యుద్ధం వస్తే.. సిద్ధంగా!

‘ఆపరేషన్‌ సిందూర్‌'తో భారత్‌ - పాకిస్థాన్‌ మధ్య తీవ్రమైన ఉద్రిక్తతలు నెలకొన్నాయి. పరిస్థితులు చేయిదాటితే.. పూర్తిస్థాయి యుద్ధంవైపు మళ్లే అవకాశాలూ ఉన్నాయి. ఇలాంటి విపత్కర పరిస్థితుల్లో పౌరులు చాలా అప్రమత్తంగా ఉండాలి.

‘ఆపరేషన్‌ సిందూర్‌’తో భారత్‌ – పాకిస్థాన్‌ మధ్య తీవ్రమైన ఉద్రిక్తతలు నెలకొన్నాయి. పరిస్థితులు చేయిదాటితే.. పూర్తిస్థాయి యుద్ధంవైపు మళ్లే అవకాశాలూ ఉన్నాయి. ఇలాంటి విపత్కర పరిస్థితుల్లో పౌరులు చాలా అప్రమత్తంగా ఉండాలి. ఈ సందర్భంగా ప్రజలు ఎలా వ్యవహరించాలి? ఎలాంటి జాగ్రత్తలు తీసుకోవాలి? తమతోపాటు తమ కుటుంబాన్ని, సమాజాన్నీ రక్షించుకోవడానికి ఎలాంటి చర్యలు తీసుకోవాలి? యుద్ధ సమయంలో ఏం చేయాలో, ఎలాంటి స్పృహతో ఉండాలో అధికారులు కొన్ని సలహాలు, సూచనలు అందిస్తున్నారు.

• యుద్ధమేఘాలు కమ్ముకునే ఇలాంటి సమయంలో కనీసం 25 రోజులకు సరిపడా ఆహారం, నీరు, ప్రాథమిక చికిత్స మందులు, అత్యవసర సామగ్రి, బ్యాటరీలు, ఫ్లాష్‌లైట్లను వెంట ఉంచుకోవడం ముఖ్యం.
• కనీసం ఒక నెల ఖర్చులకు సరిపడా నగదు ఇంట్లో ఉంచుకోవాలి. ఏటీఎంలు, యూపీఐ, క్రెడిట్‌ కార్డులు పనిచేయకపోయినా.. ఇబ్బంది పడకుండా ఉంటారు.
• వైమానిక దాడుల నుంచి వచ్చే పేలుళ్లు, శకలాలను తట్టుకునేలా ఇంటిని సురక్షితంగా మార్చుకోవాలి. తలుపులు, కిటికీలను ఎప్పుడూ మూసి ఉంచుకోవాలి.
• డబ్బు, నగలు, గుర్తింపు పత్రాలు, మెడికల్‌ రికార్డ్స్‌, ఇతర ముఖ్యమైన పత్రాలను సురక్షితమైన ప్రదేశంలో భద్రపరుచుకోవాలి.
• మీడియాలో ప్రసారమయ్యే యుద్ధ దృశ్యాలను ఎక్కువగా చూడవద్దు. అలాంటి దృశ్యాలు, వార్తలు.. ఆందోళనను పెంచుతాయి. కాబట్టి, ఇంట్లో పెద్దవాళ్లు, పిల్లలను యుద్ధ వార్తలకు దూరంగా ఉంచడమే మంచిది. యుద్ధానికి సంబంధించిన వాస్తవాలు తెలుసుకునేందుకు బులెటిన్ల వరకూ
  పరిమితం చేస్తేచాలు.
• యుద్ధం.. మానసికంగా కుంగదీస్తుంది. కాబట్టి, ప్రశాంతంగా ఉండటానికి ప్రయత్నించాలి. యోగా, ధ్యానం వంటి విశ్రాంతి నైపుణ్యాలను ఆశ్రయించడం, మానసిక ఆరోగ్య నిపుణులను సంప్రదించడం ద్వారా భావోద్వేగ భారాన్ని తగ్గించుకోవచ్చు.
• అత్యవసర పరిస్థితుల్లో పౌరులను అప్రమత్తం చేయడానికి ప్రభుత్వాలు అత్యవసర ప్రసారాలు, హెచ్చరికలను అందించవచ్చు. ముఖ్యమైన సమాచారాన్ని తెలుసుకోవడానికి రేడియో, టీవీలో వార్తలను వినాలి.
• వైమానిక దాడులు, క్షిపణి దాడులు జరిగే సందర్భాల్లో అధికార వర్గాల నుంచి సూచనలు వస్తాయి. యుద్ధ సైరన్లు మోగినప్పుడు.. పౌరులంతా అప్రమత్తం కావాలి.
• దాడులు జరిగే సమయంలో బయటికి వెళ్లకూడదు. ఇంట్లోనే ఉండి.. తలుపులు, కిటికీలను మూసివేయాలి. ఇంట్లో ఎలక్ట్రిక్‌ పరికరాలు, లైట్లు, గ్యాస్‌ స్టవ్‌ ఆపేయాలి.
• దాడి సమయంలో ఆరు బయట ఉన్నట్టయితే.. నేలపై పడుకొని, చేతులతో చెవులు గట్టిగా మూసుకోవాలి.
• ఏదైనా ప్రమాదం ఉన్నదని గుర్తిస్తే.. వెంటనే సమీపంలోని రక్షణ కేంద్రాలకు, సురక్షిత ప్రాంతాలకు వెళ్లాలి.
• దాడుల సందర్భంగా తోటివారికి రక్తస్రావమైనా, కాళ్లు చేతులకు చిన్నపాటి గాయాలైనా వారికి అవసరమైన ప్రాథమిక చికిత్స అందించాలి. ఊపిరి ఆడని సమయంలో సీపీఆర్‌ చేయాలి. మిమ్మల్ని మీరు రక్షించుకుంటూ.. మీతో ఉన్నవారినీ రక్షించాలి.
• యుద్ధం వల్ల నష్టపోయినవారికి మానవతా దృక్పథంతో సహాయం చేయాలి. ఆహారం, బట్టలు, మందులు, డబ్బులాంటివి విరాళంగా అందించాలి.
  ఆశ్రయంతోపాటు వైద్య సాయం అందించడంలో స్థానిక ఎన్‌జీవోలు, ప్రభుత్వ సంస్థలు, ఇతర సహాయ బృందాలకు సహాయం చేయాలి.
• ఒక భారతీయ పౌరుడిగా.. యుద్ధ సమయంలో సురక్షితంగా ఉండటమే మీరు చేయాల్సింది. అంతేకానీ, మతపరమైన విభేదాలు సృష్టించడం, శత్రుత్వాన్ని మరింత విస్తరించేలా ప్రవర్తించడం తగదు. అలాంటి ఉద్దేశంతో ఉండే సమూహాలకు దూరంగా ఉండటం మంచిది. సోషల్‌ మీడియాలో వచ్చే అలాంటి కథనాలనూ ప్రోత్సహించవద్దు.