Visit:
మన గుండెకు అవకాడో అభయం ఇస్తుంది. శరీరంలో చెడు కొలెస్ట్రాల్ను తగ్గించడంతోపాటు గుండె, రక్తనాళాల ఆరోగ్యాన్నీ కాపాడుతుంది. అమెరికాకు చెందిన జర్నల్ ఆఫ్ క్లినికల్ లిపిడాలజీ తాజాగా నిర్వహించిన ఓ పరిశోధన.. ఈ విషయాన్ని తేల్చింది. ప్రస్తుతం చెడు కొలెస్ట్రాల్ సమస్య చాలామందిని వేధిస్తున్నది. ఎలాంటి ఆహార నియమాలు పాటించినా, ఎన్ని మందులు వాడినా.. ప్రాణాలకు మీదికి తెస్తున్నది. అయితే, రోజుకు ఒకేఒక్క అవకాడో తింటే.. గుండె పదిలంగా ఉంటుందని జర్నల్ ఆఫ్ క్లినికల్ లిపిడాలజీ అధ్యయనం వెల్లడించింది.
ఈ అధ్యయనం కోసం అధిక బరువు, చెడు కొలెస్ట్రాల్తో బాధపడుతున్న కొందరిని ఎంపిక చేశారు. వారిని రెండు బృందాలుగా విభజించి.. కొందరికి రోజూ తినే ఆహారంతోపాటు ఒక అవకాడో పండును అందించారు. రెండో గ్రూప్ వాళ్లకు మాములు ఆహారం పెట్టారు. ఆరు నెలల తర్వాత వాళ్లందరికీ రక్త పరీక్షలు నిర్వహించారు. ఇందులో రోజూ ఒక అవకాడో తిన్న వారి రక్తంలో చెడు కొలెస్ట్రాల్తోపాటు గుండె జబ్బుల ప్రమాదం దాదాపు 4 శాతం వరకు తగ్గినట్టు పరిశోధకులు గుర్తించారు. ఇందుకు గల కారణాలను వివరిస్తూ.. అవకాడోలో మన శరీరానికి మేలుచేసే మోనోఅన్శాచురేటెడ్ ఫ్యాట్ చాలా ఎక్కువగా ఉంటుంది.
ఈ సహజమైన కొవ్వు.. మన శరీరంలో పేరుకుపోయిన చెడు కొవ్వును బయటికి పంపడంలో సమర్థంగా పనిచేస్తుంది. ఇందులోని ఫైబర్.. మనం తినే ఆహారంలోని ఫ్యాట్ను పొట్ట, పేగులు పీల్చుకోకుండా అడ్డుకుంటుందని పరిశోధకులు చెబుతున్నారు. అవకాడాలో ఉండే పొటాషియం బీపీని అదుపులో ఉంచుతుందనీ, విటమిన్ ఇ, యాంటీ ఆక్సిడెంట్లు రక్తనాళాలు దెబ్బతినకుండా కాపాడతాయని వివరిస్తున్నారు. అందుకే.. రోజువారీ ఆహారంలో అవకాడోను చేర్చుకోవడం వల్ల గుండెకు కొండంత రక్షణ లభిస్తుందని అంటున్నారు. అయితే, గుండెకు అవకాడో ఎంత మేలు చేసినప్పటికీ.. ఆరోగ్యకరమైన జీవనశైలిని పాటిస్తేనే గుండెకు పూర్తి రక్షణ లభిస్తుందని నిపుణులు చెబుతున్నారు.
