ప్రైవేట్‌ కాలేజీల ప్రకటనలపై నిఘా

కార్పొరేట్‌, ప్రైవేట్‌ కాలేజీలు జారీ చేసే అడ్వర్టయిజ్‌మెంట్లపై ఇంటర్‌ బోర్డు ప్రత్యేక నిఘా పెట్టింది. తప్పుడు ర్యాంకులతో విద్యార్థులను చేర్చుకొనే విధానానికి అడ్డుకట్ట వేయాలని నిర్ణయించి, ఐదుగురు ఉన్నతాధికారులతో పర్యవేక్షణ కమిటీని నియమించింది.

• ఇంటర్‌ బోర్డు కీలక నిర్ణయం
• ఐదుగురితో పర్యవేక్షణ కమిటీ
• ఉత్తర్వులు జారీ చేసిన కమిషనర్‌

హైదరాబాద్‌, మే 8 (నమస్తే తెలంగాణ): కార్పొరేట్‌, ప్రైవేట్‌ కాలేజీలు జారీ చేసే అడ్వర్టయిజ్‌మెంట్లపై ఇంటర్‌ బోర్డు ప్రత్యేక నిఘా పెట్టింది. తప్పుడు ర్యాంకులతో విద్యార్థులను చేర్చుకొనే విధానానికి అడ్డుకట్ట వేయాలని నిర్ణయించి, ఐదుగురు ఉన్నతాధికారులతో పర్యవేక్షణ కమిటీని నియమించింది. ఇంటర్‌బోర్డు పరీక్షల నియంత్రణాధికారి, పరీక్షల విభాగం జాయింట్‌ సెక్రటరీ, పరిపాలన విభాగం జాయింట్‌ సెక్రటరీ, అకడమిక్స్‌ జాయింట్‌ సెక్రటరీ, పబ్లిక్‌ రిలేషన్స్‌ అధికారులతో కూడిన కమిటీని నియమిస్తూ సోమవారం ఇంటర్‌ బోర్డు కమిషనర్‌ నవీన్‌ మిట్టల్‌ ఉత్తర్వులిచ్చారు.

ఈ ఏడాది మార్చి 6న ప్రైవేట్‌ జూనియర్‌ కాలేజీల యాజమాన్యాలతో ఎంసీఆర్‌హెచ్చార్డీలో ఉన్నతస్థాయి సమావేశాన్ని నిర్వహించిన విషయం తెలిసిందే. విద్యార్థుల ఆత్మహత్యల నివారణ, కార్పొరేట్‌ కాలేజీలు తప్పుడు ర్యాంకులతో విద్యార్థులను మోసపుచ్చుతున్నాయన్న అంశంపై చర్చించారు. ఇందులో భాగంగా కాలేజీలిచ్చే అడ్వర్టయిజ్‌మెంట్లపై పర్యవేక్షణ జరపాలని సమావేశంలో నిర్ణయించారు.

అమలు ఇలా..

• ఇక నుంచి జూనియర్‌ కాలేజీలు పత్రికలకు అడ్వర్టయిజ్‌మెంట్లు ఇవ్వాలనుకొంటే ఇంటర్‌బోర్డు నుంచి ముందస్తు అనుమతి తీసుకోవాలి.
• ఆయా యాజమాన్యాలు అనుమతి కోసం ఇంటర్‌బోర్డు పీఆర్వోకు దరఖాస్తు సమర్పించాలి. ప్రచురించే అడ్వర్టయిజ్‌మెంట్లను జతపరచాలి.
• పర్యవేక్షణ కమిటీ యాడ్లలోని కంటెంట్‌ను పరిశీలించి, తగు సూచనలు చేసి, ప్రచురణకు అనుమతి ఇస్తుంది.