ముద్దముద్దలో మువ్వన్నెలు..

పంద్రాగస్టున ప్రతి భారతీయుడి గుండె.. దేశభక్తితో నిండిపోతుంది. ఈ ప్రత్యేక సమయాన కడుపు నిండా మువ్వన్నెల భోజనం.. మరింత స్పెషల్‌గా ఉంటుంది. ఇందు కోసం త్రివర్ణాల్లో తయారయ్యే పదార్థాల లిస్టును అందిస్తున్నారు ఆహార నిపుణులు.

పంద్రాగస్టున ప్రతి భారతీయుడి గుండె.. దేశభక్తితో నిండిపోతుంది. ఈ ప్రత్యేక సమయాన కడుపు నిండా మువ్వన్నెల భోజనం.. మరింత స్పెషల్‌గా ఉంటుంది. ఇందు కోసం త్రివర్ణాల్లో తయారయ్యే పదార్థాల లిస్టును అందిస్తున్నారు ఆహార నిపుణులు. ఉదయం టిఫిన్‌ మొదలుకొని మధ్యాహ్న భోజనం, స్నాక్స్‌, స్వీట్స్‌, స్మూతీలు.. ఇలా ప్రతి పదార్థాన్నీ మూడు రంగుల్లో ఎలా సిద్ధం చేసుకోవాలో చెబుతున్నారు.

• ఉదయం టిఫిన్‌లోకి మువ్వన్నెల ఇడ్లీలను సిద్ధం చేసుకోవచ్చు. ఇందుకోసం ఇడ్లీ పిండిని మూడు భాగాలుగా చేసుకోవాలి. ఒకభాగంలో క్యారెట్‌ ప్యూరీ, మరోదాంట్లో పాలకూర ప్యూరీని జత చేస్తే.. కాషాయం, ఆకుపచ్చ రంగుల పిండి తయారవుతుంది. వీటితోపాటు మామూలు తెల్లని పిండితో ఇడ్లీలు వేసుకుంటే.. త్రివర్ణాల టిఫిన్‌ సిద్ధమైపోతుంది.
• మధ్యాహ్నం పూట.. మూడు రంగుల్లో వండుకున్న అన్నాన్ని ఆరగించొచ్చు. ఇందుకోసం మూడు గిన్నెల్లో అన్నం వండుకోవాలి. బియ్యం ఉడుకుతున్నప్పుడే.. ఒకదాంట్లో క్యారెట్‌ తురుము, మరొకదాంట్లో పుదీనా ప్యూరీని కలుపుకోవాలి. వీటికి మామూలు అన్నం జతచేస్తే.. పల్లెం నిండుగా స్వతంత్ర దినోత్సవ స్పెషల్‌ మీల్స్‌ రెడీ అయిపోయినట్లే!
• ఇక సాయంత్రం స్నాక్స్‌గా.. శాండ్‌విచ్‌ తినాలనుకుంటున్నారా? అయితే, బ్రెడ్‌కు రెండువైపులా క్యారెట్‌ మిక్స్‌, గ్రీన్‌ చట్నీ, చీజ్‌ స్ప్రెడ్‌ జతచేయండి. త్రివర్ణాల్లో శాండ్‌విచ్‌లు సిద్ధమవుతాయి. సలాడ్‌ను ఇష్టపడేవాళ్లయితే.. క్యారెట్‌, పనీర్‌ క్యూబ్స్‌తోపాటు కీరా ముక్కలతో మూడు రంగుల సలాడ్‌ను సిద్ధం చేసుకోండి.
• తియ్యతియ్యగా స్వీట్‌ తినాలనిపిస్తే.. అందుకూ ఓ రెమెడీ సిద్ధంగా ఉంది. కుంకుమ పువ్వు, పిస్తా పప్పులు, పాలతో మూడు రంగుల బర్ఫీని తయారు చేసుకోవచ్చు.
• ఇక రాత్రి పడుకునే ముందు కమ్మటి స్మూతీ తాగే అలవాటు ఉందా? అయితే.. కింది లేయర్‌లో కివీ, మధ్యలో పెరుగు ఆపైన మామిడి పండ్ల స్మూతీతో దేశభక్తిని చాటేలా స్మూతీని సిద్ధం చేసుకోవచ్చు. స్వతంత్ర దినోత్సవాన్ని మరింత ప్రత్యేకంగా జరుపుకోవచ్చు.