20న కొత్త భవనంలోకి యూఎస్‌ కాన్సులేట్‌

భారత్‌-అమెరికా దేశాల మధ్య దౌత్యపరమైన సంబంధాలను పర్యవేక్షించే అమెరికా కాన్సులేట్‌ కార్యాలయం హైదరాబాద్‌ ఫైనాన్షియల్‌ డిస్ట్రిక్ట్‌లోని నానక్‌రామ్‌గూడలో నిర్మించిన నూతన భవనంలోకి మారనున్నది.

• 2,785 కోట్లతో ఆధునిక భవనం
• 15 నుంచి బేగంపేట ఆఫీస్‌ మూత
• 23 నుంచి వీసా ఇంటర్వ్యూలు

హైదరాబాద్‌/ హైదరాబాద్‌ సిటీబ్యూరో, మార్చి 7 (నమస్తే తెలంగాణ): భారత్‌-అమెరికా దేశాల మధ్య దౌత్యపరమైన సంబంధాలను పర్యవేక్షించే అమెరికా కాన్సులేట్‌ కార్యాలయం హైదరాబాద్‌ ఫైనాన్షియల్‌ డిస్ట్రిక్ట్‌లోని నానక్‌రామ్‌గూడలో నిర్మించిన నూతన భవనంలోకి మారనున్నది. నూతన కార్యాలయాన్ని ఈ నెల 20న ఉదయం 8. 30 గంటలకు అట్టహాసంగా ప్రారంభించనున్నట్టు కాన్సులేట్‌ మంగళవారం తెలిపింది. ఈ భవనాన్ని 34 కోట్ల డాలర్లు (దాదాపు రూ.2,785కోట్లు) వెచ్చించి అత్యాధునిక వసతులతో నిర్మించినట్టు పేర్కొన్నది. ఇది భారత్‌-అమెరికా మధ్య బలపడుతున్న వ్యూహాత్మక భాగస్వామ్యానికి నిదర్శనంగా నిలుస్తున్నదని చెప్పింది. ఈ మార్పు నేపథ్యంలో బేగంపేటలోని పైగా ప్యాలెస్‌లో ఉన్న ఆఫీస్‌ కార్యకలాపాలను ఈ నెల 15 మ ధ్యాహ్నం 12 నుంచి నిలిపివేస్తున్నట్టు ప్రకటించింది. మార్చి 20 ఉదయం 8.30 గంటలకు కాన్సులేట్‌ను మూసివేస్తున్నట్టు వెల్లడించింది. కాన్సులేట్‌ మార్పు ప్రక్రియ వల్ల వీసా అప్లికేషన్‌ సెంటర్‌ సేవలపై ఎలాంటి ప్రభావం ఉండబోదని ప్రకటించింది.

22 వరకు ఇంటర్వ్యూలు లేవు..

• ఈ నెల 15 వరకు వీసా ఇంటర్వ్యూ ఉన్న దరఖాస్తుదారులు బేగంపేటలోని ప్రస్తుత కార్యాలయానికి వెళ్లాల్సి ఉం టుంది. ఆ తర్వాత మార్చి 22వ తేదీ వరకు ఇంటర్వ్యూలు ఉండవు. 23వ తేదీ నుంచి ఇంటర్వ్యూ కోసం నానక్‌రామ్‌గూడలోని నూతన కార్యాలయానికి వెళ్లాల్సి ఉంటుంది.
• బయోమెట్రిక్‌, డ్రాప్‌బాక్స్‌ అపాయింట్‌మెంట్లు (ఇంటర్వ్యూ మినహాయింపు ఉన్న వారు), పాస్‌పోర్ట్‌ పికప్‌ సహా ఇతర వీసా సేవలు ‘లోయర్‌ కాంకోర్స్‌, హైటెక్‌సిటీ మెట్రో స్టేషన్‌, మాదాపూర్‌, హైదరాబాద్‌ 500081’ లో ఉన్న వీసా అప్లికేషన్‌ సెంటర్‌లో కొనసాగుతాయి. వీసా సేవలపై సందేహాలకు +91 120 4844644 లేదా +91 22 62011000 నంబర్లలో సంప్రదించవచ్చు.
• ఈనెల 20 వరకు అత్యవసర సేవలు కోరుతున్న అమెరికా పౌరులు +91 040-4033 8300 నంబర్‌లో సంప్రదించాలి. 20 తర్వాత అత్యవసర సేవలు కావాలనుకొనే అమెరికా పౌరులు +91 040 6932 8000 నంబర్‌కు ఫోన్‌చేయాలి. సందేహాల కోసం అమెరికా పౌరులు HydACS@ state.gov కు ఈ-మెయిల్‌ చేయాలి.