‘ఆ అబ్బాయితో పెండ్లి ఇష్టమేనా తల్లీ’ – అమ్మానాన్న ప్రశ్న. ‘డేటింగ్ చేద్దామా?’ – ఓ స్నేహితుడి ప్రతిపాదన. ఇలాంటి ప్రశ్నలు ఎదురైనప్పుడు, ఆలోచించి ఓ నిర్ణయం తీసుకోవాలని సూచిస్తున్నారు సైకాలజిస్టులు. జీవితాన్ని మలుపు తిప్పే కీలక ప్రశ్నలకు ‘అవును/సరే/
కాదు/లేదు’ అని ఠక్కున సమాధానం చెప్పేముందు, ఒక్కసారి ఆత్మపరిశీలన చేసుకోవాలి. ప్రేమ, పెండ్లి, రిలేషన్షిప్ వంటి విషయాల్లో ఆచితూచి అడుగేయకపోతే జీవితం తలకిందులయ్యే ప్రమాదం ఉంది. ఆ ప్రతిపాదనలకు సుముఖత వ్యక్తం చేసేముందు ‘మనం తీసుకున్న నిర్ణయం సరైనదేనా?’ అన్న ప్రశ్న సూటిగా మనసునే అడగాలి. ఇతరులను మెప్పించడానికి మాత్రమే అవునని చెబితే, ఆ నిర్ణయం సరైంది కాకపోవచ్చు. ఎందుకంటే మన జీవితం మనకు నచ్చినట్లు ఉండాలి. ఇంకెవరికో నచ్చినట్టు కాదు. ఒత్తిడిలో ఎలాంటి పెద్ద నిర్ణయాలూ తీసుకోకూడదు. తక్షణం అవునని చెప్పాల్సిన పన్లేదు, కాదని చెప్పాల్సిన అవసరమూ లేదు. అలా అని ఎదుటి వ్యక్తి విధించే గడువుకు మనం తలొగ్గాల్సిన అగత్యమూ లేదు. మన జీవితం, మన నిర్ణయం!