Telangana | విద్యాశాఖలో ఎన్జీవోల రాజ్యం.. వారు చెప్పిందే వేదం

కొత్త ఐఏఎస్‌ అధికారి బాధ్యతలు చేపట్టగానే.. కొత్త ఎన్జీవోలు రంగ ప్రవేశం చేస్తాయి. ఈ ప్రోగ్రామ్‌.. ఆ ప్రోగ్రామ్‌ అంటూ హడావుడి చేసేస్తాయి. ఆయా ఐఏఎస్‌ అధికారి మారగానే అవన్నీ మూలనపడతా యి. ఆ తర్వాత మళ్లీ పాత కథే మొదలవుతుంది. ఇది విద్యాశాఖలో జరుగుతున్న నిత్య తంతు.

• పాఠశాల విద్యాశాఖలో పెరిగిన జోక్యం
• ఉన్నతాధికారుల తీరుతో తలలు పట్టుకుంటున్న అధికారులు
• 3,4 ఎన్జీవోలు చెప్పిందే వేదం

Telangana | హైదరాబాద్‌, మే 24 (నమస్తే తెలంగాణ) : కొత్త ఐఏఎస్‌ అధికారి బాధ్యతలు చేపట్టగానే.. కొత్త ఎన్జీవోలు రంగ ప్రవేశం చేస్తాయి. ఈ ప్రోగ్రామ్‌.. ఆ ప్రోగ్రామ్‌ అంటూ హడావుడి చేసేస్తాయి. ఆయా ఐఏఎస్‌ అధికారి మారగానే అవన్నీ మూలనపడతాయి. ఆ తర్వాత మళ్లీ పాత కథే మొదలవుతుంది. ఇది విద్యాశాఖలో జరుగుతున్న నిత్య తంతు. పాఠశాల విద్యాశాఖలో మూడు నాలుగు స్వచ్ఛందసంస్థ లు(ఎన్జీవోలు) చెప్పిందే వేదంగా నడుస్తున్నదని తెలుస్తున్నది. ఈ ఎన్జీవోలకు ఉన్నతాధికారులు రెడ్‌ కార్పెట్‌ పరుస్తున్నట్టు సమాచారం. కొత్తగా మరో రెండు, మూడు ఎన్జీవోలు రాబోతున్నాయని తెలుస్తున్నది.

ఆయా ఎన్జీవోలతో ఎంవోయూలు కుదుర్చుకునేందుకు రంగం సిద్ధమయ్యిందని సమాచా రం. ఓ ఎన్జీవో కంప్యూటర్లు కొనండి.. డిజిటల్‌ పాఠాల కంటెంట్‌ను సమకూరుస్తామని పేర్కొందట. దీంతో కిందిస్థాయిలోని విద్యాశాఖ అధికారులు తల లు పట్టుకుంటున్నారు. ఇదేం వ్యవహారమని విస్తుపోతున్నారు. ఇక ఎన్జీవోల జోక్యం పాఠశాల విద్యాశాఖను దాటి ఉన్నత విద్యాశాఖలోకి ప్రవేశించనున్నట్టు సమాచారం. ఇంటర్మీడియట్‌ విద్యలోనూ ఓ ఎన్జీవోను ప్రోత్సహించేందుకు ప్రయత్నం జరుగుతుందని తెలిసింది.

ఎన్జీవోల పెత్తనమేంటీ..

అసలే సర్కారు బడులకు పిల్లలే వస్తలేరంటే.. ఎన్జీవోలను ప్రోత్సహించి భ్రష్టు పట్టిస్తున్నారని విద్యాశాఖలోని ఓ అధికారి వాపోయారు. విద్యాశాఖను ప్రభుత్వం పాలిస్తున్నదా.. ఎన్జీవోలు పాలిస్తున్నాయా..? తెలియడం లేదంటూ మరో అధికారి ఆవేదన వ్యక్తంచేశారు. ఓ ఎన్జీవో వచ్చి లెర్నింగ్‌ ఇంప్రూవ్‌మెంట్‌ అంటుంది.. మరొకరొచ్చి డిజిటల్‌ విద్య.. తెల్లారి మరొకరొచ్చి ఆర్టిఫీషియల్‌ ఇంటెలిజె న్స్‌ అంటారు. ఇలా రోజుకొకటి చొప్పున గందరగోళం సృష్టిస్తున్నారని విద్యాశాఖలోని అధికారులు తీవ్ర అసంతృప్తి వ్యక్తంచేస్తున్నారు. ఎన్జీవోలను ప్రోత్సహించే విషయంలో గతంలో ఓ ఇద్దరు ఐఏఎస్‌ అధికారుల మధ్య పంచాయితీ కూడా నడిచింది. ఓ అధికారి ఎన్జీవోలు చెప్పినట్టు నడుచుకోవాలని చెప్పగా, ఎన్జీవోల మితిమీరిన జోక్యమేంటని మరో ఐఏఎస్‌ ప్రశ్నించారు.

ఇది వరకు పనిచేసిన ఎన్జీవోలు

• యూనిసెఫ్‌, ఇంక్విలాబ్‌ ఫౌండేషన్లు సంయుక్తంగా తెలంగాణ ఇన్నోవేషన్‌ చాలెంజ్‌ను నిర్వహించాయి. ఇప్పుడు ఇది మూలనపడింది.
• కొంత కాలం క్రితం వరకు రూమ్‌ టు రీడ్‌ ఫౌండేషన్‌ గ్రంథాలయాల మీద పనిచేసింది. రీడింగ్‌ కార్నర్‌లు ఏర్పాటు చేశారు. పుస్తకాలు పంపిణీ చేశారు. ఆ తర్వాత అది అటకెక్కింది.
• ఫౌండేషన్‌ లిటరసీ అండ్‌ న్యూమరసీ (ఎఫ్‌ఎల్‌ఎన్‌) మీద సెంట్రల్‌ స్కేర్‌ ఫౌండేషన్‌(సీఎస్‌ఎఫ్‌) పనిచేసింది. ఎఫ్‌ఎల్‌ఎన్‌ను కొన్ని సంఘా లు వ్యతిరేకించడంతో ఇది సస్పెన్స్‌లో పడింది.
• ఇంటింటా చదువుల పంట పేరుతో వాట్సాప్‌ చాట్‌బాట్‌ను అందుబాటులోకి తెచ్చారు. ఇది మరుగున పడింది.
• ఇంగ్లిష్‌ మీడియంలో టీచర్ల శిక్షణకు అజీం ప్రేమ్‌జీ ఫౌండేషన్‌తో ఎంవోయూ చేసుకున్నారు. ప్రస్తుతం వినియోగంలో లేదు.

ప్రస్తుతం పని చేస్తున్నవి..

• ఈ ఏడాది నుంచి నందన్‌ నిలేకనికి చెందిన ఏక్‌ స్టెప్‌ ఫౌండేషన్‌ రాష్ట్రంలో పనిచేస్తున్నది. ఏఐ పాఠాలంటూ వచ్చింది. రాష్ట్రంలోని విద్యార్థులకు చదవడం, రాయడం రావడంలేదంటూ న్యాస్‌ సర్వే గగ్గొలుపెట్టింది. మాతృభాష అయిన తెలుగును సరిగ్గా చదవలేని స్థితిలో ఉన్నారని ఆందోళన వ్యక్తంచేసింది. ఈ పరిస్థితుల్లో ఏఐ ఎందుకు అన్న ప్రశ్నలొస్తున్నాయి.
• ఖాన్‌ అకాడమీ ఆధ్వర్యంలో సైన్స్‌, గణితం టీచర్లకు శిక్షణ ఇప్పిస్తున్నారు. రాష్ట్రస్థాయిలో రిసోర్స్‌పర్సన్స్‌ను ఎంపికచేసిన తర్వాత మళ్లీ ఎన్జీవోలతో పనేంటన్న ప్రశ్నలు ఉత్పన్నమవుతున్నాయి.
• ప్రజ్వల ఎన్జీవో, ఎడ్యుకేట్‌ గర్ల్స్‌ సంస్థల ద్వారా బాలికల సాధికారత, భద్రత, రక్షణ కోసం మరో కార్యక్రమాన్ని త్వరలోనే ప్రారంభించనున్నట్టు తెలిసింది.