ఇంట్లో రోగులకు రెమ్‌డెసివిర్‌ వద్దు

• దవాఖానలోని కరోనా రోగులకు మాత్రమే దాన్నివ్వాలి
• హోంఐసోలేషన్‌ రోగులకు నోటి ద్వారా స్టెరాయిడ్లు ఇవ్వొద్దు
• ఆక్సిజన్‌ స్థాయిలు తగ్గితే వెంటనే దవాఖానలో చేర్చాలి
• రోగులు రోజుకు కనీసం రెండుసార్లు ఆవిరి పట్టడం మంచిది
• హెచ్‌ఐవీ, క్యాన్సర్‌ థెరపీ తీసుకుంటున్న వారికి హోంఐసోలేషన్‌ వద్దు
• హోం ఐసోలేషన్‌లో ఉన్నవారి కోసం కేంద్రం కొత్త మార్గదర్శకాలు

హెచ్‌ఐవీ పాజిటివ్‌, అవయవ మార్పిడి చేయించుకున్న వారు, క్యాన్సర్‌ థెరపీ తీసుకుంటున్న వారు హోంఐసోలేషన్‌లో ఉండటానికి అనుమతి లేదు. ఒకవేళ తప్పనిసరి పరిస్థితిల్లో ఉండాల్సి వస్తే, వైద్యుల సూచనలు తప్పక పాటించాలి.
60 ఏండ్లు పైబడి.. హైపర్‌ టెన్షన్‌, మధుమేహం, గుండె జబ్బులు, ఊపిరితిత్తులు, కాలేయం, కిడ్నీ సమస్యలతో బాధపడేవారు వైద్యులు పూర్తిగా పరీక్షించిన తర్వాతనే హోం ఐసోలేషన్‌లో ఉండాలి.
కరోనా పాజిటివ్‌గా నిర్ధారణ అయిన తర్వాత కనీసం 10 రోజులు తక్కువ కాకుండా హోం ఐసోలేషన్‌లో ఉండాలి. అది కూడా వరుసగా మూడు రోజులు జ్వరం, దగ్గు ఉండకూడదు.

న్యూఢిల్లీ, ఏప్రిల్‌ 29: దేశంలో సెకండ్‌వేవ్‌ (కరోనా రెండో ఉద్ధృతి) కారణంగా రోగుల తాకిడి పెరిగింది. దవాఖానల్లో బెడ్ల కొరతతో ఎక్కువమంది స్వీయ నిర్బంధంలో ఉంటూ వైద్యులు సూచనలతో కరోనా నుంచి కోలుకుంటున్నారు. మధ్యస్థాయి/లక్షణాలు లేని వారికి సంబంధించి కేంద్ర ఆరోగ్యమంత్రిత్వ శాఖ ఇదివరకు జారీచేసిన మార్గదర్శకాల్లో స్వల్ప మార్పులు చేసి కొత్త మార్గదర్శకాలు గురువారం విడుదల చేసింది. రెవ్‌ుడెసివిర్‌ ఇంజక్షన్‌ను ఇంట్లో చికిత్స తీసుకుంటున్న కరోనా రోగులు వాడకూడదని తేల్చిచెప్పింది.

కేంద్ర ఆరోగ్యమంత్రిత్వశాఖ సవరించిన మార్గదర్శకాలు..

• ఇంట్లో ఉండి చికిత్స తీసుకుంటున్న మధ్యస్థాయి/లక్షణాలు లేని వారు రెవ్‌ుడెసివిర్‌ ఔషధాన్ని వాడొద్దు. దవాఖానల్లో చికిత్స తీసుకుంటున్న రోగులు మాత్రమే దీన్ని తీసుకోవాలి.
• నోటి ద్వారా ఎలాంటి స్టెరాయిడ్లు తీసుకోకూడదు. ఏడు రోజులు దాటిన తర్వాత కూడా జ్వరం, దగ్గు ఉంటే వైద్యుల సూచనల మేరకే కొంత మోతాదులో వీటిని వాడాలి.
• శ్వాస తీసుకోవడంలో ఇబ్బంది, ఆక్సిజన్‌ స్థాయిలు తగ్గడం వంటి సమస్యలు ఉన్నవాళ్లు వెంటనే దవాఖానలో చేరాలి. వైద్యుల పర్యవేక్షణలో మాత్రమే వాళ్లు చికిత్స తీసుకోవాలి.
• రోగులు గోరు వెచ్చని నీటిని పుక్కిలించడం చేయాలి. రోజుకు కనీసం రెండుసార్లు ఆవిరి పట్టాలి.
• పారాసిటమాల్‌ 650 ఎంజీ రోజుకు నాలుగు సార్లు వేసుకున్నప్పటికీ, జ్వరం తగ్గకపోతే తప్పనిసరిగా వైద్యుడిని సంప్రదించాలి. రోగి ఆరోగ్య పరిస్థితిని బట్టి నాన్‌-స్టెరాయిడ్‌ యాంటీ ఇన్‌ఫ్లమేటరీ డ్రగ్‌-ఎన్‌ఎస్‌ఏఐడీ (ఉదాహరణకు రోజుకు రెండుసార్లు నాప్రోక్సెన్‌ 250 ఎంజీ)ను వైద్యులు సూచించవచ్చు. అలాగే, ఐవర్‌మెక్‌టిన్‌ (ఖాళీ కడుపుతో వేసుకునేది) ట్యాబ్లెట్లను 3 నుంచి 5 రోజులు వాడేందుకు అనుమతి ఇవ్వొచ్చు.
• ఐదు రోజుల పాటు జ్వరం, దగ్గు ఉంటే ఇన్‌హెలేషనల్‌ బ్యూడెసనైడ్‌ (ఇన్‌హేలర్‌ ద్వారా తీసుకునే మందు) ను రోజుకు రెండుసార్లు వైద్యులు సూచించవచ్చు.
• కొవిడ్‌-19 పాజిటివ్‌గా నిర్ధారణ అయ్యి, శ్వాస తీసుకోవడంలో ఇబ్బందులు లేకపోవడం, 94 శాతానికి పైన ఆక్సిజన్‌ స్థాయిలు ఉండటం, జ్వరం వంటివి లేకపోతే వారిని లక్షణాలు లేనివారిగా గుర్తించాలి. వైద్యుల సూచన మేరకు వాళ్లు మందులు వేసుకోవాలి. కుటుంబ సభ్యులకు దూరంగా ఉండాలి.
• మధ్య స్థాయి లక్షణాలు కలిగిన వారు, లక్షణాలు లేని వారు హైడ్రాక్సీక్లోరోక్విన్‌ మాత్రలు వాడొచ్చు. హోం ఐసోలేషన్‌లో ప్రత్యేకంగా కేటాయించిన గదిలో ఉండటం మేలు. కుటుంబ సభ్యులకు ముఖ్యంగా వృద్ధులకు దూరంగా ఉండాలి.
• హోంఐసోలేషన్‌లో ఉన్నవారు గదిలో గాలి, వెలుతురు ప్రసరించేలా చూసుకోవాలి. మాస్క్‌ ధరించే ఉండాలి.
• హోంఐసోలేషన్‌లో ఉన్నవారికి ఆహారం అందించే వ్యక్తులు తప్పనిసరిగా మాస్క్‌ ధరించాలి. ఇరువురూ ఎన్‌-95 మాస్క్‌ ధరిస్తే మంచిది.
• రోగి వాడిన మాస్క్‌లను సోడియం హైపోక్లోరైట్‌ ద్రావణంలో శుద్ధి చేసిన తర్వాతే
• పారేయాలి.
• కరోనా బారిన పడినవారు వీలైనంత ఎక్కువ సేపు విశ్రాంతి తీసుకోవాలి. శరీరం తేమను కోల్పోకుండా ద్రవ పదార్థాలు తీసుకోవాలి. వారు వినియోగించిన వస్తువులను ఇతరులు వాడొద్దు.
• హోంఐసోలేషన్‌ వ్యవధి పూర్తయిన తర్వాత ఇంకోసారి కరోనా పరీక్షలు అవసరం లేదు.