టార్గెట్లు పెట్టి మరీ..!

ప్రజాపాలన విజయోత్సవ సభ కోసం ప్రభుత్వ అధికారులకు టార్గెట్లు పెట్టి మరీ జన సమీకరణ చేయిస్తున్నది. కాంగ్రెస్‌ సర్కారు విజయోత్సవాల్లో భాగంగా ఇందిర మహిళా శక్తి పేరిట నగరంలోని ఆర్ట్స్‌ అండ్‌ సైన్స్‌ కాలేజీ గ్రౌండ్‌లో మంగళవారం బహిరంగ సభ నిర్వహిస్తున్నది.

• జన సమీకరణ కోసం అధికారులపై ఒత్తిడి
• ఎస్‌హెచ్‌జీ మహిళలు విధిగా రావాలని ఆదేశాలు

హనుమకొండ చౌరస్తా, నవంబర్‌ 18 : ప్రజాపాలన విజయోత్సవ సభ కోసం ప్రభుత్వ అధికారులకు టార్గెట్లు పెట్టి మరీ జన సమీకరణ చేయిస్తున్నది. కాంగ్రెస్‌ సర్కారు విజయోత్సవాల్లో భాగంగా ఇందిర మహిళా శక్తి పేరిట నగరంలోని ఆర్ట్స్‌ అండ్‌ సైన్స్‌ కాలేజీ గ్రౌండ్‌లో మంగళవారం బహిరంగ సభ నిర్వహిస్తున్నది. అయితే మహిళలను సమీకరించే బాధ్యతను జిల్లా గ్రామీణాభివృద్ధి అధికారుల(డీఆర్డీవో)కు బాధ్యతలను అప్పగించింది.

ఎంపీడీవోలు, వీవోలు, ఎస్‌హెచ్‌జీ గ్రూపుల్లోని ప్రతి మహిళను వరంగల్‌ మీటింగ్‌కు రావాలని ప్రభుత్వ పెద్దలు ఒత్తిడి తెస్తున్నారు. వరంగల్‌ బహిరంగ సభ జన సమీకరణ కోసం కాంగ్రెస్‌ ప్రభుత్వం రాష్ట్రవ్యాప్తంగా 900 ఆర్టీసీ బస్సులను వాడుకుంటున్నది. వరంగల్‌ ఉమ్మడి జిల్లాలోనే 150 బస్సులను కేటాయించింది. దీనికి తోడు ఇతర వాహనాల్లో సాధారణ జనాన్ని తరలించేలా అధికారులు ఏర్పాట్లు చేస్తున్నారు. కాంగ్రెస్‌ పార్టీ కార్యక్రమంలా జరుగుతున్న వరంగల్‌ బహిరంగ సభ కోసం అధికార ఒత్తిడి తేవడంపై అధికారులు అసంతృప్తి వ్యక్తం చేస్తున్నారు. మంగళవారం సీఎం రేవంత్‌రెడ్డితో పాటు పలువురు మంత్రులు హనుమకొండ జిల్లా పర్యటనకు రానున్నారు.

సీఎం పర్యటన షెడ్యూల్‌

• మధ్యాహ్నం 2.30 గంటలకు : హెలికాప్టర్‌లో హనుమకొండలోని కుడా గ్రౌండ్‌కు చేరుకుంటారు.
• 2.30 నుంచి 3.10 : కాళోజీ కళాక్షేత్రం ప్రారంభిస్తారు. ఆర్ట్‌ గ్యాలరీని తిలకిస్తారు.
• 3.10 నుంచి 3.20 : కుడా గ్రౌండ్‌ నుంచి ఆర్ట్స్‌ కాలేజీ గ్రౌండ్‌కు చేరుకుంటారు.
• 3.20 నుంచి 3.50 : ఆర్ట్స్‌ కాలేజీ గ్రౌండ్‌లో ఏర్పాటుచేసిన మహిళా సంఘాల స్టాళ్లను సందర్శించి, మహిళలతో మాట్లాడుతారు.
• 3.50 నుంచి 3.55 : ఇందిర మహిళా శక్తి సభ కార్యక్రమాన్ని ప్రారంభిస్తారు.
• 3.55 నుంచి 4.00 : ప్రభుత్వ ప్రధాన కార్యదర్శి శాంతికుమారి స్వాగతోపన్యాసం.
• 4.00 నుంచి 4.20 : మంత్రుల ప్రసంగాలు
• 4.20 నుంచి 4.30 : 22 ఇందిరా మహిళా శక్తి భవనాలకు, ట్రాన్స్‌జెండర్ల క్లినిక్స్‌కు వర్చువల్‌ పద్ధతిలో శంకుస్థాపన. బ్యాంకు లింకేజీ, బీమా చెక్కుల పంపిణీ. టీజీఆర్టీసీ-డిస్కంలతో ఎంవోయూ.
• 4.30 నుంచి 4.40 : ఉప ముఖ్యమంత్రి భట్టి విక్రమార్క ప్రసంగం
• 4.40 నుంచి 5.00 : ముఖ్యమంత్రి రేవంత్‌రెడ్డి ప్రసంగం.
• 5 గంటలకు : హనుమకొండ కలెక్టర్‌ వందన సమర్పణ.