Free Education | ప్రైవేటు స్కూళ్లలో 25 శాతం ఉచిత సీట్లు పథకానికి తూట్లు.. ఇంకా ఏదీ తేల్చిన కాంగ్రెస్‌ సర్కార్‌

Free Education | విద్యాహక్కు చట్టం 12(1)సీ ప్రకారం ప్రైవేట్‌ పాఠశాలల్లో విద్యార్థులకు 25% సీట్లను ఉచితంగా ఇవ్వాల్సి ఉంది. ఈ 25% సీట్లను పేద, అణగారిన, ఆర్థికంగా వెనుకబడిన విద్యార్థులకు కేటాయించాలి.

Free Education | హైదరాబాద్‌, జూన్‌ 11 (నమస్తే తెలంగాణ) : విద్యాహక్కు చట్టం 12(1)సీ ప్రకారం ప్రైవేట్‌ పాఠశాలల్లో విద్యార్థులకు 25% సీట్లను ఉచితంగా ఇవ్వాల్సి ఉంది. ఈ 25% సీట్లను పేద, అణగారిన, ఆర్థికంగా వెనుకబడిన విద్యార్థులకు కేటాయించాలి. 2025-26 విద్యాసంవత్సరం గురువారం నుంచి ప్రారంభంకానున్నది. అయినా సర్కారు, విద్యాశాఖ దీనిపై ఏదీ తేల్చలేదు. దీంతో రాష్ట్రంలో ఇది అమలు కావడంలేదు. దీనిపై కొందరు హైకోర్టులో కేసు వేశారు. రాష్ట్ర ప్రభుత్వం 12(1)సీ అమలుచేస్తామని కోర్టుకు తెలిపింది. స్కూళ్ల యాజమాన్యాలు 25% సీట్లను అమలుచేయబోమంటున్నాయి. ఫీజు రీయింబర్స్‌మెంట్‌ బకాయిలు, బెస్ట్‌ అవైబుల్‌ స్కూళ్లకు వేలాది కోట్ల బకాయిలున్న నేపథ్యంలో తాము ఈ పథకాన్ని అమలుచేయబోమని భీష్మిస్తున్నాయి. తమను తప్పించాలని, సర్కారు చెల్లించే ఫీజులను విద్యార్థి తల్లిదండ్రుల ఖాతాల్లో వేసుకోవాలంటూ సూచిస్తున్నాయి. దీంతో పీఠముడి నెలకొన్నది.

90వేలకు పైగా సీట్లు..

యూనిఫైడ్‌ డిస్ట్రిక్ట్‌ ఇన్ఫర్మేషన్‌ సిస్టం(యూడైస్‌) వివరాల ప్రకారం రాష్ట్రంలో ఒకటో తరగతిలో 3,61,244 సీట్లున్నాయి. వీటిలో 25% అంటే 90,311 సీట్లను ఆర్టీఈ 12(1)సీ సెక్షన్‌ ప్రకారం భర్తీచేయాలి. ప్రస్తుతం ఒకటో తరగతిలోనే సీట్లు కేటాయిస్తారు. ఆ తర్వాత క్రమంగా విస్తరిస్తారు. ఈ ఏడాది రాష్ట్ర ప్రభుత్వంపై రూ. 36కోట్ల భారం పడుతుందని అంచనా వేశారు. ప్రైవేట్‌ స్కూళ్లల్లో 25% సీట్లను సమర్ధవంతంగా, సజావుగా అమలుచేసేందుకు రాష్ట్రస్థాయి కమిటీని ఏర్పాటు చేయాలని విద్యాకమిషన్‌ సిఫారసు చేసింది. పట్టణ, గ్రామీణ, గిరిజన ప్రాంతీయ వ్యత్యాసాల ఆధారంగా ఖర్చును నిర్ణయించాలని సూచించింది. మరికొన్ని సిఫారసులు చేసింది. ఈ సిఫారసుల్లో సర్కారు వేటిని ఆమోదించింది.. వేటిని పక్కనపెట్టింది అన్నది సస్పెన్స్‌గా మారింది.

20 రాష్ర్టాల్లో అమలు..

విద్యాహక్కు చట్టం సెక్షన్‌ 12 (1)సీని జాతీయంగా 20 రాష్ర్టాలు అమలుచేస్తున్నాయి. ఏపీ, తమిళనాడు, ఢిల్లీ సహా అనేక రాష్ర్టాల్లో ప్రైవేట్‌ స్కూళ్లల్లో 25% సీట్లను పేద విద్యార్థులకు ఉచితంగా కేటాయిస్తున్నాయి. ఈ సెక్షన్‌ను తెలంగాణ, పంజాబ్‌, కేరళ, పశ్చిమబెంగాల్‌ వంటి రాష్ర్టాలు మాత్రమే అమలుచేయడం లేదు. 2024 ఆగస్టులో కేంద్ర విద్యాశాఖ మంత్రి రాజ్యసభలో మాట్లాడుతూ.. తెలంగాణ, పంజాబ్‌, కేరళ, పశ్చిమబెంగాల్‌ రాష్ర్టాలు ఈ పథకాన్ని అమలుచేయాలని కోరారు. అయినా రాష్ట్ర ప్రభుత్వం ఇంకా మీనమేషాలు లెక్కిస్తున్నది.