జనసంద్రమైన సీఎం కేసీఆర్‌ మంచిర్యాల ప్రగతి నివేదన సభ

ముఖ్యమంత్రి కల్వకుంట్ల చంద్రశేఖర్‌రావు శుక్రవారం మంచిర్యాల జిల్లా పర్యటనకు రాగా, తరలివచ్చిన బీఆర్‌ఎస్‌ శ్రేణులతో పాటు ప్రజలతో జనసునామీని తలపించింది. వివిధ ప్రాంతాల నుంచి లక్షలాదిగా తరలిరాగా, జిల్లా కేంద్రం కిక్కిరిసిపోయింది.

• అట్టహాసంగా సమీకృత కలెక్టరేట్‌కు ముఖ్యమంత్రి ప్రారంభోత్సవం
• చెన్నూర్‌, పర్ధాన్‌పల్లి లిఫ్ట్‌ ఇరిగేషన్స్‌, మెడికల్‌ కాలేజీ, ఆయిల్‌ పామ్‌ ఫ్యాక్టరీకి శంకుస్థాపన
• నస్పూర్‌లో బీఆర్‌ఎస్‌ కార్యాలయం ప్రారంభం
• మండుటెండను సైతం లెక్క చేయకుండా తరలివచ్చిన అశేష‘జన’ వాహిని
• సీఎం కేసీఆర్‌ ప్రసంగానికి జేజేలు
• జయజయధ్వానాలతో మారుమోగిన సభా ప్రాంగణం
• సాయంత్రం చిరుజల్లులతో పలకరించిన వరుణుడు.. పులకరించిన జనం

ప్రగతి ప్రదాత, ముఖ్యమంత్రి కేసీఆర్‌ ప్రగతి నివేదన సభ జనసునామీని తలపించింది. అధినేత మంచిర్యాల పర్యటనకు శుక్రవారం ఇసుకేస్తే రాలనంతగా ప్రజానీకం తరలివచ్చింది. జిల్లాకేంద్రంలో సమీకృత కలెక్టరేట్‌, బీఆర్‌ఎస్‌ జిల్లా ఆఫీస్‌ ప్రారంభోత్సవం, చెన్నూర్‌, పర్ధాన్‌పల్లి లిఫ్ట్‌ ఇరిగేషన్స్‌, మెడికల్‌ కాలేజీ, ఆయిల్‌ పామ్‌ ఫ్యాక్టరీ, మంచిర్యాల-అంతర్గాం బ్రిడ్జి నిర్మాణాలకు సీఎం శంకుస్థాపన చేయగా, అడుగడుగునా నీరాజనం పలికింది. అనంతరం నస్పూర్‌లో 30 ఎకరాల సువిశాల ప్రాంగణంలో ఏర్పాటు చేసిన సభకు మండుటెండను సైతం లెక్క చేయకుండా అశేషంగా పోటెత్తింది. సాయంత్రం దాకా ఓపికగా ఉండి, ఆద్యంతం ఆసక్తిగా సాగిన కేసీఆర్‌ ప్రసంగానికి జేజేలు పలికింది. దశాబ్ది ఉత్సవాల్లో భాగంగా దివ్యాంగులకు పింఛన్‌ రూ.4,016కు పెంచుతున్నట్లు ప్రకటించడంతో హర్షధ్వానాలతో స్వాగతించింది. ‘ధరణి ఉండాల్నా..? తీసేయాల్నా..? ధరణి ఉండాలంటే లేచి నిలబడండి’ అని కేసీఆర్‌ కోరడంతో సభికులందరూ లేచి నిలబడి మద్దతు తెలిపారు. అప్పటిదాకా మండిపోయిన వాతావరణం ఒక్కసారిగా మబ్బులు కమ్ముకొని చిరుజల్లులు పలకరించడంతో పులకరించిపోయారు.

– మంచిర్యాల, జూన్‌ 9 (నమస్తే తెలంగాణ ప్రతినిధి)

ముఖ్యమంత్రి కల్వకుంట్ల చంద్రశేఖర్‌రావు శుక్రవారం మంచిర్యాల జిల్లా పర్యటనకు రాగా, తరలివచ్చిన బీఆర్‌ఎస్‌ శ్రేణులతో పాటు ప్రజలతో జనసునామీని తలపించింది. వివిధ ప్రాంతాల నుంచి లక్షలాదిగా తరలిరాగా, జిల్లా కేంద్రం కిక్కిరిసిపోయింది. నస్పూర్‌ శివారులో ముఖ్యమంత్రి బహిరంగ సభ సాయంత్రం ఉండగా, మధ్యాహ్నం 3 గంటల నుంచే ప్రజల రాక మొదలైంది. సీఎం వచ్చే సమయానికి ఇసుకేస్తే రాలనంత మందితో ప్రభం‘జనం’ తలపించింది. సీఎం కేసీఆర్‌ సమీకృత కలెక్టరేట్‌, బీఆర్‌ఎస్‌ పార్టీ కార్యాలయాలను పండుగ వాతావరణంలో ప్రారంభించారు.

చెన్నూర్‌ నియోజకవర్గంలో 90 వేల ఎకరాలకు సాగునీరు అందించేందుకు రూ.1658కోట్లతో నిర్మించనున్న చెన్నూర్‌ ఎత్తిపోతల పథకం పనులకు సీఎం శిలాఫలకాన్ని ఆవిష్కరించారు. మంచిర్యాల నియోజకవర్గంలో రూ.83 కోట్లతో 10 వేల ఎకరాలకు సాగునీరందించే పర్ధాన్‌పల్లి ఎత్తిపోతల పథకానికి సైతం శంకుస్థాపన చేశారు. రూ.510 కోట్లతో మెడికల్‌ కాలేజీ, 300 పడకల అనుబంధ వైద్యశాల నిర్మాణానికి శంకుస్థాపన చేశారు. రూ.164 కోట్లతో మంచిర్యాల-అంతర్గాం బ్రిడ్జి పనులకు కొత్త కలెక్టరేట్‌ ప్రాంగణం నుంచే శంకుస్థాపన చేశారు. మందమర్రి శివారులో రూ.500 కోట్లతో నిర్మించతలపెట్టిన ఆయిల్‌పామ్‌ ఫ్యాక్టరీ పనులను ప్రారంభించారు. రాష్ట్ర వ్యాప్తంగా, కుల వృత్తులకు రూ.లక్ష, రెండో విడుత గొర్రెల పథకం, ఇండ్ల పట్టాల పంపిణీ కార్యక్రమాన్ని లాంఛనంగా ప్రారంభించారు. సీఎం ప్రసంగిస్తున్నంత సేపు ఆద్యంతం జనం ఈలలు, చప్పట్లు, కేరింతలతో హోరెత్తించారు.

– మంచిర్యాల, జూన్‌ 9 (నమస్తే తెలంగాణ ప్రతినిధి)

సీఎం సభ సైడ్‌లైట్స్‌

• మంచిర్యాల అర్బన్‌, జూన్‌ 9 : ముఖ్యమంత్రి కేసీఆర్‌ మంచిర్యాల జిల్లాలో శుక్రవారం పర్యటించారు. ఆయన వివిధ అభివృద్ధి పనుల ప్రారంభోత్సవం, శంకుస్థాపనలు చేశారు.
• సాయంత్రం 5.15 గంటలకు సీఎం కేసీఆర్‌ మంచిర్యాల చేరుకున్నారు.
• 5.25: బీఆర్‌ఎస్‌ మంచిర్యాల జిల్లా పార్టీ కార్యాలయానికి చేరుకొని పార్టీ పతాకాన్ని ఆవిష్కరించారు
• 5.28 : మంచిర్యాల జిల్లా పార్టీ కార్యాలయ శిలాఫలకాన్ని ఆవిష్కరించారు
• 5.30: మంచిర్యాల జిల్లా బీఆర్‌ఎస్‌ పార్టీ కార్యాలయాన్ని ప్రారంభించారు.
• 5.32 : బీఆర్‌ఎస్‌ పార్టీ కార్యాలయంలో జిల్లా అధ్యక్షుడి కుర్చీలో బాల్క సుమన్‌ను కూర్చోబెట్టారు సీఎం కేసీఆర్‌
• 5:35 : బస్సులో జిల్లా కలెక్టర్‌ కార్యాలయ ప్రారంభోత్సవానికి బయలుదేరిన కేసీఆర్‌
• 5:35: కలెక్టరేట్‌ ఆవరణలో పోలీసుల గౌరవ వందనం స్వీకరణ
• 5.40: పూర్ణకుంభంతో స్వాగతం పలికిన అర్చకులు
• 5.40: మంచిర్యాల నుంచి కరీంనగర్‌కు బయలుదేరిన హెలీకాప్టర్‌
• 5.43: కలెక్టరేట్‌ ఎదుట గుమ్మడికాయ కొట్టిన మంత్రి వేముల ప్రశాంత్‌ రెడ్డి
• 5.45: సమీకృత కలెక్టరేట్‌ కార్యాలయ రిబ్బన్‌ కట్‌ చేసిన సీఎం
• 5.54: కలెక్టర్‌ బదావత్‌ సంతోష్‌ను కుర్చీలో కూర్చోబెట్టిన సీఎం
• 5.59: కలెక్టర్‌ ఛాంబర్‌లో పూర్తయిన సర్వమత ప్రార్థనలు
• 6.02: అన్ని మతాల ప్రార్థకులతో ఫొటో దిగిన సీఎం
• 6.10 : సీఎం కేసీఆర్‌కు దట్టి కట్టిన ముస్లింలు
• 7.12: సభా ప్రాంగణానికి బస్సులో రాక
• 7.13: స్టేజీ మీదకు చేరిన సీఎం
• 7.14: సభా వేదికపైన మూడు సార్లు ప్రజలకు అభివాదం
• 7.15: ప్రసంగం మొదలుపెట్టిన సీఎం కేసీఆర్‌
• 7.50: ముగిసిన ప్రసంగం
• ఇండ్ల పట్టాల పంపిణీ, దివ్యాంగుల పింఛన్‌ వెయ్యి రూపాయలు పెంచినట్లు ప్రకటించడంతో చప్పట్ల వర్షం కురిసింది.
• కాంగ్రెస్‌, బీజేపీల తీరును వివరిస్తూ చోటా మియాతో బడామియా, బడా మియాతో సుభానల్లా అనగానే ప్రజలు విజిల్స్‌ వేశారు.
• పదవిలోకి వస్తే ధరణిని తీసి బంగాళాఖాతంలో వేస్తామన్న వారిని గిరా గిరా తింపి బంగాళాఖాతంలో వేయాలని, అధికారుల సీట్ల చుట్టు, సేట్ల చుట్టూ తిరిగేటట్టు చేయాలనుకునే వారిని బంగాళాఖాతంలో కలుపాలన్నారు.
• పట్టుబట్టి, జట్టుకట్టి గోదావరిని సజీవ నదిగా మార్చాలనడంతో ప్రజలు ఆనందంతో చప్పట్లు కొట్టారు.
• సీటీలు కొట్టుడు బంద్‌ చేయాలే, ఆఖరుకు అందరం కలిసి గట్టిగ కొడుదాం.. నేను ఇక్కడ మాట్లాడుతుంటే నువ్వు అక్కడ సీటీలు కొడితే ప్రజలకు ఎట్లా వినపడుతది అనగానే ప్రజలంతా మరోసారి విజిల్స్‌, చప్పట్లు కొట్టారు.
• రానున్న దసరాకు సింగరేణి కార్మికులకు రూ. 700 కోట్ల బోనస్‌ ఇస్తామని ప్రకటించడంతో కార్మికుల చప్పట్లతో సభాస్థలి మార్మోగింది.
• రైతుబంధు డబ్బులు హైదరాబాద్‌ నుంచి ఆరు నెలలకు టంఛన్‌గా వేస్తుంటే ఆ డబ్బులు పడ్డ మెసేజ్‌లు రైతుల ఫోన్లకు వస్తుంటాయని, రైతు బీమా డబ్బులు చనిపోయిన రైతు ఇంటికి ఖర్మ పనులు కాకుండానే పంపిస్తున్న ఘనత బీఆర్‌ఎస్‌ ప్రభుత్వానిదే అనగానే విజిల్స్‌ వేసి చప్పట్లు కొట్టారు.
• ధరణిని తీసేస్తే దళారుల రాజ్యమే, పైరవీకారుల భోజ్యమే.. ధరణిని తీయాలా! వద్దా! అంటే అందరూ వద్దని చేతులెత్తగా మీడియా వారంతా కెమెరాలన్నీ అటు తింపాలని కోరడంతో అన్ని కెమెరాలు ప్రజల వైపు తిరిగాయి.
• దివ్యాంగులకు వెయ్యి రూపాయల పెన్షన్‌ పెంచుతున్నామని ప్రకటించడంతో సభా స్థలి చప్పట్లతో మరోసారి మార్మోగింది.