మాజీ సైనిక కుటుంబాలకు చేయూత

మాజీ సైనికులు, అమరులైన సైనిక కుటుంబాలకు మరింత మద్దతుగా నిలవాలని సాయుధ దళాల రాష్ట్ర మేనేజింగ్‌ కమిటీ నిర్ణయించింది. ఈ మేరకు వివిధ సందర్భాల్లో అందించే సాయాన్ని పెంచింది.

హైదరాబాద్‌, నవంబర్‌ 2 (నమస్తే తెలంగాణ) : మాజీ సైనికులు, అమరులైన సైనిక కుటుంబాలకు మరింత మద్దతుగా నిలవాలని సాయుధ దళాల రాష్ట్ర మేనేజింగ్‌ కమిటీ నిర్ణయించింది. ఈ మేరకు వివిధ సందర్భాల్లో అందించే సాయాన్ని పెంచింది. సైనికుల కుటుంబాల సంక్షేమానికి కట్టుబడి ఉన్నామని తెలిపింది.

కమిటీ చైర్మన్‌, గవర్నర్‌ జిష్ణుదేవ్‌ వర్మ అధ్యక్షతన 4వ సమావేశం జరిగింది. సమావేశంలో ఐఏఎస్‌లు, సైనిక అధికారులు, సైనిక సంక్షేమ అధికారులు పాల్గొన్నారు. పలు కీలక నిర్ణయాలు తీసుకున్నారు.

• డిగ్రీ ఫస్టియర్‌ చదివే మాజీ సైనికుల పిల్లలకు కంప్యూటర్‌/ల్యాప్‌టాప్‌ల కోసం రూ.40వేలు సాయం
• 25 ఏండ్ల లోపు వయస్సు ఉన్న సైనిక వితంతువులకు రూ.2 లక్షలు
• 25 ఏండ్ల లోపు వయస్సు ఉండి ఇద్దరు పిల్లలు కలిగిన సైనిక వితంతువులకు రూ.3 లక్షలు
• పెండ్లి కాని మాజీ సైనికుడి తల్లిదండ్రులకు రూ.3 లక్షలు
• మాజీ సైనికుల ఆడపిల్లలకు ‘కల్యాణ కానుక’ సాయం రూ.40వేల నుంచి రూ.50వేలకు పెంపు
• వందశాతం దివ్యాంగులైన సైనికులకు ఆర్థిక సాయం నెలకు రూ.12 వేల నుంచి రూ.15వేలకు పెంపు
• అనాథలైన మాజీ సైనికుల పిల్లలకు ఆర్థిక సాయం నెలకు రూ.5వేలకు పెంపు
• కరీంనగర్‌, వరంగల్‌లో సైనిక్‌ భవనాల పునరుద్ధరణకు రూ.40 లక్షలు మంజూరు
• సైనిక సంక్షేమ శాఖ హెల్ప్‌ లైన్‌ ఏర్పాటుకు కమిటీ ఆమోదం