Telangana | తెలంగాణ ప్రజలు మొత్తం కేసీఆర్‌వైపే.. ఎన్నికల్లో గెలిచేది బీఆర్‌ఎస్సే.. ఏ సర్వేలు చూసినా ఇదే మాట!

Telangana | తెలంగాణ అసెంబ్లీ ఎన్నికల్లో మళ్లీ గులాబీ జయకేతనమే అని తేలిపోయింది. ఏ సర్వే తీసుకొన్నా.. ఏ ఒపీనియన్‌ పోల్‌ చూసినా.. బీఆర్‌ఎస్‌ హ్యాట్రిక్‌ పక్కా అని సుస్పష్టం అవుతున్నది. బీఆర్‌ఎస్‌ అధినేత కేసీఆర్‌ హ్యాట్రిక్‌ ఖాయమని వెల్లడవుతున్నది.

Telangana | హైదరాబాద్‌, అక్టోబర్‌ 30 (నమస్తే తెలంగాణ): తెలంగాణ అసెంబ్లీ ఎన్నికల్లో మళ్లీ గులాబీ జయకేతనమే అని తేలిపోయింది. ఏ సర్వే తీసుకొన్నా.. ఏ ఒపీనియన్‌ పోల్‌ చూసినా.. బీఆర్‌ఎస్‌ హ్యాట్రిక్‌ పక్కా అని సుస్పష్టం అవుతున్నది. బీఆర్‌ఎస్‌ అధినేత కేసీఆర్‌ హ్యాట్రిక్‌ ఖాయమని వెల్లడవుతున్నది. ఇండియా టీవీ, మిషన్‌ చాణక్య, ఎన్‌పీఐ, ఈఎన్‌టీ, ప్రముఖ జర్నలిస్టుల ఒపీనియన్‌ పోల్స్‌లో ఆ వర్గం.. ఈ వర్గం అన్న తేడాలేకుండా సబ్బండ వర్గాలు సీఎం కేసీఆర్‌ నాయకత్వం పట్ల సంతృప్తిని వ్యక్తంచేస్తున్నాయి. బీఆర్‌ఎస్‌ ప్రభుత్వమే మళ్లీ కొలువుదీరాలని ఆకాంక్షిస్తున్నాయి. తాజాగా, 77 సీట్లతో అధికారం మరోసారి బీఆర్‌ఎస్‌దేనని రాజ్‌నీతి ఒపీనియల్‌ పోల్‌ స్పష్టం చేసింది. బీఆర్‌ఎస్‌ పార్టీ 64 -70 సీట్లతో హ్యాట్రిక్‌ కొడుతుందని శ్రీ ఆత్మసాక్షి సర్వే సంస్థ వెల్లడించింది. కౌలు రైతుల్లో 47శాతం, రైతుల్లో 53 శాతం, విద్యార్థుల్లో 39 శాతం మంది బీఆర్‌ఎస్‌కే ఓటేస్తామని, మళ్లీ బీఆర్‌ఎస్‌ ప్రభుత్వమే కొలువుదీరాలని ఆకాంక్షిస్తున్నారు.

70 సీట్లతో అధికారంలోకి

అధికార బీఆర్‌ఎస్‌ 64 -70 సీట్లతో అధికారంలోకి వస్తుందని శ్రీఆత్మసాక్షి సర్వే ప్రకటించింది. ‘మూడ్‌ ఆఫ్‌ తెలంగాణ’ పేరుతో ఈ సంస్థ మూడు విడతల్లో సర్వే నిర్వహించి, ఫలితాలను వెల్లడించింది. జూలై, ఆగస్టు, అక్టోబర్‌ మాసాల్లో ఈ సంస్థ రాష్ట్రవ్యాప్తంగా ప్రజాభిప్రాయసేకరణ జరిపింది. తాజా ఎన్నికల్లో కాంగ్రెస్‌ 37 -43 సీట్లతో రెండోస్థానంలో ఉండగా, బీజేపీ 5-6, ఎంఐఎం 6 -7 స్థానాలు దక్కించుకుంటాయని వెల్లడించింది. మరో 6 స్థానాల్లో గట్టిపోటీ ఉంటుందని సంస్థ అంచనావేయగా, వీటిలో మూడు స్థానాల్లో బీఆర్‌ఎస్‌, కాంగ్రెస్‌ రెండు, బీజేపీ ఒక స్థానంలో ముందంజలో ఉండే అవకాశమున్నట్టు ప్రకటించింది. రాష్ట్రంలోని అన్ని వర్గాల వారు బీఆర్‌ఎస్‌కు బలమైన అండగా ఉన్నట్టు సర్వేలో తేలింది. ప్రసుత ప్రభుత్వం అమలుచేస్తున్న అభివృద్ధి సంక్షేమ పథకాల పట్ల జనం సంతృప్తిని వ్యక్తంచేస్తున్నారు. రాష్ట్రంలో 1.75 శాతం ఓటర్లు ఎటూ తేల్చుకోలేకపోగా, వీరిలో 80 శాతం ఎన్నికల్లో గల ఊపును బట్టి గెలిచే పార్టీవైపే ఉంటారని సంస్థ వర్గాలు అంచనావేశాయి.

శ్రీ ఆత్మసాక్షి సర్వే ప్రధానాంశాలు

• సంపన్నుల్లో 36 శాతం, మధ్యతరగతిలో 41, పేదల్లో 50 శాతం, నిరుపేదల్లో 51 శాతం మంది బీఆర్‌ఎస్‌కే జైకొట్టారు.
• కాంగ్రెస్‌కు సంపన్నుల్లో 30, మధ్యతరగతిలో 39, పేదల్లో 40, నిరుపేదల్లో 42 శాతం మాత్రమే మద్దతుగా నిలిచారు.
• బీజేపీకి సంపన్నుల్లో 28, మధ్యతరగతిలో 16, పేదల్లో 7, నిరుపేదల్లో 4 శాతం మాత్రమే అండగా ఉన్నారు.
• మతాలపరంగా తీసుకొంటే అన్ని మతాల వారు బీఆర్‌ఎస్‌ వెంటే నిలిచారు. హిందువులు 46, ముస్లింలు 47, క్రిస్టియన్‌ 45 శాతం బీఆర్‌ఎస్‌ పక్షాన ఉన్నామని తేల్చి చెప్పారు.
• కాంగ్రెస్‌కు హిందువులు 40, ముస్లింలు 44, క్రిస్టియన్లు 42 శాతం, హిందుత్వ పార్టీ అని చెప్పుకొనే బీజేపీ పట్ల కేవలం 12 శాతం మాత్రమే సుముఖంగా ఉన్నారు. ఇక ముస్లింలు, క్రిస్టియన్లు 3 శాతం చొప్పున అండగా ఉన్నారు.
• అన్ని వయసులవారు బీఆర్‌ఎస్‌ ప్రభుత్వమే కొలువుదీరాలని అకాంక్షిస్తున్నారు. 61 ఏండ్లకు పైబడిన వారు 51 శాతం, 51-60 మధ్య వయస్కులు 50 శాతం, 41-50 మధ్య వయస్కులు 48 శాతం, 31-40 మధ్య వయస్కులు 40, 18-30 ఏండ్ల మధ్య వయస్కులు 38 శాతం బీఆర్‌ఎస్‌కే ఓటేస్తామని చెప్పారు.

బీఆర్‌ఎస్‌కు 77 సీట్లు

అసెంబ్లీ ఎన్నికల్లో అధికార బీఆర్‌ఎస్‌ 77 సీట్లతో అధికారాన్ని దక్కించుకుంటుందని రాజ్‌నీతి సంస్థ సర్వేలో తేలింది. ఉచితాలంటూ, 6 గ్యారెంటీలంటూ ఊదరగొడుతున్న కాంగ్రెస్‌ 29 సీట్లకే పరిమితం కానున్నది. బీజేపీ 6 స్థానాలతో సరిపెట్టుకోనుండగా బీఎస్పీ సహా ఇతరులు ఖాతా తెరిచే అవకాశం లేదని రాజ్‌నీతి సంస్థ సర్వేలో వెల్లడయ్యింది. సర్వే ఫలితాలను సోమవారం ఆ సంస్థ విడుదల చేసింది. హైదరాబాద్‌లోని 6 అసెంబ్లీ సెగ్మెంట్లు, మునుగోడు మినహా 112 నియోజకవర్గాల్లో సర్వే నిర్వహించింది. బీఆర్‌ఎస్‌ 43.35 శాతం ఓట్లను దక్కించుకోనుండగా, కాంగ్రెస్‌ 34 శాతం ఓట్లకే పరిమితంకానున్నదని సర్వేలో తేలింది.