JNS | జేఎన్‌ఎస్‌లో ముగిసిన రీజినల్‌ స్పోర్ట్స్​‍హాస్టల్‌ సెలక్షన్స్​

హనుమకొండ జవహర్‌లాల్‌ నెహ్రూస్టేడియం(జేఎన్‌ఎస్)లో రెండు రోజుల పాటు నిర్వహించిన రీజినల్‌ స్పోర్ట్స్​‍హాస్టల్‌ సెలక్షన్స్​‍మంగళవారం ముగిశాయి.

హనుమకొండ చౌరస్తా, జూలై 28: హనుమకొండ జవహర్‌లాల్‌ నెహ్రూస్టేడియం(జేఎన్‌ఎస్)లో రెండు రోజుల పాటు నిర్వహించిన రీజినల్‌ స్పోర్ట్స్​‍హాస్టల్‌ సెలక్షన్స్​‍మంగళవారం ముగిశాయి. రాష్ర్టవ్యాప్తంగా వివిధ జిల్లాల నుంచి సుమారు 450 మంది క్రీడాకారులు హాజరై తమ ప్రతిభను ప్రదర్శించారు. జిమ్నాస్టిక్స్​​‍, అథ్లెటిక్స్​​‍, రెజ్లింగ్‌, హ్యాండ్‌బాల్‌, స్విమ్మింగ్‌ విభాగాల్లో మిగిలిన సీట్ల భర్తీ కోసం ఈ ఎంపికలను నిర్వహించారు. ఈ సందర్భంగా జిల్లా యువజన, క్రీడల అధికారి కొత్త ప్రశాంత్‌ మాట్లాడుతూ హనుమకొండ రీజినల్‌ స్పోర్ట్స్​‍హాస్టల్‌లో అత్యుత్తమ శిక్షణతో పాటు ఆధునిక సౌకర్యాలు కల్పిస్తున్నామని, రాష్ర్టం నలుమూలల నుంచి క్రీడాకారులు ఉత్సాహంగా పాల్గొనడం స్పోర్ట్స్​‍ హాస్టల్‌పై ఉన్న విశ్వాసానికి నిదర్శనమన్నారు.

ప్రతిభ ఆధారంగానే ఎంపికలు చేపట్టామని, ఎంపికైన క్రీడాకారులకు నాణ్యమైన శిక్షణ అందించి రాష్ర్ట, జాతీయ, అంతర్జాతీయస్థాయిలో రాణించేలా తీర్చిదిద్దుతామన్నారు. ఎంపికైన క్రీడాకారులకు త్వరలో సమాచారం అందజేస్తామని తెలిపారు. ఎంపికల ప్రక్రియను సాట్‌ అబ్జర్వర్లు సతీష్‌రెడ్డి (జిమ్నాస్టిక్స్​​‍ కోచ్‌), దీపక్‌ప్రసాద్‌ (హ్యాండ్‌ బాల్‌ కోచ్‌), సుధాకర్‌యాదవ్‌ (రెజ్లింగ్‌ కోచ్‌), సంతోష్‌చారి(స్విమ్మింగ్‌ కోచ్‌), రాజేష్‌(అథ్లెటిక్స్​​‍ కోచ్‌) పర్యవేక్షించారు. కార్యక్రమంలో డీఎస్ఏ కోచ్‌లు, స్టాఫ్‌ పాల్గొన్నారు.