ICICI | అడ్రస్‌ మారిన 17వేల క్రెడిట్‌ కార్డులు.. ఒకరికి బదులు మరొకరి వెళ్లాయంటున్న ఐసీఐసీఐ

ఇటీవల జారీ చేసిన దాదాపు 17,000 కొత్త క్రెడిట్‌ కార్డులు వివిధ డిజిటల్‌ పద్ధతుల్లో పొరపాటున ఒకరికి బదులు మరొకరి చేతికి వెళ్లాయని ఐసీఐసీఐ బ్యాంక్‌ గురువారం ప్రకటించింది. అయినప్పటికీ ఈ తప్పు వల్ల ఎటువంటి దుర్వినియోగం జరుగలేదన్న బ్యాంక్‌..

ICICI | న్యూఢిల్లీ, ఏప్రిల్‌ 25: ఇటీవల జారీ చేసిన దాదాపు 17,000 కొత్త క్రెడిట్‌ కార్డులు వివిధ డిజిటల్‌ పద్ధతుల్లో పొరపాటున ఒకరికి బదులు మరొకరి చేతికి వెళ్లాయని ఐసీఐసీఐ బ్యాంక్‌ గురువారం ప్రకటించింది. అయినప్పటికీ ఈ తప్పు వల్ల ఎటువంటి దుర్వినియోగం జరుగలేదన్న బ్యాంక్‌.. ఒకవేళ ఏదైనా ఆర్థిక నష్టం జరిగితే బాధిత కస్టమర్లకు దాన్ని పరిహారంగా చెల్లిస్తామని హామీ ఇచ్చింది. కాగా, కొత్త క్రెడిట్‌ కార్డులను వాడాలంటే కస్టమర్ల మొబైల్స్‌కు వచ్చే వన్‌-టైమ్‌ పాస్‌వర్డ్‌లు కీలకమని, కావున కార్డుల దుర్వినియోగం జరగడానికి చాలాచాలా తక్కువ వీలుందని నిపుణులు చెప్తున్నారు.

మరోవైపు ఈ కార్డులన్నింటినీ ఇప్పటికే బ్లాక్‌ చేశామంటున్న ఐసీఐసీఐ బ్యాంక్‌.. తప్పుగా పంపిణీ అయిన కార్డులను తిరిగి వెనక్కి తీసుకోవడం వీలు కానందున, అసలు కస్టమర్లకు త్వరలోనే కొత్త కార్డులు వస్తాయన్నది. అయితే బుధవారం సాయం త్రం నుంచే ఈ వ్యవహారం.. పలు సామాజిక మాధ్యమాల్లో వైరల్‌ అవుతుండగా, దాన్నిప్పుడు బ్యాంక్‌ ధ్రువీకరించడం గమనార్హం. మరోవైపు ఈ తరహా నిర్లక్ష్యం మూలంగానే కొటక్‌ బ్యాంక్‌పై ఆర్బీఐ కొరడా ఝుళిపించిన నేపథ్యంలో ఇప్పుడు ఐసీఐసీఐ హాట్‌ టాపికైంది.