POCSO Act | పొక్సో చట్టం పిల్లలకు సరైన రక్షణ : దండు మోహన్‌

భారత ప్రభుత్వం పిల్లల రక్షణ కోసం 2012లో రూపొందించిన  (ప్రొటెక్షన్‌ ఆఫ్‌ చిల్డ్​రన్‌ ఫ్రమ్‌ సెక్సువల్‌ అఫెన్సెస్) పోక్సో చట్టం పిల్లలకు సరైన రక్షణ కల్పిస్తుందనీ ప్యానెల్‌ అడ్వొకేట్‌ దండు మోహన్‌ తెలిపారు.

హనుమకొండ చౌరస్తా, అక్టోబర్‌ 27: భారత ప్రభుత్వం పిల్లల రక్షణ కోసం 2012లో రూపొందించిన  (ప్రొటెక్షన్‌ ఆఫ్‌ చిల్డ్​రన్‌ ఫ్రమ్‌ సెక్సువల్‌ అఫెన్సెస్) పోక్సో చట్టం పిల్లలకు సరైన రక్షణ కల్పిస్తుందనీ ప్యానెల్‌ అడ్వొకేట్‌ దండు మోహన్‌ తెలిపారు. హనుమకొండ జిల్లా ఉచిత న్యాయ సేవా సంస్థ కార్యదర్శి, జడ్జీ ఎన్‌.వెంకట హైమా పూజిత ఆదేశాల మేరకు హనుమకొండ రెడ్డికాలనీలోని బాసిత్‌నగర్‌ ప్రభుత్వ హై స్కూల్లో మంగళవారం పోక్సో చట్టంపై అవగాహన సదస్సును నిర్వహించారు.

ముఖ్యఅతిథిగా హాజరైన అడ్వకేట్‌ మోహన్‌ మాట్లాడుతూ ఈ చట్టం 18 సంవత్సరాల వయస్సులోపు పిల్లలకు వర్తిస్తుందని, లైంగిక వేధింపుల పట్ల పిల్లలు అప్రమత్తంగా ఉండాలన్నాలని తగిన మెలకువలను పిల్లలకు వివరించారు. ఎవరో చేసిన తప్పిదానికి పిల్లలు బాధ్యులు కారని, సహాయం కోరి వచ్చిన బాధిత పిల్లలకు తగిన సహాయ, సహకారాలు అందించాలని ఆయన కోరారు. ఈ చట్టం ప్రకారం నేర తీవ్రతనుబట్టి 10 ఏండ్ల నుంచి 20 సంవత్సరాలు, యావజీవ కారాగారం, మరణ శిక్ష కూడా విధించే అవకాశం ఉంటుందన్నారు.

బాధిత పిల్లలు తమకు నమ్మదగిన వ్యక్తుల ద్వారా పోలీసులకు ఫిర్యాదు చేయవచ్చన్నారు. ఉచిత న్యాయ సహాయం కోసం డీఎల్‌ఎస్ఏలో కూడా దరఖాస్తు చేసుకోవాలని మోహన్‌ కోరారు. ఈ సందర్భంగా పిల్లలకు పోక్సో చట్టంపై అవగాహన కల్పించే బ్రోచర్లను విద్యార్థులకు అందజేశారు. కార్యక్రమంలో న్యాయవాది సుందర్‌రామ్‌, బాసిత్‌నగర్‌ హెడ్మాస్టర్‌ పరమేశ్వర్‌, ఉపాధ్యాయులు, విద్యార్థులు పాల్గొన్నారు.