అడవిల్లో బతుకే పోరాటం

ఉమ్మడి ఆదిలాబాద్‌ జిల్లా అడవుల్లో నిశ బ్ద బతుకుపోరాటం సాగుతున్నది. పుట్టింది మొద లు గిట్టే వరకూ అడవి తల్లినే నమ్ముకుని హాయిగా బతుకుతున్న ఆదివాసులు ఇప్పు డు బెంబేలెత్తిపోతున్నారు.

• పులుల సంఖ్య పెరగడంతో ఆదివాసుల అవస్థలు
• పశువులపై పెరుగుతున్న దాడులతో అయోమయం
• అడవిని వదల్లేక.. ఎంత కష్టమొచ్చినా భరిస్తూ..
• ఇప్పటికైనా అధికారులు నిర్లక్ష్యం వీడితే మంచిది..

మంచిర్యాల ప్రతినిధి/కుమ్రం భీం ఆసిఫాబాద్‌(నమస్తే తెలంగాణ), జనవరి 18 : ఉమ్మడి ఆదిలాబాద్‌ జిల్లా అడవుల్లో నిశ బ్ద బతుకుపోరాటం సాగుతున్నది. పుట్టింది మొద లు గిట్టే వరకూ అడవి తల్లినే నమ్ముకుని హాయిగా బతుకుతున్న ఆదివాసులు ఇప్పు డు బెంబేలెత్తిపోతున్నారు. కుమ్రం భీం ఆసిఫాబాద్‌ జిల్లా కాగజ్‌నగర్‌ కారిడార్‌లో పదేళ్లుగా పులుల సంతతి బాగా పెరిగింది. ఒకప్పుడు ఒకటీ రెండు పులులు మహారాష్ట్ర, ఇంద్రావతి, ప్రాణహిత, తడో బా నుంచి మన అడవుల్లోకి వచ్చి వెళ్లేవి. కా నీ.. ఇటీవల కాగజ్‌నగర్‌ ఫారెస్ట్‌ పులుల ఆవాసంగా మారింది.

ఇక్కడే స్థిర నివాసం ఏర్పర్చుకున్నాయి. ఈ క్రమంలోనే గడిచిన మూడేళ్లలో ఆదివాసులు, పశువులపై పులుల దాడులు పెరిగాయి. ముగ్గురు ఆదివాసులు చనిపోగా.. వందలాది పశువులు పులుల ఆకలికి బలైపోయాయి. ప్రపంచానికి దూరంగా అడవుల్లో ఉంటున్న ఆదివాసులు.. ఇప్పుడు బతుకు పోరాటం చేయాల్సి వస్తున్నది. అధికారుల నిర్లక్ష్యం, ఆదివాసులు అంటే చిన్నచూపుతో పులులపై దాడులు చేసే వరకు వె ళ్లిందనడంలో సందేహం లేదు. తాజాగా కాగజ్‌నగర్‌ డివిజన్‌లో విషప్రయోగం చేసి పులులను హతమార్చడం ఉదాహరణగా నిలుస్తున్నది.

ప్రతి దాడులకు కారణం అదేనా..

పులి దాడిలో మనుషులు చనిపోతే రూ.5 లక్షలు.. పశువులు(ఆవులు, ఎడ్లు) చనిపోతే రూ.5 వేల నుంచి రూ.15 వేల వరకు నష్టపరిహారం చెల్లించి అధికారులు చేతులు దులుపుకుంటున్నారు. పులులు చనిపోతే స్పందిస్తున్న జాతీయస్థాయి స్వచ్ఛంద సంస్థలు, ఉన్నతాధికారులు.. అదే పులుల దాడుల్లో ఆదివాసులు, పశువులు చనిపోయినప్పుడు పట్టించుకోవడం లేదు.

న్యాయం చేయాల్సిన అధికారులు ఇబ్బందులకు గురిచేసినపుడు ఆదివాసుల్లో నైరాశ్యం పెరిగి పులులపై ప్రతి దాడి చేసే వరకు వెళ్తున్నారు. రెండు పులుల మృతి వెనుక ఉన్న కారణం ఇదే కావడం గమనార్హం. పశువును పులి చంపిందన్న కోపంతో విషప్రయోగం చేసినట్లు నిందితులు విచారణలో చెప్పడం కలకలం రేపింది. కానీ.. అధికారులు ఎప్పటి మాదిరిగానే ముగ్గురిపై సస్పెన్షన్‌ వేటు వేసి చేతులు దులుపుకోవడం నిర్లక్ష్యానికి అద్దం పడుతున్నది.

ఇవీ ఘటనలు.. అధికారుల దగ్గర లేని లెక్కలు..

• అడవుల్లో పెరిగిన పులుల సంతతితో ఆదివాసుల జీవనం కష్టంగా మారింది. మేత కోసం అడవులకు వెళ్లిన పశువుల మీద పులులు దాడులు చేసిన సంఘటనలు కోకొల్లుగా ఉన్నాయి. వారంలో కనీసం రెండు పశువులు మృతి చెందుతున్నాయి.
• నవంబర్‌ 11, 2020న దహెగాం మండలంలోని దిగిడ గ్రామానికి చెందిన విఘ్నేష్‌పై పులి దాడి చేసి చంపింది.
• నవంబర్‌ 29, 2020న పెంచికల్‌పేట్‌ మండలంలోని కొండపల్లి గ్రామానికి చెందిన నిర్మలపై పులి దాడి చేసి పొట్టన పెట్టుకున్నది.
• 2022 నవంబర్‌లోనూ ఒక రైతును పులి బలిగొంది.
• 2024 జనవరిలో కూడా పశువుల మందతోపాటు పశువుల కాపరిపైనా పులి దాడి చేసింది. అదృష్టవశాత్తు ఆయనకు ఏం కాలేదు.
• 2021 సంవత్సరంలోనే దాదాపు 122 పశువులు చనిపోయాయి.
• గడిచిన నాలుగేళ్లలో పులి దాడిలో చనిపోయిన, గాయపడిన పశువుల సంఖ్య వందల్లోనే ఉంటుంది. కానీ.. ఆ వివరాలు అధికారుల దగ్గర లేకపోవడం గమనార్హం.
• ఇప్పటి వరకు 70 నుంచి 80 పశువులకు మాత్రమే రూ.12 లక్షల నష్ట పరిహారం అందించారు. ముగ్గురు చనిపోగా వారి కుటుంబాలకు రూ.5 లక్షల చొప్పున రూ.15 లక్షలు ఇచ్చారు.
• పులుల దాడుల్లో చనిపోయిన మేకలు, గొర్రెలకు పరిహారం ఇవ్వడం లేదు.
• అదే పక్కనున్న మహారాష్ట్రలో పులుల దాడుల్లో మనషులు చనిపోతే రూ.15 లక్షల పరిహారం ఇస్తున్నారు.

ఏం చేస్తే బాగుంటుంది..

• అడవుల్లో పులులతోపాటు ఆదివాసుల రక్షణకు కూడా సమప్రాధాన్యం ఇవ్వాల్సిన అవసరం ఉంది.
• పులులు ఆహారంగా తీసుకునే వన్యప్రాణుల సంతతిని పెంచాలి. గడ్డి మైదానాలను కూడా అభివృద్ధి చేయాలి. మౌలిక సదుపాయాలు కల్పించాలి. ఫలితంగా పాడి పశువులపై దాడి చేయకుండా ఉంటాయి.
• నిర్మల్‌ జిల్లాలోని జన్నారం మండల పరిధిలో గల అడవుల్లోని గూడేలు, తండాలు, గ్రామాలను మైదాన ప్రాంతాలకు తరలించేందుకు అధికారులు చర్యలు తీసుకుంటున్నారు. అలాంటి ప్రత్యామ్నాయ చర్యలను కాగజ్‌నగర్‌, ఆసిఫాబాద్‌, సిర్పూర్‌ డివిజన్‌లలో కనిపించడం లేదు.
• అధికారులు తీరు మార్చుకోకపోతే పులుల మనుగడ ప్రశ్నార్థకంగా మారే ప్రమాదం ఉందనే అభిప్రాయం వ్యక్తమవుతున్నది.
• ఆదివాసులు కూడా పులులు దాడి చేసినప్పుడు క్షణికావేశానికి గురికాకుండా, న్యాయమైన పద్ధతిలో పరిహారం కోసం సంప్రదించాలని సూచిస్తున్నారు.
• త్వరలో మహారాష్ట్ర అటవీశాఖ అధికారులతో సమావేశమై పులుల రక్షణకు అక్కడ తీసుకుంటున్న చర్యలు, మనం అనుసరించాల్సిన వ్యూహాలపై చర్చించనున్నట్లు అధికారులు చెప్తున్నారు. అవి ఎంత వరకు కార్యరూపం దాలుస్తాయనేది వేచిచూడాలి.