పశువుల్లో ‘లంపీస్కిన్‌’

ప్రాణాంతక వ్యాధి పశు సంపదను ఆగం చేస్తున్నది. పశువులకు లంపీస్కిన్‌(ముద్ద చర్మ వ్యాధి) నివారణకు ముందస్తు జాగ్రత్తలు తీసుకుంటే కాపాడుకోవచ్చు.

• జాగ్రత్తలతో నివారణ సాధ్యం
• పశువైద్యాధికారి రాథోడ్‌ జీవన్‌

గుడిహత్నూర్‌, సెప్టెంబర్‌ 18 : ప్రాణాంతక వ్యాధి పశు సంపదను ఆగం చేస్తున్నది. పశువులకు లంపీస్కిన్‌(ముద్ద చర్మ వ్యాధి) నివారణకు ముందస్తు జాగ్రత్తలు తీసుకుంటే కాపాడుకోవచ్చు. ఒక పశువు నుంచి మరో పశువుకు ఈ వ్యాధి వ్యాపిస్తుంది. దోమలు, ఈగలు, కందిరీగల ద్వారా పశువులకు ముద్ద చర్మ వ్యాధి వ్యాప్తి చెందుతున్నది. ప్రస్తుతం మన ప్రాంతంలో ఈ వ్యాధి రాలేదని, వస్తే నియంత్రణకు తీసుకోవాల్సిన జాగ్రత్తలు, వ్యాధి లక్షణాలపై పశువైద్యాధికారి రాథోడ్‌ జీవన్‌ వివరించారు.

వ్యాధి లక్షణాలు…

• లంపీస్కిన్‌ వ్యాధి సోకిన పశువులకు ముందుగా జ్వరం, కళ్లు, ముక్కు నుంచి నీరు కారుతుంది.
• శరీరమంతా దద్దుర్లు, పొక్కులు, మచ్చలు ఏర్పడుతాయి.
• పాల దిగుబడి తగ్గుతుంది.
• ఈ వ్యాధి సోకిన 48 గంటల్లో తల, మెడ, పొదుగు, జననేంద్రియాలపై దద్దుర్లు ఏర్పడుతాయి.
• పశువులు సరిగా మేత మేయవు. బక్కచిక్కి పోతాయి. గర్భస్రావం అయ్యే అవకాశం ఉంది.
• ఈ వ్యాధి వల్ల పొదుగు వాపు, న్యుమోనియా వంటి ఇన్ఫెక్షన్‌ వచ్చే అవకాశం పెరుగుతుంది.

చికిత్స..

• అనారోగ్యంగా ఉన్న పశువులను వేరుగా ఉంచాలి.
• పశువైద్యుడిని సంప్రదించి రోగ లక్షణాలకు చికిత్స చేయించాలి.
• వ్యాధి సోకిన పశువుల్లో ఇతర ఇన్ఫెక్షన్‌ రాకుండా 5 నుంచి 7 రోజుల పాటు యాంటీ బయాటిక్స్‌ మందులు వాడాలి.
• యాంటీ ఇంప్లమేటరీ, యాంటీ హిస్టమిన్‌ మందులు కూడా వాడాలి.
• క్షీణించిన చర్మంపై కీటక వికర్షక లక్షణాలు ఉన్న క్రిమి నాశక లేపనాలను పూయాలి.
• మల్టీ విటమిన్‌ మందులను నోటి ద్వారా లేదా ఇంజక్షన్‌ ద్వారా ఇవ్వాలి.
• వ్యాధి సోకిన పశువులకు ద్రవ ఆహారం, మెత్తని పచ్చిగడ్డి ఇవ్వాలి.
• మరణాలు సంభవించినప్పుడు కళేబరాలను లోతుగా పాతి పెట్టాలి.

నివారణ, నియంత్రణ చర్యలు

• ఆరోగ్యంగా ఉన్న జంతువుల నుంచి ఈ వ్యాధి సోకిన వాటిని వేరుగా ఉంచాలి.
• లంపీ చర్మ వ్యాధి ఉన్నట్లు అనుమానం ఉన్న పశువులను కొత్తగా వ్యాధి సంక్రమించని మందలోకి తీసుక రాకూడదు.
• అన్ని పశువులతో పాటు వ్యాధి సోకిన వాటిని పంపకూడదు.
• ఆరోగ్యంగా ఉన్న పశువులకు కీటక వ్యతిరేక లేపనాలు పూయాలి.
• వ్యాధి ప్రభావిత ప్రాంతాల్లో నిర్ధారణ అయిన పశువుల అమ్మకం, ఉత్సవాల్లో పాల్గొనడం, పశువు ప్రదర్శనలు నిషేధించాలి.
• పశువుల నుంచి నమూనా సేకరించడానికి వాడిన పరికరాలు పడేయాలి
• పది కిలోమీటర్ల దూరంలో ఉన్న పశువుల మార్కెట్లను మూసివేయాలి.
• వ్యాధి లక్షణాలు ఉన్న పశువుల నుంచి సేకరించిన వీర్యాన్ని కృత్రిమ గర్భధారణ కోసం వాడకూడదు.
• ఈ వ్యాధి నుంచి కోలుకున్న పశువుల రక్తం, వీర్యాన్ని పీసీఆర్‌ పరీక్షలు చేసి పూర్తిగా కోలుకున్నట్లు నిర్ధారించుకున్న తర్వాతే
  సహజ/కృత్రిమ గర్భధారణ కోసం వాడాలి.
• సరైన వ్యాధి నివారణ చర్యలు తీసుకోకపోతే మందలోని 85% పశువులకు ఈ వ్యాధి సంక్రమించే ప్రమాదం ఉంది.
• లంపీ చర్మ వ్యాధి కారక వైరస్‌ మేక పాక్స్‌ జాతికి చెందినది. ఈ వ్యాధి సంక్రమించే అవకాశం ఉన్న పశువులకు మేకపాక్స్‌ టీకాలు వేయడంతో వ్యాధి రాకుండా చూడవచ్చని నిపుణులు సూచిస్తున్నారు.