Y Satish Reddy | హైదరాబాద్ : రాహుల్ గాంధీ తెలంగాణకు వచ్చి తాను పప్పు అని మరోసారి నిరూపించుకున్నారు అని తెలంగాణ రెడ్కో చైర్మన్ వై సతీష్ రెడ్డి ఎద్దెవా చేశారు. తెలంగాణ ప్రభుత్వంపై విమర్శలు చేయాలనే ఆత్రుత తప్ప ఆయన స్పీచ్లో మరేం కనిపించలేదు అని అన్నారు. రూ. లక్ష కోట్లు కూడా ఖర్చు కాని కాళేశ్వరం ప్రాజెక్టులో లక్ష కోట్ల అవినీతి జరిగింది అన్నారంటేనే ఆయన ఎంత పెద్ద పప్పుసుద్దనో అర్థమైందని విమర్శించారు.
అలాగే మిషన్ కాకతీయపై రాహుల్ గాంధీ విమర్శలు చేయడం ఆయన అవివేకానికి నిదర్శనం అని సతీష్ రెడ్డి మండిపడ్డారు. 60 ఏండ్లలో కాంగ్రెస్ పార్టీ నీటి వనరులను పరిరక్షించలేదు. తెలంగాణలో ఉన్న గొలుసు కట్టు చెరువులు కాంగ్రెస్ నేతల కబ్జాలకు బలయ్యాయి. కానీ కేసీఆర్ ముఖ్యమంత్రి అయ్యాక తెలంగాణలో మిషన్ కాకతీయ ద్వారా చెరువులకు పునరుజ్జీవనం వచ్చింది. ఎండాకాలంలో కూడా చెరువులు మత్తళ్లు దుంకుతున్నాయి. వేలకోట్ల విలువ చేసే మత్స్య సంపద చెరువుల్లో చెంగుచెంగున ఎగురుతోంది. ఇవేవీ తెలియకుండా మాట్లాడి పప్పు అనిపించుకున్నారు అని సతీష్ రెడ్డి ధ్వజమెత్తారు.
అలాగే పోడు భూములపై రాహుల్ గాంధీ మాట్లాడటం హాస్యాస్పదం అని సతీష్ రెడ్డి పేర్కొన్నారు. ఆరు దశాబ్దాలు దేశాన్ని పాలించి ఏనాడు అడవిడ్డలను పట్టించుకున్న పాపాన పోలేదు. అడవి బిడ్డలు పట్టాలు కావాలని అడిగితే వారిని కాల్చి చంపిన దుర్మార్గ చరిత్ర కాంగ్రెస్ది. ఇప్పుడు తెలంగాణలో కేసీఆర్ అడవి బిడ్డలకు పోడు పట్టాలు ఇచ్చి, రైతుబంధు, రైతుబీమా కూడా వర్తింపజేశారు. రెండు రోజుల క్రితమే జరిగిన ఈ కార్యక్రమం గురించి తెలియకుండా మాట్లాడి మళ్లీ పప్పు అనిపించుకున్నారు. దశాబ్దాలుగా వివక్షకు గురైన వర్గాలన్నీ నేడు తెలంగాణలో సుభిక్షంగా, సుఖ సంతోషాలతో జీవిస్తున్నాయి. దానికి కారణం బీఆర్ఎస్ ప్రభుత్వ అభివృద్ధి సంక్షేమ ఫలాలు. కానీ రాహుల్ తెలంగాణ సంక్షేమం గురించి కనీస అవగాహన లేకుండా రాష్ట్ర నాయకులు రాసి ఇచ్చిన స్క్రిప్ట్ చదివి వెళ్లిపోయారు. తన అవివేకాన్ని ఆధ్యంతం పదే పదే బయటపెట్టుకున్నారు అని సతీష్ రెడ్డి పేర్కొన్నారు.