టీవీ-9 రవిప్రకాశ్‌పై కేసు ఉపసంహరణ చట్టవ్యతిరేకం

ఫోర్జరీ, నిధుల దుర్వినియోగం వంటి నేరాలకు పాల్పడినట్టు అభియోగాలు ఎదుర్కొంటున్న టీవీ-9 మాజీ డైరెక్టర్‌ రవిప్రకాశ్‌పై క్రిమినల్‌ కేసు ఉపసంహరణకు ప్రభుత్వం గత నెల 15న జీవో జారీ చేయడం, దాని ఆధారంగా కూకట్‌పల్లి మేజిస్ట్రేట్‌ కోర్టు ఉపసంహరణ ఉత్తర్వులు జారీ చేయడం చట్టవిరుద్ధమని అలాందా మీడియా ఎంటర్‌టైన్‌మెంట్‌ లిమిటెడ్‌ హైకోర్టుకు తెలిపింది.

హైదరాబాద్‌, సెప్టెంబర్‌ 2 (నమస్తే తెలంగాణ): ఫోర్జరీ, నిధుల దుర్వినియోగం వంటి నేరాలకు పాల్పడినట్టు అభియోగాలు ఎదుర్కొంటున్న టీవీ-9 మాజీ డైరెక్టర్‌ రవిప్రకాశ్‌పై క్రిమినల్‌ కేసు ఉపసంహరణకు ప్రభుత్వం గత నెల 15న జీవో జారీ చేయడం, దాని ఆధారంగా కూకట్‌పల్లి మేజిస్ట్రేట్‌ కోర్టు ఉపసంహరణ ఉత్తర్వులు జారీ చేయడం చట్టవిరుద్ధమని అలాందా మీడియా ఎంటర్‌టైన్‌మెంట్‌ లిమిటెడ్‌ హైకోర్టుకు తెలిపింది.

ఈ ఉత్తర్వులను సవాలు చేస్తూ ఆ సంస్థ డైరెక్టర్‌ కౌశిక్‌రావు వేసిన పిటిషన్‌పై జస్టిస్‌ ఈవీ వేణుగోపాల్‌ సోమవారం విచారణ చేపట్టారు. పిటిషనర్‌ తరఫున సీనియర్‌ న్యాయవాది టీ నిరంజన్‌రెడ్డి వాదిస్తూ.. ఎలాంటి కారణాలను పేర్కొనకుండా ఈ కేసు ఉపసంహరణకు మేజిస్ట్రేట్‌ ఉత్తర్వులు జారీచేశారని, ఇది నిబంధనల ఉల్లంఘన కిందకు వస్తుందని చెప్పారు.

యాంత్రికంగా జారీచేసిన ఈ ఉత్తర్వులను రద్దు చేయాలని కోరారు. దీంతో కౌంటర్‌ దాఖలు చేయాలని రాష్ట్ర ప్రభుత్వానికి, రవిప్రకాశ్‌కు, ఇతర ప్రతివాదులకు నోటీసులు జారీచేసిన హైకోర్టు.. తదుపరి విచారణను ఈ నెల 5కి వాయిదా వేసింది.