అర్థగణాంక శాఖలో బది‘లీలలు’!

రాష్ట్రవ్యాప్తంగా అన్ని విభాగాల్లో ఉద్యోగుల బదిలీలు జరుగుతున్నా తమకు మాత్రం అన్యాయం జరుగుతున్నదని అర్థగణాంక శాఖ ఉద్యోగులు ఆరోపిస్తున్నారు.

• నిబంధనలు అమలు కావడం లేదని విమర్శిస్తున్న ఉద్యోగులు
• ‘తప్పనిసరి బదిలీ’ జాబితాలో ఉన్నా రిటెయిన్‌ చేశారని ఆరోపణ

హైదరాబాద్‌, జూలై 18 (నమస్తే తెలంగాణ): రాష్ట్రవ్యాప్తంగా అన్ని విభాగాల్లో ఉద్యోగుల బదిలీలు జరుగుతున్నా తమకు మాత్రం అన్యాయం జరుగుతున్నదని అర్థగణాంక శాఖ ఉద్యోగులు ఆరోపిస్తున్నారు. బదిలీలకు సంబంధించి ఈ నెల 3న ప్రభుత్వ జీవో ప్రకారం.. ఏ ఉద్యోగి అయినా నాలుగేండ్లకు మించి ఒకే చోట పనిచేయరాదన్న నిబంధన ఉన్నదని గుర్తు చేస్తున్నారు. నిబంధనను తుంగలో తొక్కి బదిలీల్లో తమ పేరు లేకుండా ‘మేనేజ్‌’ చేశారని చెప్పుకుంటున్నారు.

• 40 శాతం మంది ఉద్యోగులు తప్పనిసరిగా బదిలీ కావాలన్న నిబంధన ప్రకారం.. గతంలో ఒక జాబితాను విడుదల చేసినప్పటికీ అందులోని పలువురు ఉద్యోగులను హెల్త్‌ సర్టిఫికెట్ల వంకతో రిటెయిన్‌ చేసినట్టు చెప్పారు. వారిలో చాలా మంది నకిలీ సర్టిఫికెట్లు సమర్పించినట్టు ఆరోపిస్తున్నారు.
• మరికొందరు గుర్తింపు పొందిన సంఘం ఆఫీస్‌ బేరర్లుగా సర్టిఫికెట్‌ తెచ్చుకుంటున్నారని, హైదరాబాద్‌లోని డైరెక్టరేట్‌తోపాటు జిల్లాల్లో విచ్చలవిడిగా ఆఫీస్‌ బేరర్ల సర్టిఫికెట్లు మంజూరవుతున్నాయని చెప్తున్నారు.
• తప్పనిసరి బదిలీల జాబితాలో ఉన్న కొందరు ఉద్యోగులు ఆ జాబితాలో లేనివారికి ఫోన్లు చేసి, ఆప్షన్లు పెట్టుకోవద్దంటూ ‘మేనేజ్‌’ చేశారని, తద్వారా వారు ఖాళీ అయ్యే స్థానంలోకి ఎవరూ రావడం లేదన్న వంకతో రిటెయిన్‌ చేయించుకున్నారని ఆరోపణలు వినిపిస్తున్నాయి. అర్థగణాంక శాఖలో బదిలీలన్నీ గందరగోళంగా తయారయ్యాయని, ఈ నేపథ్యంలో ఉన్నతాధికారులు చొరవ తీసుకొని తమకు న్యాయం చేయాలని పలువురు ఉద్యోగులు తమ శాఖ ముఖ్య కార్యదర్శికి ఫిర్యాదు చేసినట్టు సమాచారం.