మనోడే.. ఇచ్చెయ్ ‌!

రాష్ట్ర ప్రభుత్వం కొత్తగా ఎలాంటి అభివృద్ధి పనులు చేపట్టడం లేదు. గతంలో మంజూరైన పనులకు బిల్లు లు చెల్లించడం లేదు. కాంగ్రెస్‌ అధికారంలోకి వచ్చినప్పటి నుంచి ఇదే పరిస్థితి ఉన్నది. నిధుల మంజూరు లేకపోవడంతో వరంగల్‌ నగరంలో అభివృద్ధి పనులు ఆగిపోతున్నాయి. గతంలో మంజూరైన పనులు చేసిన వారి పరిస్థితి ఇబ్బందికరంగా ఉన్నది. వారంలో ఆర్థిక సంవత్సరం ముగియనున్నది.

• గ్రేటర్‌ బిల్లుల చెల్లింపులో అవినీతి
• రాష్ట్ర ప్రభుత్వం నుంచి రాని నిధులు
• ఆర్థిక సంవత్సరం చివరలో పన్నుల వసూలు
• పన్నుల నిధులతో వరుసగా బిల్లుల చెల్లింపులు
• వారంలోనే కాంట్రాక్టర్లకు రూ.10 కోట్లు
• ఓ ఎమ్మెల్యే చెప్పిన వారికి ఏకంగా రూ.8 కోట్లు
• క్యాంపు కార్యాలయంలో ప్రైవేట్‌ వ్యక్తి డీల్‌
• కమిషనర్‌ తీరుపై కొందరు కాంట్రాక్టర్ల అసంతృప్తి
• మంత్రికి, ఆమె భర్తకు ఫిర్యాదు చేయాలని నిర్ణయం

వరంగల్‌, మార్చి 22(నమస్తే తెలంగాణ ప్రతినిధి) : రాష్ట్ర ప్రభుత్వం కొత్తగా ఎలాంటి అభివృద్ధి పనులు చేపట్టడం లేదు. గతంలో మంజూరైన పనులకు బిల్లు లు చెల్లించడం లేదు. కాంగ్రెస్‌ అధికారంలోకి వచ్చినప్పటి నుంచి ఇదే పరిస్థితి ఉన్నది. నిధుల మంజూరు లేకపోవడంతో వరంగల్‌ నగరంలో అభివృద్ధి పనులు ఆగిపోతున్నాయి. గతంలో మంజూరైన పనులు చేసిన వారి పరిస్థితి ఇబ్బందికరంగా ఉన్నది. వారంలో ఆర్థిక సంవత్సరం ముగియనున్నది.

గ్రేటర్‌ వరంగల్‌ మున్సిపల్‌ కార్పొరేషన్‌ పరిధిలో పన్నుల వసూలు జోరుగా జరుగుతున్నది. రోజువారీగా పోగైన నిధులను జీడబ్ల్యూఎంసీ తక్కువ బడ్జెట్‌తో పూర్తయిన సీసీ రోడ్లు, డ్రైనేజీలు వంటి పనుల బిల్లుల చెల్లింపులు చేస్తున్నది. ఈ చెల్లింపుల్లో జీడబ్లూఎంసీలోని ఉన్నతాధికారులు దందా మొదలుపెట్టారు. తేదీల పరంగా పెండింగ్‌ బిల్లులు చెల్లించకుండా కమీషన్లు ఇచ్చిన వారి బిల్లులనే ఓకే చేస్తున్నారు. జీడబ్ల్యూఎంసీ సాధారణ నిధుల నుంచి రెండు రోజుల్లోనే రూ.10 కోట్ల బిల్లులు చెల్లించగా గ్రేటర్‌ పరిధిలోని ఓ ఎమ్మెల్యే సూచించిన కొందరికి ఏకంగా రూ.8 కోట్లు చెల్లించినట్లు తెలిసింది.

• జీడబ్ల్యూఎంసీలో ఎప్పుడూ లేని విధంగా ఉన్నతాధికారి క్యాంపు ఆఫీసులోనే కాంట్రాక్టర్లు వచ్చి కమీషన్లపై చర్చలు జరుపుతున్నట్లు ఆరోపణలున్నాయి. జీడబ్ల్యూఎంసీతో సంబం ధం లేని ఓ ప్రైవేట్‌ వ్యక్తి మధ్యవర్తిగా వ్యవహరిస్తున్నట్లు తెలిసింది. ప్రైవేట్‌ వ్యక్తి ముందుగా కాంట్రాక్టర్లను కలిసి చర్చలు జరిపి తర్వాత.. ఆఫీసులోని ఓ అధికారి పక్కగా ప్లాన్‌ అమలు చేస్తున్నట్లు తెలుస్తున్నది. ఇంజినీరింగ్‌ విభాగం ఉన్నతాధికారి, పనుల పరిధిలోని అధికారుల మధ్య ఒప్పందం మేరకు కమీషన్లు ముట్టిన తర్వాత సదరు వ్యక్తి సూచన మేరకే బిల్లుల చెల్లింపులు జరుగుతున్నట్లు తెలిసింది. బిల్లులు చెల్లించే జాబితాలోని కాంట్రాక్టర్లను ప్రైవేట్‌ వ్యక్తి ఎమ్మెల్యే వద్దకు పంపించి ఫలనా వారి బి ల్లులు చెల్లించాలని జీడబ్ల్యూఎంసీ ఉన్నతాధికారులకు ఫోన్లు చేయిస్తున్నారు. తర్వాత అకౌంట్ల విభాగంలో చెల్లింపులు వేగంగా జరుగుతున్న ది. ప్రైవేట్‌ వ్యక్తితో ఒప్పందం ఉన్న కాంట్రాక్టర్లకు వెంటనే చెక్కులు రాసి ఇస్తున్నట్లు ఆరోపణలున్నాయి. ఈ వ్యవహారంలో వసూళ్ల దందా నడుస్తున్నట్లు తెలిసింది. ఏండ్లుగా ఇదే సెక్షన్‌లో పని చేస్తున్న ఓ అధికారి ఇష్టారాజ్యంగా అవినీతికి పాల్పడుతున్నట్లు ఆరోపణలు వ్యక్తమవుతున్నా యి. బిల్లులోని మొత్తాన్ని బట్టి చెల్లింపు సమయంలో వాటా నిర్ణయించి వసూలు చేస్తున్న పరిస్థితి ఉన్నది. అకౌంట్‌ సెక్షన్‌లోని ఆ అధికారిని ముందుగా కలిసిన వారికి.. ఫోన్లు చేసి మరీ బిల్లుల చెక్కులను అందజేస్తున్నారు. ఫలానా రోజు, ఫలానా సమయానికి వచ్చి చెక్కు తీసుకోవాలని చెబుతున్నారని తెలిసింది.
• జీడబ్ల్యూఎంసీ ఉన్నతాధికారి క్యాంప్‌ ఆఫీసులోని ఓ అధికారి ముందుగా కొంద రు కాంట్రాక్టర్లతో ఒప్పందాలు చేసుకొని, వారిని ఎమ్మెల్యే వద్దకు పంపి బిల్లులు చెల్లించేలా ప్లాన్‌ వేసినట్లు ఆరోపణలున్నా యి. పనులు చేసిన తేదీల ఆధారంగా కా కుండా కమీషన్ల ప్రాతిపదికన బిల్లుల చెల్లిం పులపై మిగిలిన కాంట్రాక్టర్లు మేయర్‌కు ఫిర్యాదు చేశారు. ఫలితం లేకపోవడంతో మంత్రికి, ఆమె భర్తకు ఫిర్యాదు చేయాలని నిర్ణయించారు. కొందరు కాంట్రాక్టర్లు శనివారం రాత్రి మంత్రి భర్తను కలిసి బిల్లుల చెల్లింపుల దందా గురించి వివరించినట్లు తెలిసింది. అసెంబ్లీ సమావేశాల నుంచి మంత్రి రాగానే ఆమెకు ఏకరువు పెట్టేందుకు వీరంతా సిద్ధమయ్యారు.