Visit:
BRS | హైదరాబాద్‌, ఏప్రిల్‌ 24 (నమస్తే తెలంగాణ): హనుమకొండ జిల్లా ఎల్కతుర్తిలో జరిగే బీఆర్‌ఎస్‌ రజతోత్సవ సభా ప్రాంగణానికి సులువుగా చేరుకునేలా జోన్లవారీగా రూట్‌ మ్యాప్‌లను సిద్ధం చేశారు. లక్షలాదిగా తరలి వచ్చే బీఆర్‌ఎస్‌ బంధుగణం కోసం 5 జోన్లను ఏర్పాటు చేస్తున్నారు. ఆయా జోన్ల వారీగా ప్రత్యేకంగా 5 పార్కింగ్‌ జోన్లను సైతం సిద్ధంచేశారు. వాటిని ముందుగానే అత్యంత పకడ్బందీగా సిద్ధంచేశారు. సభా ప్రాంగణానికి మొత్తం నాలుగు రహదారుల గుండా వాహనాలు చేరుకునేలా ఏర్పాట్లు చేశారు. అందులో మూడు జాతీయ రహదారులు (వరంగల్‌, సిద్దిపేట, కరీంనగర్‌) సహా సభ జరిగే చింతలపల్లికి చేరుకునేలా ధర్మసాగర్‌ నుంచి వచ్చే మరో రూట్‌ను కూడా సిద్ధం చేశారు. జిల్లాల వారీగా రూట్‌మ్యాప్‌ల వివరాలు కింది విధంగా ఉన్నాయి.
వరంగల్‌ నుంచి : ఇది 163వ జాతీయ రహదారి. ఈ రూట్‌ గుండా వరంగల్‌, ఖమ్మం, నల్లగొండ, మహబూబ్‌నగర్‌, రంగారెడ్డి ఉమ్మడి జిల్లాలు సహా హైదరాబాద్‌ నుంచి బీఆర్‌ఎస్‌ శ్రేణులు వచ్చే అవకాశం ఉన్నది.
సిద్దిపేట-హుస్నాబాద్‌ నుంచి: ఇది 765వ డీజీ జాతీయ రహదారి. ఈ రూట్‌ నుంచి మెదక్‌, నిజామాబాద్‌ ఉమ్మడి జిల్లాలు సహా వెస్ట్‌ ఆదిలాబాద్‌ (ఆదిలాబాద్‌, నిర్మల్‌, బోథ్‌, ఖానాపూర్‌ నియోజక వర్గాలు) నుంచి కార్యకర్తలు వస్తారు.
కరీంనగర్‌ రూట్‌ : ఇది 563వ జాతీయ రహదారి. ఈ రూట్‌ గుండా ఉమ్మడి కరీంనగర్‌, ఈస్ట్‌ ఆదిలాబాద్‌ (సిర్పూర్‌ కాగజ్‌నగర్‌, బెల్లంపల్లి, చెన్నూరు, మంచిర్యాల, ఆసిఫాబాద్‌, భూపాలపల్లి, కొంత పరకాల నియోజకవర్గాలు) నుంచి కార్యకర్తలు తరలివస్తారు.
ధర్మసాగర్‌ రూట్‌: ధర్మసాగర్‌ నుంచి చింతలపల్లి సభ జరిగే ప్రాంగణానికి అనుకుని ఉన్న రోడ్డు ఇది. ఈ రూట్‌ నుంచి స్టేషన్‌ ఘనపూర్‌, జనగామ నియోజకవర్గాల నుంచి వాహనాలు వచ్చే అవకాశం ఉన్నది.
జోన్‌ 1: నేషనల్‌ హైవే 163 మీదుగా గుడెప్పాడ్‌, ఆరేపల్లి, హసన్‌పర్తి, ఎల్లాపూర్‌ వైపు నుంచి వచ్చే వాహనాలతోపాటు మరో రూట్‌ అయిన హసన్‌పర్తి, ఎల్లాపూర్‌ మీదుగా ఈ పారింగ్‌ స్థలానికి చేరుకునే అవకాశం ఉన్నది. మరోవైపు కాకతీయ యూనివర్సిటీ క్రాస్‌ రోడ్‌ వరకు వివిధ మార్గాల ద్వారా చేరుకున్న వాహనాలు హసన్‌పర్తి, ఎల్లాపూర్‌ మీదుగా ఈ జోన్‌-1 పారింగ్‌కు చేరుకునేలా ఏర్పాట్లు చేశారు.
జోన్‌ 2: కరుణాపురం, దేవన్నపేట, మడిపల్లి అనంతసాగర్‌ మీదుగా ఈ పారింగ్‌ చేరుకునే అవకాశం ఉన్నది. మరో రూట్‌ అయిన వరంగల్‌లోని నాయుడు పెట్రోల్‌ పంప్‌, భట్టుపల్లి, కడిపికొండ ఆర్‌వోబీ, మడికొండ మీదుగా దేవన్నపేట, మడిపల్లి, అనంతసాగర్‌ నుంచి ఈ పారింగ్‌ జోన్‌-2కు చేరుకునేలా ఏర్పాట్లుచేశారు. మరోవైపు చింతగట్టు, జయగిరి, అనంతసాగర్‌ మీదుగా కూడా జోన్‌-2కు చేరుకోవచ్చు.
జోన్‌ 3: ధర్మసాగర్‌ మీదుగా దేవునూరు, దామెర, చింతలపల్లి నుంచి వచ్చే వాహనాలు పారింగ్‌ చేసుకునేలా జోన్‌-3లో ఏర్పాట్లు చేశారు.
జోన్‌ 4: కరీంనగర్‌ జాతీయ రహదారి 563 మీదుగా వచ్చే వాహనాలు హుజూరాబాద్‌, కోతులనడుమ, గ్రానైట్‌ క్వారీ మీదుగా ఈ పారింగ్‌ జోన్‌-4కు వాహనాలు చేరుకునేలా ఏర్పాట్లుచేశారు.
జోన్‌ 5: సిద్దిపేట జాతీయ రహదారి 765(డీజీ) మీదుగా సిద్దిపేట, హుస్నాబాద్‌, ములనూరు, గోపాల్‌పూర్‌ క్రాస్‌రోడ్‌, ఇందిరానగర్‌ మీదుగా ఈ పారింగ్‌ జోన్‌-5కు చేరుకునేలా ఏర్పాట్లుచేశారు. మరో రూట్‌లో వేలేరు, కొత్తకొండ, ముత్తారం వైపు నుంచి పారింగ్‌ జోన్‌-5కు చేరుకునేలా ఏర్పాట్లు ఉన్నాయి. మరో రూట్‌ అయిన కరీంనగర్‌ మీదుగా వచ్చే వాహనాలు కోతులనడుమ మీదుగా దారి మళ్లించుకుని గోపాల్‌పూర్‌, గోపాల్‌పూర్‌ క్రాస్‌రోడ్‌, సిద్దిపేట జాతీయ రహదారి మీదుగా ఇందిరానగర్‌ నుంచి పారింగ్‌ జోన్‌-5కు చేరుకునేలా ఏర్పాట్లు చేశారు.
