Telangana | ప్రజా ఫిర్యాదుల పరిష్కారంలో తెలంగాణ టాప్‌.. వెల్లడించిన సీపీ గ్రామ్‌ నివేదిక

ప్రజా ఫిర్యాదులను పరిష్కరించడంలో తెలంగాణ దేశంలోనే మరోసారి మొదటిస్థానంలో నిలిచింది. గతంలోనూ అద్భుత పనితీరును నమోదుచేసిన తెలంగాణ తాజాగా మే నెలలోనూ ఉత్తమ ప్రదర్శనను కనబరిచింది. రాష్ట్రం 2,524 పిటిషన్లను అత్యల్పంగా ఎనిమిది రోజుల్లోనే పరిష్కరించింది. లక్షద్వీప్‌ 12 రోజుల వ్యవధిలో 171 పిటిషన్లను పరిష్కరించి రెండోస్థానంలో ఉండగా, అండమాన్‌ నికోబార్‌ 442 పిటిషన్లను 20 రోజుల సగటుతో పరిష్కరించి మూడోస్థానంలో నిలిచింది.

• గ్రూప్‌ డీ క్యాటగిరీలో 72.89 స్కోర్‌
• 15 వేల కంటే తక్కువ ఫిర్యాదులు
• రాష్ట్రం నుంచి 2,633 కైంప్లెంట్లే
• 8 రోజుల్లోనే సమస్య ఒక కొలిక్కి
• సీపీ గ్రామ్‌ నివేదికలో వెల్లడి

Telangana | హైదరాబాద్‌, జూన్‌ 14 (నమస్తే తెలంగాణ): ప్రజా ఫిర్యాదులను పరిష్కరించడంలో తెలంగాణ దేశంలోనే మరోసారి మొదటిస్థానంలో నిలిచింది. గతంలోనూ అద్భుత పనితీరును నమోదుచేసిన తెలంగాణ తాజాగా మే నెలలోనూ ఉత్తమ ప్రదర్శనను కనబరిచింది. రాష్ట్రం 2,524 పిటిషన్లను అత్యల్పంగా ఎనిమిది రోజుల్లోనే పరిష్కరించింది. లక్షద్వీప్‌ 12 రోజుల వ్యవధిలో 171 పిటిషన్లను పరిష్కరించి రెండోస్థానంలో ఉండగా, అండమాన్‌ నికోబార్‌ 442 పిటిషన్లను 20 రోజుల సగటుతో పరిష్కరించి మూడోస్థానంలో నిలిచింది. 15 వేలలోపు పిటిషన్లు ఉన్న రాష్ర్టాలను గ్రూప్‌-డీ క్యాటగిరీలో చేర్చారు. ఈ క్యాటగిరీ రాష్ర్టాలకు కేటాయించిన ర్యాంకింగ్‌లోనూ తెలంగాణ మొదటిస్థానం దక్కించుకున్నది.

గ్రూ ప్‌-డీ క్యాటగిరీలో తెలంగాణ 72.49 స్కోర్‌తో తొలిస్థానంలో నిలవగా.. ఛత్తీస్‌గఢ్‌ 55.75 స్కోర్‌తో రెండోస్థానంలో నిలిచింది. ఆంధ్రప్రదేశ్‌ అట్టడుగున పదో స్థానంతో సరిపెట్టుకున్నది. జాతీయస్థాయిలో సామాన్యుల నుంచి ఫిర్యాదులను స్వీకరించి, పరిష్కరించేందుకు సెంట్రలైజ్డ్‌ పబ్లిక్‌ గ్రీవెన్స్‌స్‌ రెడ్రెస్‌ అండ్‌ మానిటరింగ్‌ సిస్టం (సీపీజీఆర్‌ఏఎంఎస్‌) పేరుతో ఆన్‌లైన్‌ పోర్టల్‌ను కేంద్ర ప్రభుత్వం నిర్వహిస్తున్నది. సామాన్యులెవరైనా ఈ వేదికపై ప్రజా ప్రయోజనాలతో ముడిపడి ఉన్న సమస్యలపై ఫిర్యాదు చేయొచ్చు. కేంద్రం వాటిని రాష్ర్టాలకు పం పించి, పరిష్కరించాలని కోరుతుంది. ఇందుకోసం రాష్ర్టాలవారీగా గ్రీవెన్స్‌ రిడ్రెస్సల్‌ ఆఫీసర్స్‌ (జీఆర్‌వో) ఉంటారు. ఇటీవలే వివిధ రాష్ర్టాలు, కేంద్రపాలిత ప్రాంతాల జీఆర్‌వోల సమావేశాన్ని నిర్వహించి ఆ నివేదిను బుధవారం విడుదల చేసింది.

నివేదికలోని ముఖ్యాంశాలు

మేలో జాతీయంగా 56,981 ఫిర్యాదులను స్వీకరించగా, పెండింగ్‌లో ఉన్నవి కలుపుకుని 65,983 పిటిషన్లను పరిష్కరించారు.రాష్ర్టాలు, కేంద్రపాలిత ప్రాంతా ల్లో పెండింగ్‌ కేసుల సంఖ్య గణనీయంగా తగ్గింది. ఏప్రిల్‌ నాటికి మొత్తం 2,03,715 కేసులు ఉంటే మే నాటికి వీటి సంఖ్య 1,94,713కు తగ్గింది.

• బీజేపీ పాలిత ఉత్తరప్రదేశ్‌ నుంచి అత్యధికంగా పిటిషన్లు వచ్చాయి. 21 రాష్ర్టాలు, కేంద్రపాలిత ప్రాం తాల్లో వెయ్యికిపైగా పెండింగ్‌ కేసులు ఉన్నాయి.
• 15 వేలకు పైగా ఫిర్యాదులు నమోదైన రాష్ర్టాల్లో ఉత్తరప్రదేశ్‌ 62.07 స్కోర్‌తో అగ్రస్థానంలో నిలిచింది. ఆ తర్వాత జార్ఖండ్‌ 46.14, మధ్యప్రదేశ్‌ 43.05 స్కోర్‌ సాధించాయి.
• అన్ని రాష్ర్టాలు, కేంద్రపాలిత ప్రాంతాలు సమస్యల పరిష్కారానికి 30 రోజులు తీసుకుంటున్నాయి. మహారాష్ట్రలో 30 రోజులు దాటినా పరిష్కారానికి నోచుకోనివి 23,367 పిటిషన్లు ఉన్నాయి.
• యాక్షన్‌ టేకెన్‌ రిపోర్ట్స్‌ను (ఏటీఆర్‌) నమోదు చేసే విషయంలో అస్సాం, హర్యానా, ఛత్తీస్‌గఢ్‌ తర్వాత తెలంగాణ నాలుగో స్థానాన్ని దక్కించుకున్నది. రాష్ట్రం నుంచి మొత్తంగా 2,376 ఏటీఆర్‌లు నమోదుకాగా, 49 శాతం పూర్తిగా పరిష్కారమయ్యాయి. మరో 2,327 పాక్షికంగా పరిష్కారమయ్యాయి.
• ఈశాన్య రాష్ర్టాల్లో సిక్కిం 64.9 స్కోర్‌తో మొదటిస్థానంలో నిలువగా, అస్సాం 54.89 స్కోర్‌, అ రుణాచల్‌ప్రదేశ్‌ 51.72స్కోర్‌తో ఆ తర్వాతి స్థానంలో నిలిచాయి.
• కేంద్రపాలిత ప్రాంతాల్లో అండమాన్‌ నికోబార్‌ 63.09 స్కోర్‌, లడఖ్‌ 55.20 స్కోర్‌తో ముందంజలో ఉన్నాయి.