జేఎన్‌ఎస్‌లో 9వ రాష్ట్రస్థాయి అథ్లెటిక్స్‌ పోటీలు షురూ

రాష్ట్రస్థాయి అథ్లెటిక్స్‌ చాంపియన్‌షిప్‌ పోటీలు శనివారం అట్టహాసంగా ప్రారంభమయ్యాయి. హనుమకొండలోని జవహర్‌లాల్‌ నెహ్రూ స్టేడియం(జేఎన్‌ఎస్‌)లో జరిగిన పోటీల్లో వివిధ జిల్లాల నుంచి అథ్లెటిక్స్‌ హాజరై నువ్వా.. నేనా అంటూ పోటీపడ్డారు.

• హాజరైన 503 మంది క్రీడాకారులు.. రెండు రోజులు.. 48 ఈవెంట్ల నిర్వహణ
• చదువుతో పాటు క్రీడలు ఎంతో అవసరం : చీఫ్‌ విప్‌ దాస్యం వినయ్‌భాస్కర్‌
• కష్టపడితేనే లక్ష్యం సాధ్యం : అర్జున అవార్డు గ్రహీత జేజే శోభ
• నేటితో పోటీల ముగింపు

రాష్ట్రస్థాయి అథ్లెటిక్స్‌ చాంపియన్‌షిప్‌ పోటీలు శనివారం అట్టహాసంగా ప్రారంభమయ్యాయి. హనుమకొండలోని జవహర్‌లాల్‌ నెహ్రూ స్టేడియం(జేఎన్‌ఎస్‌)లో జరిగిన పోటీల్లో వివిధ జిల్లాల నుంచి అథ్లెటిక్స్‌ హాజరై నువ్వా.. నేనా అంటూ పోటీపడ్డారు. రెండు రోజులు జరిగే పోటీలకు మొత్తం 503 మంది క్రీడాకారులు తరలివచ్చారు. ముఖ్యఅతిథిగా చీఫ్‌విప్‌ దాస్యం వినయ్‌భాస్కర్‌ హాజరై ప్రతి విద్యార్థికి చదువుతోపాటు క్రీడలు అవసరమని సూచించారు. అలాగే, కార్యక్రమంలో డబుల్‌ ఒలింపియన్‌, అర్జున అవార్డు గ్రహీత జేజే శోభ హాజరై క్రీడాకారుల్లో ఉత్సాహం నింపారు.

– నయీంనగర్‌, ఫిబ్రవరి 25

నయీంనగర్‌, ఫిబ్రవరి 25 : హనుమకొండలోని జేఎన్‌ఎస్‌(జవహర్‌లాల్‌ నెహ్రూ స్టేడియం) వేదికగా 9వ రాష్ట్రస్థాయి అథ్లెటిక్స్‌ చాంపియన్‌ షిప్‌-2023 పోటీలు శనివారం అట్టహాసంగా ఆరంభమయ్యాయి. రెండు రోజుల పాటు జరిగే ఈ పోటీల్లో పాల్గొనేందుకు వివిధ ప్రాంతాల నుంచి 503మంది క్రీడాకారులు తరలివచ్చారు. పోటీలకు ముఖ్య అతిథిగా ప్రభుత్వ చీఫ్‌ విప్‌ దాస్యం వినయ్‌భాస్కర్‌ హాజరు కాగా డబుల్‌ ఒలింపియన్‌, అర్జున అవార్డు గ్రహీత జేజే శోభ రాక అథ్లెట్లలో ఉత్సాహం నింపింది. మొత్తం 48 ఈవెంట్లు నిర్వహించనుండగా తొలిరోజు వివిధ క్రీడాంశాల్లో అథ్లెట్లు సత్తాచాటారు. ఎండను సైతం లెక్క చేయక ఒకరికి మించి ఒకరు ఆట తీరును ప్రదర్శిస్తూ నువ్వానేనా అన్నట్లు తలపడ్డారు.

తొలిరోజు విజేతల వివరాలు

• వంద మీటర్లలో బాయ్స్‌(అండర్‌ 18) హైదరాబాద్‌కు చెందిన సింగనేని హర్షవర్దన్‌ 10.7 సెకన్లలో కొట్టి మొదటి స్థానంలో నిలిచారు. రెండవ స్థానంలో నల్గొండకు చెందిన అన్వేష్‌రెడ్డి11.0 సె.లు. హైదరాబాద్‌కు చెందిన అనూప్‌కుమార్‌ 11.7 సెం.తో 3వ స్థానానికి పరిమితమయ్యారు.
• 400మీటర్స్‌లో నల్గొండకు చెందిన షేక్‌ అజారుద్దిన్‌ 49.4 సెకన్లలో కొట్టి మొదటి స్థానంలో నిలువగా రెండవ స్థానంలో నల్గొండకు చెందిన రమేశ్‌ 50.0సె.లు, భద్రాద్రి కొత్తగూడేనికి చెందిన అశోక్‌ 53.6 సెకన్లతో 3వ స్థానంలో ఉన్నారు.
• 1500మీటర్లలో వరంగల్‌కు చెందిన రఘునాథ్‌ 4:41.5 సెకన్లతో మొదటిస్థానంలో నిలువగా, హనుమకొండకు చెందిన అఖీరానందన్‌ 4:42.8 సెకన్లతో రెండవ స్ధానంలో, మేడ్చల్‌ తిరుమలేశ్‌ 4:55.2 సె.తో మూడవ స్థానంలో నిలిచారు.
• 10వేల రేస్‌వాక్‌లో టీఏఏకు చెందిన దర్శ్‌వీర్‌సింగ్‌ 1:02:22.2 సెకన్లలో కొట్టి మొదటి స్థానంలో నిలిచారు. రెండవ స్థానంలో ఖమ్మంకు చెందిన గోపిచంద్‌1::04:10.2సె.లు
• డిస్కస్‌త్రో 1.5 కేజీల విభాగంలో జయశంకర్‌ భూపాలపల్లి జిల్లాకు చెందిన రాకేశ్‌ 27.35 మీటర్స్‌ వేసి మొదటి స్థానంలో నిలిచారు. రెండవ స్ధానంలో జనగామకు చెందిన కార్తీక్‌ 26.76మీటర్లు, 3వ స్థానంలో ములుగుకు చెందిన అభిలాష్‌ 26.11 మీటర్లు ఉన్నారు.
• హ్యామర్‌త్రో 5 కేజీల విభాగంలో రాజన్న సిరిసిల్ల జిల్లాకు చెందిన నెలమరి వెంకటేశ్‌ 36.78 మీటర్లు వేసి మొదటి స్థానంలో సిద్దిపేటకు చెందిన గుగులోత్‌ తిరుపతి 26.02మీ.తో రెండో స్థానంలో, ఆదిలాబాద్‌కు చెందిన అనిల్‌ 17.51 మీ.తో 3వ స్థానంలో నిలిచారు.
• షాట్‌పుట్‌ 5 కేజీల విభాగంలో ఆదిలాబాద్‌కు చెందిన మాధవి చిన్నరామ్‌1 3.22 మీటర్లు వేసి మొదటి స్థానంలో నిలువగా నారాయణపేట్‌కు చెందిన రవికుమార్‌ 12.56 మీ.తో రెండో స్థానంలో, హనుమకొండకు చెందిన రాజ్‌కుమార్‌12.14మీ.తో 3వ స్థానంలో ఉన్నారు.
• హైజంప్‌లో భద్రాద్రికొత్తగూడేనికి చెందిన వినయ్‌ 1.69 మీటర్లు వేసి మొదటి స్థానంలో, ఆదిలాబాద్‌కు చెందిన సెహ్వాగ్‌ 1.66మీ.తో రెండవ స్థానంలో నిలిచారు.
• లాంగ్‌జంప్‌లో భద్రాద్రికొత్తగూడేనికి చెందిన అబిన్‌నాయక్‌ 6.77మీటర్లు వేసి మొదటి స్థానంలో నిలిచారు. నిజామాబాద్‌కు చెందిన నాగ్‌నాథ్‌ 6.18మీ రెండో స్థానంలో, హనుమకొండకు చెందిన అంజి 6.02 మీ.తో 3వ స్థానంలో ఉన్నారు.
• 400 మీటర్ల పరుగుపందెంలో నల్గొండకు చెందిన కే.సింధు 1:00.5 సెకన్లలో మొదటి స్థానంలో నిలువగా, భద్రాద్రికొత్తగూడేం ఎం.సింధు 1:04.2 సె.తో రెండో స్థానంలో, ఖమ్మంకు చెందిన షేక్‌ అఫ్రీన్‌1:04.6 సె.తో మూడవ స్థానంలో ఉన్నారు.
• 1500 మీటర్లు గర్ల్స్‌ విభాగంలో నల్గొండకు చెందిన అఖిల 4:59.3 సెకన్లలో కొట్టి మొదటి స్థానంలో నిలువగా జయశంకర్‌ భూపాలపల్లికు చెందిన అనూష 8:05.9 సె.తో రెండో స్థానంలో నిలిచారు.

ఆటలూ ముఖ్యమే..
ప్రతి విద్యార్థికి చదువుతో పాటు ఆటలూ ఎంతో అవసరం అని రాష్ట్ర ప్రభుత్వ చీఫ్‌ విప్‌ దాస్యం వినయ్‌భాస్కర్‌ అన్నారు. సీఎం కేసీఆర్‌, మంత్రి కేటీఆర్‌ సహకారంతో జిల్లా ఐటీ, ఎడ్యుకేషన్‌ హబ్‌గా వెలుగొందుతున్నదన్నారు. అలాగే స్పోర్ట్స్‌ హబ్‌గా తీర్చిదిద్దేందుకు కృషి చేస్తున్నామని చెప్పారు. రానున్న రోజుల్లో మరిన్ని ఈవెంట్లు నిర్వహించేందుకు ముందుకురావాలని అందుకు తన పూర్తి సహకారం ఉంటుందని తెలిపారు.

కష్టపడితే లక్ష్యసాధన సులువే : అర్జున అవార్డు గ్రహీత జేజే శోభ
‘క్రీడాకారులు ఎంత కష్టపడితే అంత సులువుగా లక్ష్యానికి చేరువవుతారు. తెలంగాణ రాష్ట్రంలో మంచి క్రీడాకారులు ఉన్నారు. ప్రతిభ ఉన్న వారికి తల్లిదండ్రుల సహకారం ఎంతో అవసరం. క్రీడాకారులకు నేడు అన్ని రకాల వసతులు ఉన్నాయి. వాటిని ఉపయోగించుకుని ముందుకుపోవాలి’ అంటూ డబుల్‌ ఒలింపియన్‌, అర్జున అవార్డు గ్రహీత జేజే శోభ పేర్కొన్నారు. జేఎస్‌ఎన్‌లో జరిగే అథ్లెటిక్స్‌ పోటీలకు గెస్ట్‌గా హాజరైన సందర్భంగా ‘నమస్తే తెలంగాణ’తో కాసేపు ముచ్చటించారు. క్రీడల్లో ఆమె రాణించిన తీరు.. అనుభవాలను పంచుకున్నారు.

జేజే శోభ కర్ణాటకలో ధార్వాడ్‌ సమీపంలోని పశుపతిహాల్‌ అనే కుగ్రామంలో జన్మించారు. 7వ తరగతి నుంచే క్రీడలంటే ఎంతో ఇష్టం. ఆటలపై ఆమెకున్న ఆసక్తిని గమనించిన ఉపాధ్యాయులు స్పోర్ట్స్‌ హాస్టల్‌లో వేయాలని తల్లిదండ్రులకు సలహా ఇచ్చారు. ఇలా తల్లిదండ్రుల ప్రోత్సాహంతో హాస్టల్‌ బాటపట్టిన శోభ.. ఇటు చదువుతో పాటు క్రీడలపై ఎంతో శ్రద్ధ చూపారు. అప్పటినుంచి ఆమెలో ఉత్సాహం, పట్టుదల నేడు ఇలా అందరిముందు నిలబెట్టేలా చేశాయి. మేము చదువుకొనే రోజుల్లో ఎవ్వరికీ ఆటలంటే ఎక్కువగా తెలిసేది కాదని, వసతులు సరిగ్గా ఉండేవి కావంటారామె. కానీ నేడు అన్ని వసతులు ఉన్నాయని.. క్రీడాకారులు సరిగ్గా దృష్టి పెడితే మంచి అవకాశాలు మెండుగా ఉన్నాయంటూ క్రీడాకారులకు దిశానిర్దేశం చేశారు శోభ.

జేజే శోభ సాధించిన విజయాలు

• 2004లో అథెన్స్‌ గ్రేస్‌లో నిర్వహించిన ఒలింపిక్స్‌లో 11వ స్థానంలో నిలిచారు.
• 2008 బీజింగ్‌లో నిర్వహించిన ఒలింపిక్స్‌లో పాల్గొన్నారు.
• 2002, 2006లో ఏషియన్‌ గేమ్‌లో బ్రాంజ్‌ మెడల్‌ సాధించారు.
• 2002, 2007లో ఏషియన్‌ అథ్లెటిక్స్‌లో చాంపియన్‌ షిప్‌లో సిల్వర్‌ మెడల్‌ సాధించారు.
• 4×4 రిలే గోల్డ్‌మెడల్‌, 2004 హెప్టాథ్లాన్‌లో 6,211 పాయింట్లు సాధించి నేషనల్‌ రికార్డు సృష్టించారు.
• లాంగ్‌ జంప్‌లో 6.66 మీటర్లు పాల్గొని ప్రతిభ చూపారు. ఇలా శోభ ఇండియాలోనే బెస్ట్‌గా నిలిచారు. ప్రస్తుతం ఈమె సికింద్రాబాద్‌ సౌత్‌సెంట్రల్‌ రైల్వే స్పోర్ట్స్‌ ఆఫీసర్‌గా పనిచేస్తున్నారు.