KTR | కేటీఆర్‌కు ఏసీబీ ఇచ్చింది నోటీసులా లేదు.. సీబీఐ మాజీ జేడీ లక్ష్మీనారాయణ ఎద్దేవా

KTR | మాజీ మంత్రి కేటీఆర్‌కు ఏసీబీ ఇచ్చిన నోటీసుల్లో ఎలాంటి స్పష్టత లేదని, అవి నోటీసులా కాకుండా లేఖలా ఉన్నాయని సీబీఐ మాజీ జాయింట్‌ డైరెక్టర్‌ జేడీ లక్ష్మీనారాయణ అభిప్రాయపడ్డారు.

KTR | హైదరాబాద్‌, జనవరి 7(నమస్తే తెలంగాణ): మాజీ మంత్రి కేటీఆర్‌కు ఏసీబీ ఇచ్చిన నోటీసుల్లో ఎలాంటి స్పష్టత లేదని, అవి నోటీసులా కాకుండా లేఖలా ఉన్నాయని సీబీఐ మాజీ జాయింట్‌ డైరెక్టర్‌ జేడీ లక్ష్మీనారాయణ అభిప్రాయపడ్డారు. కేటీఆర్‌కు వచ్చిన నోటీసులకు సంబంధించి మంగళవారం ఓ టీవీ చానల్‌తో మాట్లాడిన ఆయన మూడు అభ్యంతరాలను వ్యక్తం చేశారు.

• కేటీఆర్‌కు ఏసీబీ ఇచ్చిన నోటీసును తాను పరిశీలించానని, దానిలో కేటీఆర్‌ను ఏ సెక్షన్‌ కింద పిలుస్తున్నారో పేర్కొనలేదని తెలిపారు. అది లేఖలా ఉన్నదని అన్నారు. ఏదైనా విచారణ ఏజెన్సీ నోటీసులు ఇచ్చినప్పుడు ఏ సెక్షన్‌ కింద ఇస్తున్నారో పేర్కొంటారని, కానీ కేటీఆర్‌కు ఇచ్చిన నోటీసులో అవి లేవని చెప్పారు.
• కేటీఆర్‌కు ఏసీబీ ఇచ్చిన లేఖ సారాంశాన్ని పరిశీలిస్తే.. ప్రశ్నించేందుకు, పత్రాలు సమర్పించేందుకు ఏసీబీ ముందు విచారణకు హాజరుకావాలని ఉన్నదని తెలిపారు. కేటీఆర్‌ నుంచి ఏదైనా డాక్యుమెంట్‌ తీసుకోవాలంటే ఆయనకు 94 బీఎన్‌ఎస్‌ఎస్‌ (91 సీఆర్‌పీసీ) కింద నోటీసులివ్వాలని, అవి లేవని చెప్పారు.
• కేటీఆర్‌కు ఏసీబీ 160 సీఆర్‌పీసీ (ప్రస్తుతం 179 బీఎన్‌ఎస్‌) కింద నోటీసు ఇచ్చారని, అయితే ఒక కేసు విషయంలో పరిజ్ఞానం ఉన్న వ్యక్తులను పిలిపించాలంటే 179 బీఎన్‌ఎస్‌ కింద నోటీసులు ఇవ్వాలని పేర్కొన్నారు. కానీ కేటీఆర్‌ ప్రస్తుతం ఎఫ్‌ఐఆర్‌లో నిందితుడు మాత్రమే అని, ఎఫ్‌ఐఆర్‌లో పేరు ఉన్న నిందితుడికి 160 సీఆర్‌పీసీ కింద నోటీసులివ్వొద్దని తెలిపారు.