Visit:
హైదరాబాద్‌, నవంబర్‌ 29 (నమస్తే తెలంగాణ): ఎస్సీ గురుకుల సొసైటీలో ఫేషియల్‌ రికగ్నైషన్‌ సిస్టమ్‌ (ఎఫ్‌ఆర్‌ఎస్‌) అమలులో అక్రమాలు జరిగాయని ఆరోపణలు వెల్లువెత్తుతున్నాయి. టెండర్‌ లేకుండానే ముఖ్యమైన కాంట్రాక్టును అనుకూల సంస్థకు కట్టబెట్టారని తెలిసింది. డిపార్ట్‌మెంటల్‌ ప్రొక్యూర్‌మెంట్‌ కమిటీ (డీపీసీ) పేరిట సొసైటీ ఉన్నతాధికారులు ఇష్టారీతిన నిర్ణయాలు తీసుకుంటున్నారని సొసైటీ సిబ్బంది బాహాటంగా చర్చించుకుంటున్నారు. సాంఘిక సంక్షేమ గురుకుల విద్యాలయాల సంస్థలోని విద్యార్థుల హాజరును ఎఫ్‌ఆర్‌ఎస్‌ ద్వారా నమోదు చేయాలని గతంలో నిర్ణయించారు. ఎఫ్‌ఆర్‌ఎస్‌ అమలు కోసం పలు సంస్థలు సొసైటీని సంప్రదించాయి. ప్రతి రోజూ ఒక విద్యార్థికి గరిష్ఠంగా రూ.0.8 పైసల చొప్పున చార్జీ చేసేందుకు ప్రతిపాదించాయి. ఆ లెక్కన సొసైటీలో రూ.1.80 లక్షల మంది విద్యార్థుల, 300 రోజుల పనిదినాల హాజరు కోసం ఏటా రూ.43.2 లక్షలు ఖర్చవుతుంది.
పలు సంస్థలు రూ.0.8 పైసల కంటే కూడా తక్కువ ధరతో చేసేందుకు ఆసక్తి చూపాయి. కానీ సొసైటీ ఉన్నతాధికారులు ఆ సంస్థలను పక్కన పెట్టారు. సొసైటీ ఉన్నతాధికారులు డీపీసీ సిఫారసు పేరిట టెండర్లను లేకుండానే ఎఫ్‌ఆర్‌ఎస్‌ బాధ్యతలను ఓ సంస్థకు కట్టబెట్టారు. ఆ సంస్థ ప్రతి విద్యార్థికీ రోజుకు రూ.0.17 పైసల చొప్పున చార్జీ చేస్తున్నది. అంతేకాదు 300 రోజులకు కాకుండా మొత్తం 365 పనిదినాలు అని పేర్కొంటూ రూ.1,16, 28,900 నిధులు వెచ్చించేందుకు సిద్ధమైంది. ఇలా సొసైటీపై రూ.72.8 లక్షల మేరకు అదనపు భారం పడుతున్నదని సొసైటీ వర్గాలు వివరిస్తున్నాయి.
మొత్తంగా టెండర్లు పిలువకుండానే అనుకూల సంస్థకే ఎఫ్‌ఆర్‌ఎస్‌ బాధ్యతలను అప్పగించారని తెలిసింది. మొత్తం కాంట్రాక్టులో 30శాతం డబ్బులు అడ్వాన్స్‌గా చెల్లించినట్టు విశ్వసనీయ సమాచారం. తక్కువ ఖర్చుతో నిర్వహిస్తామన్న సంస్థలను పక్కన పెట్టి, అధిక ధర వసూలు చేసే సంస్థకు బాధ్యతలను అప్పగించడంలో ఆంతర్యమేంటని ప్రశ్నలు వ్యక్తమవుతున్నాయి. అసలు ఎఫ్‌ఆర్‌ఎస్‌తో గురుకుల విద్యార్థులకు అదనంగా కలిగే ప్రయోజనం ఏమీ లేదని, నిధులు వృథా తప్ప మరేమీకాదని సొసైటీ సిబ్బంది అసంతృప్తి వ్యక్తం చేస్తున్నారు.
సొసైటీ నిర్ణయాలు, ఆర్థిక వ్యవహారాలకు ప్రభుత్వ ఆమోదం తప్పనిసరి. కానీ సొసైటీ ఉన్నతాధికారులు ఈ విధానానికి స్వస్తి పలికి, ఎన్నడూ లేని విధానాలకు శ్రీకారం చుట్టారని విమర్శలు వినిపిస్తున్నాయి. ఇందులో భాగంగానే డీపీసీ ఏర్పాటు చేసినట్టు చెప్తున్నారు. కమిటీలో సెక్రటరీ మినహా పలువురు జాయింట్‌ సెక్రటరీలు సభ్యులుగా ఉన్నారు. డీపీసీ రెకమండేషన్‌ పేరిటనే ఎఫ్‌ఆర్‌ఎస్‌ నిర్వహణ బాధ్యతలను కూడా అనుకూల ఏజెన్సీకి నేరుగా అప్పగించారని ఆరోపణలు వినిపిస్తున్నాయి. పాత ఫైళ్లు, రన్నింగ్‌ ఫైళ్లు, మెస్‌బిల్లులను డిజిటలైజేషన్‌ చేసే కాంట్రాక్టు, సొసైటీ ప్రధాన కార్యాలయ ఆవరణలో డ్రైవర్లు, అటెండర్ల విశ్రాంతి భవనాన్ని కూల్చివేత, కొత్త భవనం నిర్మాణం కాంట్రాక్టుల అప్పగింతలోనూ డీపీసీనే చక్రం తిప్పినట్టు తెలిసింది.
సొసైటీ నిధులు దుబారా చేయొద్దని, సంస్థను ఆర్థిక సంక్షోభంలోకి నెట్టొద్దంటూ డీపీసీలోని ఓ ఉన్నతాధికారి పదేపదే చెప్పినట్టు తెలిసింది. ఆ అధికారి డిప్యుటేషన్‌ ఈ ఏడాది జూలైలోనే ముగిసింది. కొనసాగింపు ఉత్తర్వుల కోసం వేచిచూస్తూ సొసైటీలోనే యథావిధిగా కొనసాగారు. కానీ ఆ అధికారి అడ్డంకి అని భావించిన ఎస్సీ గురుకుల సొసైటీ పెద్దలు.. రిలీవ్‌ చేసినట్టు సమాచారం. ఆ స్థానంలో మరో ఉన్నతాధికారి డిప్యుటేషన్‌పై చేరారు. కొత్తగా చేరిన అధికారి డీపీసీలోనూ కీలక మెంబర్‌గా ఉండటంపై కూడా అనుమానాలు వ్యక్తమవుతున్నాయి. మొత్తంగా ఎస్సీ గురుకుల సొసైటీ ఉన్నతాధికారులు వ్యవహరిస్తున్న తీరుపై దళిత, ఉద్యోగ, ఉపాధ్యాయ సంఘాల నేతలు తీవ్ర ఆగ్రహం వ్యక్తం చేస్తున్నారు. నిధులు లేవంటూనే అర్థం లేని నిర్ణయాలతో సొసైటీ నిధులను దుబారా చేస్తున్నారని విమర్శిస్తున్నారు. ప్రభుత్వం తక్షణం దృష్టి సారించాలని, డీపీసీ నిర్ణయాలన్నింటిపై విచారణ జరిపించాలని డిమాండ్‌ చేస్తున్నారు.
