధారణ ప్రజలకు తప్పని నీటి తిప్పలు
• పట్టించుకోని ఉన్నతాధికారులు

నిర్మల్‌, అక్టోబర్‌ 4(నమస్తే తెలంగాణ) : నిర్మల్‌ జిల్లా సమీకృత కార్యాలయ భవన సముదాయం కంపు కొడుతున్నది. బీఆర్‌ఎస్‌ హయాంలో కోట్లాది రూపాయలు వెచ్చించి జీ ప్లస్‌ టూ విధానంలో అన్ని హంగులతో సర్వాంగ సుందరంగా నిర్మించిన భవనాలు నిర్వహణ లేక దుర్గంధం వెదజల్లుతున్నది. కాంగ్రెస్‌ ప్రభుత్వం నిధుల కొరతతో నిర్వహణ సక్రమంగా చేయించలేక పోతున్నది. దీంతో కార్యాలయ ఉద్యోగులతోపాటు వివిధ పనుల నిమిత్తం వచ్చే సాధారణ ప్రజలు అవస్థలు పడుతున్నారు. నిర్మల్‌ కలెక్టరేట్‌ సముదాయంలో దాదాపు 57 శాఖల కార్యాలయాలు ఉండగా.. దాదాపు 1,000 మందికి పైగా ఉద్యోగులు పని చేస్తున్నారు. మొత్తానికి కలెక్టరేట్‌ సముదాయ భవనం రెండేళ్లలోనే ‘పైన మెరుగు.. లోపల మురుగు’ అన్న చందంగా మారిందని విమర్శలు వ్యక్తం అవుతున్నాయి. కలెక్టరేట్‌లో సమస్యలను పరిశీలిస్తే..

• జిల్లా కేంద్రానికి కలెక్టరేట్‌ దూరంగా ఉండడంతో ఉద్యోగులు మధ్యాహ్న భోజన సమయంలో ఇంటికి వెళ్లరు. లంచ్‌బాక్స్‌ తెచ్చుకొని ఇక్కడే భోజనం చేస్తుంటారు. దీంతో ఉద్యోగులు, సిబ్బంది ఉదయం నుంచి సాయంత్రం వరకు ఇక్కడే ఉంటారు. ప్రతి అంతస్తులో సాధారణ ప్రజలు, ఉద్యోగులకు వేర్వేరుగా టాయిలెట్‌ బ్లాకులు నిర్మించారు. భవనం నిర్మించిన నాటి నుంచి టాయిలెట్లను సక్రమంగా శుభ్రం చేయించకపోవడంతో దుర్గంధం వెదజల్లుతున్నది. గ్రౌండ్‌ ఫ్లోర్‌లో గల టాయిలెట్లలో కోతులతోపాటు పాములు, అన్ని ఫ్లోర్స్‌లో కోతులు తిష్ట వేస్తున్నాయి. నూతనంగా నిర్మించిన కలెక్టరేట్‌లో ఇలాంటి దుస్తితి ఉండడానికి ఉన్నతాధికారుల పర్యవేక్షణ లోపమే కారణమన్న విమర్శలు వ్యక్తమవుతున్నాయి.
• కార్యాలయాలతోపాటు కారిడార్లు, మెట్లను శానిటేషన్‌ సిబ్బం ది క్లీనింగ్‌ చేయకపోవడంతో అపరిశుభ్రంగా దర్శనమిస్తున్నా యి. కనీసం బూజు దులిపే దుస్థితి లేదని ఉద్యోగులు మండిపడుతున్నారు. కార్యాలయ నిర్వహణకు శానిటేషన్‌ వ్యవస్థ లేకపోవడంతో రోజువారి చెల్లింపులతో తొమ్మిది మందిని తాత్కాలిక ప్రాతిపదికన నియమించినట్లు సమాచారం. వాస్తవానికి 30 మందికి పైగా సిబ్బంది అవసరమని అధికారులు చెబుతున్నారు. నిధుల లేమితో కేవలం తొమ్మిది మందితో పని కానిచ్చేస్తున్నామని ఓ అధికారి తెలిపారు. మొదటి, రెండవ అంతస్తుల్లోని టాయిలెట్ల నుండి అవుట్‌లైన్‌ శానిటరీ పైపుల నుండి నీరు లీకవుతుండటంతో కింది అంతస్తుల్లోని పీఓపీ షీట్లు తడిసి దుర్గందం వ్యాపిస్తున్నది. l కార్యాలయాలకు వచ్చే ప్రజలకు కనీసం తాగునీటి సదుపాయాన్ని కూడా కల్పించకపోవడంపై తీవ్ర విమర్శలు వ్యక్తమవుతున్నాయి.
• కలెక్టరేట్‌ ప్రాంగణంలోని రెండో అంతస్తులో కోతులు గుంపులు గుంపులుగా సంచరిస్తూ ఉద్యోగులను భయభ్రాంతులకు గురి చేస్తున్నాయి. మెట్ల ద్వారా పైఅంతస్తులకు వెళ్లే ఉద్యోగులపై కోతుల దాడులు చేసిన ఘటనలు ఉన్నాయి.
• మూడు నెలలుగా కార్యాలయ లిఫ్టులు పనిచేయకపోవడంతో ఉద్యోగులకు ఇబ్బందులు తప్పడం లేదు. ముఖ్యంగా వివిధ పనుల కోసం కార్యాలయాలకు వచ్చే దివ్యాంగులు మెట్ల మార్గం ద్వారా మొదటి, రెండో అంతస్తుకు చేరుకోవడానికి అవస్థలు పడుతున్నారు. ఉద్యోగులు మోకాళ్ల నొప్పుల కారణంగా పైఅంతస్తుకు వెళ్తేందుకు ఇబ్బందులకు గురవుతున్నారు.

• కలెక్టరేట్‌లో రోజూ కార్యాలయానికి వచ్చే వందలాది వా హనాలు నిలిపేందుకు కనీసం షెడ్లు ఏర్పాటు చేయలేదు. దీంతో ఎండకు ఎండి, వానకు తడిసి తమ వాహనాలు చె డిపోతున్నాయని ఉద్యోగులు వాపోతున్నారు. కార్ల కోసం ప్రత్యేకంగా షెడ్లు ఏర్పాటు చేయాలని ఉద్యోగులు డిమాం డ్‌ చేస్తున్నారు. ఉన్నతాధికారులు స్పందించి సమస్యల పరిష్కారానికి చర్యలు తీసుకోవాలని కోరుతున్నారు.

సమస్యలు ఉన్న మాట వాస్తవమే.. సూర్యారావు, కలెక్టరేట్‌ ఏవో

కలెక్టరేట్‌ సముదాయంలో పారిశుధ్య నిర్వహణకు సిబ్బంది కొరత ఉంది. వాస్తవానికి 30 మంది సిబ్బందికి తొమ్మిది మంది ఉన్నారు. శానిటేషన్‌ కాంట్రాక్టు వ్యవస్థ లేకపోవడం వల్ల కొంత ఇబ్బందిగా ఉంది. రెండు మూడు నెలలుగా కార్యాలయంలోని లిఫ్టులు పనిచేయని మాట వాస్తవమే. లిఫ్టులకు యేటా మేయింటెనెన్స్‌ కోసం రూ.3 లక్షలకు పైగా చెల్లించాలి. నిధుల కొరత కారణంగా చేయించలేకపోతున్నాం. సందర్శకుల కోసం తాగునీరు అందుబాటులో ఉండేలా చూస్తాం.