Junk Food | స్కూళ్ల సమీపంలో జంక్‌ఫుడ్‌పై నిషేధం.. ఆల్కహాల్‌, డ్రగ్స్‌, పొగాకు అమ్మకాలపైనా..

పాఠశాలల సమీపంలో జంక్‌ఫుడ్‌, మత్తుపదార్థాల విక్రయాలపై ప్రభుత్వం నిషేధం విధించింది. 100 మీటర్ల పరిధిలో ఎలాంటి జంక్‌ఫుడ్స్‌ విక్రయాలు జరుపొద్దని, డ్రగ్స్‌, ఆల్కహాల్‌, పొగాకు అమ్మకాలపై నిషేధం అమల్లో ఉంటుందని స్పష్టంచేసింది.

• మత్తు పదార్థాల నియంత్రణకు ప్రహరీక్లబ్బులు

Junk Food | హైదరాబాద్‌, సెప్టెంబర్‌ 27 (నమస్తే తెలంగాణ) : పాఠశాలల సమీపంలో జంక్‌ఫుడ్‌, మత్తుపదార్థాల విక్రయాలపై ప్రభుత్వం నిషేధం విధించింది. 100 మీటర్ల పరిధిలో ఎలాంటి జంక్‌ఫుడ్స్‌ విక్రయాలు జరుపొద్దని, డ్రగ్స్‌, ఆల్కహాల్‌, పొగాకు అమ్మకాలపై నిషేధం అమల్లో ఉంటుందని స్పష్టంచేసింది. విద్యాలయాల్లో డ్రగ్స్‌ను అరికట్టేందుకు ప్రహరీక్లబ్‌లు ఏర్పాటుచేయాలని ప్రభుత్వం ఈ ఏడాది జూలై 13న జీవో విడుదల చేసింది. తల్లిదండ్రులు, పోలీసులు, 6 నుంచి 10వ తరగతి విద్యార్థులతో కలిసి ఈ క్లబ్‌ను ఏర్పాటుచేస్తారు.

పాఠశాల హెచ్‌ఎం క్లబ్‌కు అధ్యక్షుడిగా, సీనియర్‌ టీచర్‌ ఉపాధ్యక్షుడిగా, 6 నుంచి 10వ తరగతి వరకు క్లాసుకు ఇద్దరు చొప్పున, పీటీఏ(పేరెంట్‌ టీచర్‌ అసొసియేషన్‌)నుంచి ఒక ప్రతినిధి, స్థానిక పోలీసుస్టేషన్‌ నుంచి ఒకరు సభ్యులుగా ఉంటారు. హైదరాబాద్‌, సైబరాబాద్‌, రాచకొండ పరిధిలో పోలీసుశాఖ, ఎన్‌ఎస్‌ఎస్‌ వలంటీర్ల సహకారం తీసుకుంటారు. క్లబ్బుల పనితీరు, నిర్వహణపై విద్యాశాఖ సమగ్రమైన మార్గదర్శకాలు విడుదల చేసింది. క్లబ్‌లను ఏర్పాటుచేస్తూ జీవో ఇచ్చిన రెండు నెలల తర్వాత మార్గదర్శకాలివ్వడం గమనార్హం.

ఇవీ మార్గదర్శకాలు..

• ప్రతి పాఠశాలలో నో డ్రగ్స్‌ సైన్‌బోర్డులు ఏర్పాటుచేయాలి. డ్రగ్స్‌తో నష్టాలను తెలియజేయడమే కాకుండా, వాటిపై అవగాహన కల్పించేలా గోడలపై నినాదాలు రాయించాలి.
• పాఠశాల ప్రాంగణంలో టోల్‌ఫ్రీ నంబర్లు(1800-599-6969, 1800-11-0031)ప్రదర్శించాలి. సూచనల బాక్స్‌ ఏర్పాటుచేయాలి.
• ప్రతి నెలా ప్రహరీక్లబ్‌ సమావేశాలు నిర్వహించాలి. యాక్షన్‌ప్లాన్‌ రూపొందించాలి. అందరితో డ్రగ్స్‌ నియంత్రణ ప్రతిజ్ఞ చేయించాలి.
• యాంటీడ్రగ్‌ డే(జూన్‌ 26), యాంటీటుబాకో డే(మే 21)లను నిర్వహించాలి.
• విద్యార్థులు సహపాఠ్య కార్యక్రమాలపై దృష్టిపెట్టేలా చూడాలి. నైపుణ్యాలు, ఆటలు, యోగా, మెడిటేషన్‌, మైండ్‌ఫుల్‌నెస్‌పై ఆకర్షితులయ్యేలా చేయాలి.