మధుమేహం..సరైన ఆహారం!

డయాబెటిస్‌ రోగులకు ఏ చిన్న సమస్య వచ్చినా ఇబ్బందే. అలాంటిది, కొవిడ్‌ బారినపడ్డ మధుమేహ రోగులు మరింత ఎరుకతో ఉండాలి. తీసుకునే ఆహారంపై ప్రత్యేక శ్రద్ధ పెట్టాలి. ప్రస్తుత పరిస్థితుల్లో మధుమేహులు తీసుకోవాల్సిన జాగ్రత్తలు ఇవి..

• ఇంట్లోనే తరచూ బ్లడ్‌ గ్లూకోజ్‌ చెక్‌ చేసుకోవాలి.
• తిన్న వెంటనే, సహజంగానే శరీరంలో బ్లడ్‌ గ్లూకోజ్‌ స్థాయులు పెరుగుతాయి. కాబట్టి రోజూ ఒకే మోతాదులో ఆహారం తీసుకోవాలి. లేకపోతే, బ్లడ్‌ గ్లూకోజ్‌ స్థాయులపై ఆ ప్రభావం పడుతుంది.
• భోజనం నుంచి స్నాక్స్‌ వరకు అన్నిటినీ రోజూ ఒకే సమయానికి తీసుకోవాలి. రోజూ మూడు మేజర్‌ మీల్స్‌, ఐదు మైనర్‌ మీల్స్‌ తినాలి.
• ఫైబర్‌ డైట్‌ను అలవర్చుకోవాలి. ఉదాహరణకు ఓట్స్‌, వీట్‌ బ్రాన్‌, శనగపిండి, సోయా పదార్థాలు, చిరు
• ధాన్యాలు, ఆకుకూరలు, బ్రకోలీ, అవిసె గింజలను ఆహారంలో చేర్చుకోవాలి.
• తప్పనిసరిగా వ్యాయామం చేయాలి. ఎలాంటి వ్యాయామాలు చేయాలో నిపుణులను అడగాలి. మద్యం, ధూమపానం సాధ్యమైనంత దూరం పెట్టాలి.
• ఆహారంలో దాల్చిన చెక్క, వెల్లుల్లి తరచూ వాడాలి. అందులోని యాంటీ ఆక్సిడెంట్‌ గుణాలు చక్కెర స్థాయులను నియంత్రిస్తాయి.

వీటితో రోగ నిరోధక శక్తి..

• మెంతులు: ఒక టీ స్పూన్‌ మెంతులను అర కప్పు నీళ్లలో రాత్రంతా నానబెట్టి, ఉదయాన్నే తాగాలి.
• ఫైబర్‌ ఫుడ్‌: పీచు పదార్థాలు ఎక్కువగా ఉండే బీన్స్‌, బ్రకోలీ, పాలకూరలను రోజూ తీసుకోవాలి.
• పండ్లు : డయాబెటిక్‌ పేషెంట్లు తొక్కతోసహా తినగల పండ్లను ఎంచుకోవాలి. కారణం, తొక్కలో ఫైబర్‌ ఉంటుంది. అది పండ్లలోని కార్బొహైడ్రేట్లు చక్కెరగా మారే క్రమాన్ని నెమ్మదించేలా చేస్తుంది.
• నట్స్‌: బ్లడ్‌ షుగర్‌ నియంత్రణలో బాదంపప్పు తోడ్పడుతుంది.
• కడుపు మాడ్చొద్దు : అందరిలా రోజుకు మూడు పూటలు కాకుండా, తక్కువ మోతాదులోనైనా సరే ఏడెనిమిది సార్లు తినాలి. ఖాళీ కడుపుతో ఎక్కువసేపు ఉండకూడదు.

మయూరి ఆవుల
న్యూట్రిషనిస్ట్‌
www.trudiet.in