వెయిటింగ్‌లోనే వేతనాలు.. ఔట్‌సోర్సింగ్‌, కాంట్రాక్ట్‌ ఉద్యోగులకు నెలల తరబడి జీతాలివ్వని సర్కారు

ఒకటో తేదీనే ఉద్యోగులకు జీతాలిస్తున్నాం. ఇది సర్కారుపెద్దలు చెప్పేమాట. కానీ, రాష్ట్రంలోని ఔట్‌సోర్సింగ్‌, కాంట్రాక్ట్‌ ఉద్యోగులు ఒకటో తేదీన వేతనం పొందక నెలలు కావస్తున్నది. రేవంత్‌ ప్రభుత్వం కొలువుదీరి రెండేైండ్లెనా పరిస్థితిలో మార్పురాకపోవడంతో పలు శాఖల్లోని చిరుద్యోగులు తీవ్ర ఇబ్బందులు ఎదుర్కొంటున్నారు.

• ఒక్కోశాఖలో 6 నుంచి 8 నెలలు వేతనాలు పెండింగ్‌ పెట్టిన ప్రభుత్వం
• ఇబ్బందుల్లో లక్షల మంది ఉద్యోగులు
• జీతాలు చెల్లించాలని డిమాండ్‌

హైదరాబాద్‌, అక్టోబర్‌ 27 (నమస్తే తెలంగాణ) : ఒకటో తేదీనే ఉద్యోగులకు జీతాలిస్తున్నాం. ఇది సర్కారుపెద్దలు (Congress Govt) చెప్పేమాట. కానీ, రాష్ట్రంలోని ఔట్‌సోర్సింగ్‌, కాంట్రాక్ట్‌ ఉద్యోగులు ఒకటో తేదీన వేతనం పొందక నెలలు కావస్తున్నది. రేవంత్‌ ప్రభుత్వం కొలువుదీరి రెండేైండ్లెనా పరిస్థితిలో మార్పురాకపోవడంతో పలు శాఖల్లోని చిరుద్యోగులు తీవ్ర ఇబ్బందులు ఎదుర్కొంటున్నారు. ఇక సమగ్రశిక్షలో పనిచేస్తున్న ఉద్యోగులకు 20 రోజులు ఆలస్యంగా ఒకనెల వేతనాలు మాత్రమే ఇచ్చారు. సమ్మె కాలానికి వేతనం ఇస్తామన్న హామీ ఇంతవరకు నెరవేరనేలేదు. సకాలంలో వేతనాలందక ఆయా ఉద్యోగులంతా రోజువారీ ఖర్చుల కోసం అష్టకష్టాలుపడుతున్నారు. ఒక్కో శాఖలో 6 నుంచి 8 నెలల వేతనాలు పెండింగ్‌ ఉండడంతో తమ కుటుంబాలు అర్థాకలితో అలమటిస్తున్నాయని వాపోతున్నారు.

4 లక్షలకు పైగా ఉద్యోగులు..

రాష్ట్రంలో అన్నిప్రభుత్వ శాఖల్లో నాలుగు లక్షలకు పైగా ఉద్యోగులు పనిచేస్తున్నారు. హెచ్‌వోడీలు, ప్రధాన కార్యాలయాలు, జిల్లా, మండల కార్యాలయాలు, క్షేత్రస్థాయిలో ఔట్‌సోర్సింగ్‌, పార్ట్‌టైం, హానరోరియం, కాంట్రాక్ట్‌ ప్రాతిపదికన వీరంతా పనిచేస్తున్నారు. కొన్ని ప్రభుత్వశాఖలు నేరుగా వీరిని నియమించుకోగా, మరికొన్ని శాఖలు జిల్లాల వారీగా మ్యాన్‌పవర్‌ ఏజెన్సీల ద్వారా నియామకం చేసుకున్నాయి. కొన్ని ఏజెన్సీలు నిర్దేశిత సంఖ్యలో నియమించకుండా లక్షలు స్వాహా చేస్తున్నట్లు ఆరోపణలున్నాయి. నెలల తరబడి వేతనాలు చెల్లించకుండా పీఎఫ్‌, ఈఎస్‌ఐ వంటివి కూడా తమ ఖాతాల్లో జమచేయకుండా వ్యక్తిగతంగా వాడుకుంటున్నట్టు ఉద్యోగులు ఆరోపిస్తున్నారు. ఇప్పటికైనా ప్రభుత్వం స్పందించి పెండింగ్‌ వేతనాలు విడుదల చేయాలని ఉద్యోగులు కోరుతున్నారు.

పలు పెండింగ్‌ వివరాలు ఇలా..

• భద్రాద్రికొత్తగూడెం, సూర్యాపేట, నల్లగొండ, నిర్మల్‌, జయశంకర్‌భూపాలపల్లి జిల్లాల్లో వ్యవసాయశాఖలో పనిచేస్తున్నవారి వేతనాలు పెండింగ్‌ ఉన్నాయి. ఒక జిల్లాలో 7, మరో జిల్లాలో 5 నెలల వేతనాలు అందలేదు.
• పంచాయతీరాజ్‌శాఖకు సంబంధించి కామారెడ్డి, సంగారెడ్డి, జగిత్యాలలో 6 నెలలకు పైగా వేతనాలు అందలేదు. దీంతో 1,600మంది ఇబ్బంది పడుతున్నారు.
• కలెక్టర్‌, తహసీల్‌ కార్యాలయాల్లో(టీశ్వాన్‌అండ్‌వీసీ), ఐటీఈఅండ్‌సీలో పనిచేస్తున్న 240 మంది ఉద్యోగులకు ప్రభుత్వ 6 నెలల వేతనాలు బాకీపడింది.
• మున్సిపల్‌శాఖలో నారాయణపేట, అచ్చంపేట, మహబూబ్‌నగర్‌ హైదరాబాద్‌ జలమండలిలో దాదాపు 6వేల పైచిలుకు ఉ ద్యోగులకు రెండు నెలల వేతనాలివ్వలేదు.
• దేవాదాయశాఖలో మేడ్చల్‌మల్కాజిగిరి జిల్లాలో వేతనాలు పెండింగ్‌ ఉన్నాయి.
• ఎన్నికల సంఘం సీఈవో పరిధిలో 119 మంది పనిచేస్తుండగా, వీరికి 5 నెలల వేతనాలు అందలేదు.