Visit:
ఆదిలాబాద్‌, నవంబర్‌ 29(నమస్తే తెలంగాణ) : మాజీ ముఖ్యమంత్రి, ఉద్యమ నాయకుడు కేసీఆర్‌ చేపట్టిన దీక్షా దివస్‌తోనే తెలంగాణ రాష్ట్రం సిద్ధించిందని మాజీ మంత్రి, బీఆర్‌ఎస్‌ పార్టీ ఆదిలాబాద్‌ జిల్లా అధ్యక్షుడు జోగు రామన్న అన్నారు. ఆదిలాబాద్‌ జిల్లా బీఆర్‌ఎస్‌ పార్టీ కార్యాలయంలో నిర్వహించిన దీక్షా దివస్‌లో ఆయన మాట్లాడారు. బీఆర్‌ఎస్‌ నాయకులు, కార్యకర్తలు ఉద్యమ జ్ఞాపకాలను గుర్తు చేసుకుంటూ.. కాంగ్రెస్‌ ప్రభుత్వ వైఫల్యాలు ఎండగట్టాలని కోరారు. ప్రత్యేక రాష్ట్రం ఏర్పడిన తర్వాత మాజీ ముఖ్యమంత్రి కేసీఆర్‌ దేశంలో ఎక్కడా లేని విధంగా అభివృద్ధి, సంక్షేమ పథకాలు అమలు చేసి తెలంగాణను అగ్రస్థానంలో నిలుపారన్నారు. పదేండ్ల బీఆర్‌ఎస్‌ పాలనలో ప్రజలు సంతోషంగా ఉన్నారని, రెండేళ్ల కాంగ్రెస్‌ పాలనలో ఇబ్బందులు పడుతున్నారని తెలిపారు.
బోథ్‌ ఎమ్మెల్యే అనిల్‌ జాదవ్‌ మాట్లాడుతూ.. తాను 2001లో డిగ్రీ విద్యార్థిగా కేసీఆర్‌ నిర్వహించిన జెండా కార్యక్రమంలో పాల్గొన్నట్లు తెలిపారు. ఉద్యమ నాయకుడు కేసీఆర్‌ తెలంగాణ రాష్ట్ర సాధనే లక్ష్యంగా ‘కేసీఆర్‌ సచ్చుడో.. తెలంగాణ వచ్చుడో..’ అన్న నినాదంలో ముందుకు సాగారన్నారు. మాజీ ముఖ్యమంత్రి కేసీఆర్‌ పెట్టిన దీక్ష కారణంగానే బీజేపీ, కాంగ్రెస్‌ పార్టీల నాయకులు పదవులు అనుభవిస్తున్నారన్నారు.
తెలంగాణ తల్లి విగ్రహానికి పూలమాలలు వేసి నివాళులర్పించారు. అనంతరం కేసీఆర్‌ దీక్షా దివస్‌ ఫొటో గ్యాలరీని నాయకులు సందర్శించారు. ఈ కార్యక్రమంలో బీఆర్‌ఎస్‌ నాయకులు యూనిస్‌ అక్బానీ, మనోహర్‌, సాజిదొద్దీన్‌, మొట్టు ప్రహ్లాద్‌, కిరణ్‌ పాల్గొన్నారు.
