ఎయిర్‌పోర్ట్‌కు మరో 5 రూట్లలో ఆర్టీసీ బస్సులు

హైదరాబాద్‌ నగరం నుంచి శంషాబాద్‌ ఎయిర్‌పోర్ట్‌కు మరో 5 రూట్లలో టీఎస్‌ఆర్టీసీ బస్సు సర్వీసులను నడుపనున్నది.

• సికింద్రాబాద్‌-పటాన్‌చెరు నడుమ 8 ఏసీ బస్సులు

హైదరాబాద్‌, డిసెంబర్‌ 14 (నమస్తే తెలంగాణ): హైదరాబాద్‌ నగరం నుంచి శంషాబాద్‌ ఎయిర్‌పోర్ట్‌కు మరో 5 రూట్లలో టీఎస్‌ఆర్టీసీ బస్సు సర్వీసులను నడుపనున్నది. ఇప్పటికే ఎయిర్‌పోర్ట్‌కు 40కిపైగా ఎలక్ట్రిక్‌ బస్సులు నగరం నలువైపుల నుంచి తిరుగుతుండగా, మరో 5 రూట్ల నుంచి నాన్‌ ఏసీ బస్సులను నడుపనున్నట్టు ఆర్టీసీ అధికారులు గురువారం ప్రకటించారు. శుక్రవారం నుంచి ఈ కొత్త సర్వీసులు అందుబాటులోకి రానున్నాయని పేర్కొన్నారు. ఈ బస్సుల్లో సాధారణ టికెట్‌ ధరలే ఉంటాయని, మహిళలు ఉచితంగా ప్రయాణించవచ్చునని తెలిపారు. సికింద్రాబాద్‌-పటాన్‌చెరు మధ్య మెట్రో ఎలక్ట్రిక్‌ ఏసీ బస్సులను నడిపేందుకు టీఎస్‌ఆర్టీసీ సిద్ధమైంది. రూట్‌ నంబరు 219లో 8 బస్సులు ఈ మార్గంలో శుక్రవారం నుంచి నడుస్తాయి. ప్రతి 24 నిమిషాలకు ఓ బస్సు సర్వీసు అందుబాటులో ఉంటుందని అధికారులు తెలిపారు. సికింద్రాబాద్‌ నుంచి ఉదయం 6.10, పటాన్‌చెరు నుంచి ఉదయం 7.45కి మొదటి బస్సు బయలుదేరుతుందని పేర్కొన్నారు.

శంషాబాద్‌ ఎయిర్‌పోర్ట్‌కు కొత్త రూట్లు ఇవే..

• రూట్‌నంబర్‌-303: కొండాపూర్‌ నుంచి 4 సిటీ ఆర్డినరీ సర్వీసులు
• రూట్‌ నంబర్‌ 90ఎల్‌ -251ఎ బస్సు : సికింద్రాబాద్‌ నుంచి 4 మెట్రో ఎక్స్‌ప్రెస్‌ సర్వీసులు
• రూట్‌ నంబరు 295ఏ : కేపీహెచ్‌బీ మెయిన్‌ రోడ్డు నుంచి 4 ఆర్డినరీ బస్సులు
• రూట్‌ నంబరు 229-95ఏ: సుచిత్ర నుంచి 5 మెట్రో ఎక్స్‌ప్రెస్‌లు
• రూట్‌ నంబర్‌ 3కే-95ఏ: ఈసీఐఎల్‌ క్రాస్‌ రోడ్స్‌ నుంచి 4 మెట్రో ఎక్స్‌ప్రెస్‌ సర్వీసులు