మినిమలిజం.. ప్రపంచవ్యాప్తంగా ఇదొక‌ ట్రెండ్‌.. ఫ్యాష‌న్‌లో ఇది ఎలా వ‌ర్క‌వుట్ అవుతుందంటే..

April 22, 2022 / 05:47 AM IST

Minimalism | మినిమలిజం.. ప్రపంచ వ్యాప్తంగా ఓ ట్రెండ్‌! తక్కువ వనరులతో, తక్కువ వసతులతో ఆనందంగా బతికేయడమే ‘మినిమలిజం’ ప్రధాన లక్షణం. ఈ సూత్రం నగలకూ అన్వయించుకుంటున్నారు. భారీ ఆభరణాల జోలికి వెళ్లకుండా.. సన్నాసన్నని డిజైన్లకు ప్రాధాన్యం ఇస్తున్నారు. చక్కనమ్మ చిక్కినా అందమే అన్నట్టు.. వాటికే బోలెడు అందాలను జొప్పిస్తున్నారు డిజైనర్లు.

పూలు, ఆకులు, తీగలతోపాటు సీతాకోక చిలుకలు, మయూరాలు ‘మినిమల్‌’ నగల్లో ముచ్చటగా ఒదిగిపోయాయి. తెలుగు, ఇంగ్లిష్‌ అక్షరాలు, వివిధ ఆకృతులతో కూడిన పెండెంట్లు వీటికి మరింత అందాన్ని చేకూరుస్తున్నాయి. ఈ పద్ధతిలో సన్నని బంగారు తీగలను అందమైన డిజైన్లుగా మలుస్తారు. వీటికే రాళ్లు, ముత్యాలు, జాతి రత్నాలను జోడిస్తారు. ఆధునిక దుస్తులకు ఇవి సరిజోడు. చుడీదార్లు, టాప్స్‌, జీన్స్‌ మీదికి కూడా చక్కగా నప్పుతాయి. తేలికగా ఉంటూనే ైస్టెలిష్‌ లుక్‌తో మెరుపులు మెరిపిస్తాయి. కాబట్టే, ఈతరం అమ్మాయిలు వీటిని ఇష్ట పడుతున్నారు. సన్నగా ఉంటాయి కాబట్టి, బంగారం ఖర్చు తక్కువే. వన్‌గ్రామ్‌ గోల్డ్‌, ఇమిటేషన్‌ జువెలరీలోనూ ఈ డిజైన్లు దొరుకుతున్నాయి.

పాపిట బిళ్లల నుంచి గొలుసులు, కమ్మలు, ఉంగరాలు, వడ్డాణాలు, వంకీలు, గాజులు, బ్రేస్‌లెట్లు, కాలి మువ్వలు, మెట్టెలు.. ఇలా ప్రతి నగా నాజూకుగా మారుతున్నది. చూసేందుకు సన్నగా కనిపించినా దృఢంగానే ఉంటాయి. తెగిపోవడం, వంకర తిరగడం, విరిగిపోవడం.. తదితర సమస్యలు ఉండవు. భారీ నగలు ఒంటికి గుచ్చుకుంటూ.. కొంతమేర
అసౌకర్యాన్ని కలిగిస్తాయి. ఈ జువెలరీతో సమస్య ఉండదు. కొనడం తేలిక. ధరించడం తేలిక. నలుగురి చూపూ తమ వైపు తిప్పుకోవడమూ తేలికే.