ఈ పండ్ల రసాలను కలిపి తాగితే.. కలదు ఆరోగ్యం!

చాలామంది శీతలపానీయాల మోజులో పడిపోయి.. పండ్ల రసాలను నిర్లక్ష్యం చేస్తారు. తీసుకున్నా ఒకేరకం పండ్ల రసాలు తీసుకుంటారు. అలా కాకుండా, శరీరానికి యాంటీ ఆక్సిడెంట్లను పుష్కలంగా అందించే ‘మిశ్రమ’ రసాలు తాగడం మేలని సలహా ఇస్తారు పోషకాహార నిపుణులు

చాలామంది శీతలపానీయాల మోజులో పడిపోయి.. పండ్ల రసాలను నిర్లక్ష్యం చేస్తారు. తీసుకున్నా ఒకేరకం పండ్ల రసాలు తీసుకుంటారు. అలా కాకుండా, శరీరానికి యాంటీ ఆక్సిడెంట్లను పుష్కలంగా అందించే ‘మిశ్రమ’ రసాలు తాగడం మేలని సలహా ఇస్తారు పోషకాహార నిపుణులు.

దానిమ్మ-ద్రాక్ష : ఈ పండ్లలో పాలిఫినాల్స్‌ పుష్కలం. ఇందులో యాంటీ ఆక్సిడెంట్లు, టానిన్లు, ఆంథోసైనిన్లు, ఎలాజిక్‌ యాసిడ్‌ ఉంటాయి. రెడ్‌వైన్‌తో పోలిస్తే దానిమ్మ తొక్కలో మూడురెట్ల యాంటీ ఆక్సిడెంట్స్‌ ఉంటాయి. కాబట్టి, ఈ రెండూ కలిపి తాగితే ఎంతో మేలు.

 

మామిడి-పైనాపిల్‌ : ఈ రసాల్లో రెస్వెరాట్రాల్‌ అనే యాంటీ ఆక్సిడెంట్‌ ఉంటుంది. ఇది క్యాన్సర్‌ కణాలను నిరోధిస్తుంది, పాడైన శరీర కణజాలానికి మరమ్మతులు చేస్తుంది. రెండూ కలిపి తాగడం వల్ల గుండె సంబంధ వ్యాధుల నుంచి రక్షణ లభిస్తుంది. పైనాపిల్‌లో విటమిన్‌-సి, ఫినాలిక్‌ యాసిడ్స్‌ ఉంటాయి. ఇదో సూపర్‌ కాంబినేషన్‌.

 

పుచ్చకాయ-నిమ్మకాయ : ఇవి శరీరాన్ని తేమగా ఉంచుతాయి. పుచ్చకాయలో లైకోపీన్‌ ఉంటుంది. నిమ్మకాయలో విటమిన్‌-సి అపారం. రెండూ కలిపినప్పుడు వీటిలోని యాంటీ ఆక్సిడెంట్లు మరింత బలపడి, క్యాన్సర్‌కారక ఫ్రీ రాడికల్స్‌పై పోరాడతాయి.

 

స్ట్రాబెర్రీ-నారింజ : స్ట్రాబెర్రీలోని ఆంథోసైనిన్లు క్యాన్సర్‌ కారకాలతో పోరాడగలవని వైద్యులు చెబుతున్నారు. ఇవి గుండె వ్యాధుల నుంచీ రక్షిస్తాయి. నారింజలో విటమిన్‌-సి కూడా అధికమే. దీన్ని స్ట్రాబెర్రీతో కలిపి తీసుకుంటే యాంటీ ఆక్సిడెంట్స్‌ ప్రయోజనాలు రెట్టింపు అవుతాయి.

 

యాపిల్‌-జామ : యాపిల్‌లో యాంటీ ఆక్సిడెంట్లు, ఫ్లేవనాయిడ్స్‌ అధికం. ఇవన్నీ కణాలను రక్షించడంలో సాయపడతాయి. జామలో విటమిన్‌-ఎ, విటమిన్‌-సి, లైకోపీన్‌ వంటి యాంటీ ఆక్సిడెంట్లు పుష్కలం. రెండిటి మిశ్రమం అద్భుతాలు చేస్తుంది.