పోలవరం ముంపుపై ఉమ్మడి సర్వే చేయాలి

పోలవరం బ్యాక్‌ వాటర్‌ ప్రభావంపై సత్వరమే ఉమ్మడి సర్వే చేపట్టాలని కేంద్ర జలసంఘం మరోసారి పునరుద్ఘాటించింది. ఈ మేరకు ఇటీవల నిర్వహించిన మీటింగ్‌ మినిట్స్‌లోనూ ఈ అంశాన్ని పీపీఏకు, ఆంధ్రప్రదేశ్‌కు నొక్కిచెప్పింది.

•  పీపీఏకు కేంద్ర జల్‌శక్తి సంఘం నిర్దేశం

హైదరాబాద్‌, ఫిబ్రవరి 10 (నమస్తే తెలంగాణ): పోలవరం బ్యాక్‌ వాటర్‌ ప్రభావంపై సత్వరమే ఉమ్మడి సర్వే చేపట్టాలని కేంద్ర జలసంఘం మరోసారి పునరుద్ఘాటించింది. ఈ మేరకు ఇటీవల నిర్వహించిన మీటింగ్‌ మినిట్స్‌లోనూ ఈ అంశాన్ని పీపీఏకు, ఆంధ్రప్రదేశ్‌కు నొక్కిచెప్పింది. సుప్రీంకోర్టు ఆదేశాల మేరకు పోలవరం బ్యాక్‌వాటర్‌ సమస్యపై ప్రభావిత రాష్ర్టాలైన తెలంగాణ, ఆంధ్రప్రదేశ్‌, ఒడిశాతో జనవరి 25న ఢిల్లీలో నిర్వహించిన ప్రత్యేక సమావేశంలో తెలంగాణ ప్రాతిపాదించిన ఉమ్మడి సర్వేతోపాటు పలు అంశాలకు సీడబ్ల్యూసీ అంగీకారం తెలిపింది. పీపీఏకు, ఏపీకి ఆ సమావేశంలో స్పష్టమైన అదేశాలు జారీ చేసింది. తాజాగా ఆ మీటింగ్‌ మినిట్స్‌ను కూడా రాష్ట్రాలకు అందజేసింది. తెలంగాణ ప్రతిపాదించిన అంశాలపై జాయింట్‌ సర్వే చేయాలని స్పష్టం చేసింది.

జాయింట్‌ సర్వే చేయాల్సిన అంశాలు

• పోలవరం ప్రాజెక్టులో 150 అడుగుల నీరు నిల్వ ఉన్నప్పుడు తెలంగాణలో ముంపునకు గురయ్యే ప్రాంతాలను గుర్తించాలి.
• ముర్రేడు, కిన్నెరసానితోపాటు మరో ఏడు ఇతర వాగులపై పోలవరం ప్రాజెక్టు బ్యాక్‌వాటర్‌ ఎఫెక్ట్‌ను అధ్యయనం చేయాలి.
• పోలవరం ప్రాజెక్టులో ఎఫ్‌ఆర్‌ఎల్‌ 150 అడుగుల వద్ద నీరు నిల్వ చేసినప్పుడు భద్రాచలం వద్ద గోదావరి మట్టాన్ని పరిశీలించాలి. భద్రాచలం వద్ద వరద నీటిని గోదావరిలోకి పంపేందుకు కరకట్ట వద్ద ఏర్పాటుచేసిన ఎనిమిది తూముల లెవల్స్‌ను కూడా అధ్యయనం చేయాలి.
• మణుగూరు భారజల కేంద్రంపై పోలవరం బ్యాక్‌ వాటర్‌ ప్రభావాన్ని అధ్యయనం చేయాలి. ఆయా అంశాలపై ఏపీ ప్రభుత్వం సహకరించినా, సహకరించకపోయినా తెలంగాణతో కలిసి పోలవరం ప్రాజెక్టు అథారిటీ (పీపీఏ) జాయింట్‌ సర్వేను నిర్వహించాలని సీడబ్ల్యూసీ స్పష్టంచేసింది. ఈ నేపథ్యంలో పీపీఏతో సత్వరమే సర్వే చేయించేందుకు తెలంగాణ సర్కారు చర్యలు చేపట్టింది. ఇప్పటికే సర్వే బాధ్యతలను కొత్తగూడెం సీఈకి అప్పగించింది. సీడబ్ల్యూసీ ఆదేశాల మేరకు సర్వే చేపట్టాలని కోరుతూ పీపీఏకు మరోసారి లేఖ రాసే పనిలో నిమగ్నమైంది.