వ్యాక్సినేషన్‌కు వెళ్లే ముందు..

వ్యాక్సినేషన్‌ ప్రక్రియ ఎంత వేగంగా జరిగితే అంత త్వరగా మన దేశం కరోనా ఊబినుంచి బయట పడుతుంది. ఈ మహాయజ్ఞంలో ప్రతి నిమిషం విలువైందే. మన కారణంగా ఓ ఐదు నిమిషాలు ఆలస్యమైందంటే, పరోక్షంగా ఒకరికి టీకా సకాలంలో అందనట్టే. కాబట్టి, తగిన ఏర్పాట్లతో టీకా కేంద్రానికి వెళ్లండి.

• అందుబాటులో ఉన్న వ్యాక్సిన్లన్నీ ప్రామాణికమైనవే. అయినా, ఫలానా వ్యాక్సినే కావాలనుకుంటే, ముందే నిర్ధారించుకొని వెళ్లండి. వెళ్లిన తర్వాత గొడవలొద్దు.
• వదులైన బట్టలే వేసుకోండి. మగవారు టీషర్ట్‌, మహిళలు చుడీదార్‌ లాంటివి వేసుకోవచ్చు. దీనివల్ల టీకా వేయడానికి అనువుగా ఉంటుంది.
• ఎన్‌-95 కానీ, సర్జికల్‌ మాస్క్‌పైన మరొక మాస్కు ధరించి కానీ వెళ్లండి.
• ఖాళీ కడుపుతో వెళ్లకండి.
• వెంట ఓ నీళ్ల సీసా, శానిటైజర్‌ తీసుకెళ్లండి.
• ఆధార్‌ గుర్తింపు పత్రమూ తప్పనిసరి.
• అవసరమైతే కొన్ని ఫారాలు పూర్తి చేయాల్సి ఉంటుంది కాబట్టి, పెన్నుకూడా తీసుకెళ్లండి.
• సాంకేతిక కారణాలవల్ల ఆన్‌లైన్‌ చెల్లింపు ఆగిపోయిన పక్షంలో, నగదు అవసరం కావచ్చు.
• కొన్నిసార్లు టీకా ప్రక్రియ ఆలస్యం కావచ్చు. ఓపికతో వ్యవహరించండి.