వ్యాయామంలో రకింగ్‌!

వాకింగ్‌.. అన్నిటికన్నా సులభమైన, ఎన్నో ప్రయోజనాలు అందించే వ్యాయామం. అంతకుమించిన ఫలితాలు దక్కాలంటే.. ‘రకింగ్‌' చేయాల్సిందే! ఈ నయా ఎక్సర్‌సైజ్‌.. ప్రస్తుతం ఐరోపా దేశాల్లో విపరీతంగా ట్రెండింగ్‌ అవుతున్నది. ఎన్నో ఆరోగ్య ప్రయోజనాలు అందిస్తున్నది.

వాకింగ్‌.. అన్నిటికన్నా సులభమైన, ఎన్నో ప్రయోజనాలు అందించే వ్యాయామం. అంతకుమించిన ఫలితాలు దక్కాలంటే.. ‘రకింగ్‌’ చేయాల్సిందే! ఈ నయా ఎక్సర్‌సైజ్‌.. ప్రస్తుతం ఐరోపా దేశాల్లో విపరీతంగా ట్రెండింగ్‌ అవుతున్నది. ఎన్నో ఆరోగ్య ప్రయోజనాలు అందిస్తున్నది. మరి.. అసలు ‘రకింగ్‌’ అంటే ఏంటి?
దాన్ని ఎలా చేయాలి? ఎలాంటి ఫలితాలు దక్కుతాయో తెలుసుకుందాం!

రకింగ్‌ అంటే.. బరువుగా ఉండే బ్యాక్‌ప్యాక్‌ను ధరించి వాకింగ్‌ చేయడమే! శిక్షణలో భాగంగా సైనికుల్లో ఓర్పును పెంపొందించడానికి ఈ వ్యాయామాన్ని ఎక్కువగా చేయించేవారు. ఆ తర్వాత పాశ్చాత్య దేశాల్లో సాధారణ వ్యాయామంగా ప్రజాధరణ పొందింది. ఇప్పుడు సామాజిక మాధ్యమాల్లో ఫిట్‌నెస్‌ ఫ్రీక్‌గా
తెగ ట్రెండ్‌ అవుతున్నది.

అనేక ప్రయోజనాలు

సాధారణ వాకింగ్‌తో పోలిస్తే, రకింగ్‌ ద్వారా 13 శాతం ఎక్కువ కేలరీలు ఖర్చవుతాయట. అమెరికన్‌ కౌన్సిల్‌ నిర్వహించిన ఓ అధ్యయనం.. ఈ విషయాన్నితేల్చింది. 55 కిలోల వ్యక్తి.. 9 కిలోల బరువుండే బ్యాగుతో రకింగ్‌ చేస్తే.. గంటకు 420 కేలరీలు బర్న్‌ అవుతాయని సదరు సర్వేలో వెల్లడైంది. బరువుగా ఉండే
బ్యాక్‌ప్యాక్‌ ధరించి నడవడం వల్ల కాళ్లు, భుజాలు పూర్తిస్థాయిలో పనిచేస్తూ, శరీరం మొత్తానికీ వ్యాయామం లభిస్తుంది. ఇక రన్నింగ్‌తో పోలిస్తే.. రకింగ్‌లో మోకీళ్లపై ప్రభావం తక్కువగా ఉంటుంది. మోకాళ్లు, చీలమండపై ఒత్తిడి తగ్గుతుంది. గుండె ఆరోగ్యానికీ ఇది భరోసా ఇస్తుంది. కండరాలకు బలాన్ని
అందిస్తుంది. మానసిక ఒత్తిడిని దూరం చేస్తుంది. అందుకే.. రకింగ్‌ను ‘మెంటల్‌ మారథాన్‌’గానూ అభివర్ణిస్తున్నారు.

జాగ్రత్తలు

• రకింగ్‌ చేయాలనుకునే వారు కొన్ని జాగ్రత్తలు తీసుకోవాలని వ్యాయామ నిపుణులు సూచిస్తున్నారు. మొదటగా తేలికపాటి బరువుతోనే మొదలు పెట్టాలి. ఆ తర్వాత క్రమంగా బ్యాక్‌ప్యాక్‌ బరువుతోపాటు దూరాన్ని పెంచుకుంటూ పోవాలి. ఆదిలోనే అధిక బరువుతో ప్రారంభిస్తే.. మోకాళ్లు, తుంటి, చీలమండలు
  అసౌకర్యానికి గురవుతాయి.
• బ్యాక్‌ప్యాక్‌ను సరిగ్గా ధరించాలి. లేదంటే, వెన్నుపూసతోపాటు భుజాలపైనా అధిక ఒత్తిడి పడుతుంది. దీనిని నివారించడానికి ప్రత్యేకమైన రకింగ్‌ వెస్ట్స్‌ అందుబాటులో ఉంటాయి. ఇవి.. బ్యాక్‌ప్యాక్‌ బరువును శరీరం మొత్తం సమానంగా పంపిణీ చేయడంలో సాయపడతాయి. వెన్నెముక, భుజాలపై ఒత్తిడిని తగ్గిస్తాయి.
• రకింగ్‌ చేస్తున్నప్పుడు హృదయ స్పందన రేటును పర్యవేక్షించడం తప్పనిసరి. పల్స్‌రేట్‌ను ట్రాక్‌ చేయడం వల్ల.. మీ వ్యాయామాలు ప్రభావవంతంగానే ఉన్నాయని నిర్ధారించుకోవచ్చు.