కంపును కంట్రోల్‌ చేద్దాం!

కాలమేదైనా.. కొందరిలో పాదాలు కంపు కొడుతుంటాయి. ముఖ్యంగా ప్రతిరోజూ బూట్లు తొడుక్కొనే వారిని ఈ సమస్య మరింత వేధిస్తుంది. కొందరు లైట్‌గా తీసుకున్నా.. కొన్ని సందర్భాల్లో ‘పాదాల దుర్వాసన’ అనేది పెద్ద సమస్యగా మారుతుంది. బాధితులను ఇబ్బంది పెట్టడమేకాకుండా..

కాలమేదైనా.. కొందరిలో పాదాలు కంపు కొడుతుంటాయి. ముఖ్యంగా ప్రతిరోజూ బూట్లు తొడుక్కొనే వారిని ఈ సమస్య మరింత వేధిస్తుంది. కొందరు లైట్‌గా తీసుకున్నా.. కొన్ని సందర్భాల్లో ‘పాదాల దుర్వాసన’ అనేది పెద్ద సమస్యగా మారుతుంది. బాధితులను ఇబ్బంది పెట్టడమేకాకుండా.. చుట్టూ ఉన్నవారికి అసౌకర్యాన్ని కలిగిస్తుంది. కొన్ని చిన్నచిన్న చిట్కాలతో ఈ సమస్యకు పరిష్కారం చూపవచ్చని నిపుణులు చెబుతున్నారు.

• ప్రతిరోజూ ఆఫీస్‌ నుంచి రాగానే.. సబ్బు, నీటితో పాదాలను శుభ్రం చేసుకోవాలి. కాలి వేళ్ల మధ్య బాగా రుద్ది కడగాలి. పాదాల్ని పూర్తిగా ఆరనివ్వాలి.
• బూట్లు వేసుకునే ముందు పాదాలపై కొద్దిగా మక్కజొన్న పిండిని చల్లండి. దీంతో చెమట తక్కువగా పడుతుంది. వచ్చిన చెమటను మక్కజొన్న పిండి పీల్చేసుకొని.. పాదాలను రోజంతా పొడిగా ఉంచుతుంది.
• ఒక బకెట్‌ నిండా గోరు వెచ్చటి నీరు తీసుకొని, అందులో కొద్దిగా వెనిగర్‌ కలపాలి. ఈ మిశ్రమంలో ఐదు నిమిషాల పాటు పాదాలను అలాగే ఉంచాలి. ఆ తర్వాత శుభ్రమైన వస్త్రంతో పాదాల్ని తుడుచుకుంటే.. దుర్వాసన, ఫంగల్‌ ఇన్‌ఫెక్షన్ల నుంచి ఉపశమనం లభిస్తుంది.
• రాత్రి పడుకునే ముందు.. కొబ్బరినూనెతో పాదాలకు మసాజ్‌ చేసుకోండి. కొబ్బరినూనెలో ఉండే లారిక్‌ యాసిడ్‌.. బ్యాక్టీరియాను నాశనం చేస్తుంది. పాదాల దుర్వాసననూ తగ్గిస్తుంది.
• బిగుతుగా ఉండే బూట్లు ధరించడం వల్ల చెమట అధికంగా పడుతుంది. ఫలితంగా బ్యాక్టీరియా వృద్ధి చెంది.. పాదాలు కంపు కొడతాయి. అందుకే.. సౌకర్యంగా ఉండే బూట్లనే ఎన్నుకోవాలి.
• పాదాలను శుభ్రం చేయడానికి యాంటి బ్యాక్టీరియా, యాంటి ఫంగల్‌ లక్షణాలు కలిగిన సబ్బులను ఉపయోగించండి.
• పాదాల కోసం ప్రత్యేకంగా స్ప్రేలు దొరుకుతాయి. యాంటి ఫంగల్‌ లక్షణాలుండే ఈ స్ప్రేలు.. పాదాలపై ఉండే బ్యాక్టీరియా, ఫంగస్‌ను తొలగిస్తాయి. పాదాల దుర్వాసననూ నివారిస్తాయి. మీ పాదాలను పదిలంగా ఉంచుతాయి.
• ఇన్ని చేసినా దుర్వాసన అలాగే వస్తుంటే.. అది తీవ్రమైన సమస్య కావచ్చు. ఇలాంటి సందర్భాల్లో వైద్యుణ్ని సంప్రదించడమే మంచిది.